2416 萬像素 + 藍牙自動傳相!入門級單反 Nikon D5600 發表

2016-11-11 20:47
早幾日有個朋友仔問版主:「如果想買部入門單反相機,有無咩嘢好推介?」一直用開 Canon 相機的版主,腦海中第一時間,淨係想到自己用緊果部 EOS 760D,唔知係咪習慣左的關係,我覺得 Canon 相機眾多品牌中,相對易用。有時版主好想了解下網友的睇法,在你們的心目中,仲有邊部比 EOS 760D 好用,而價錢又相若的入門級相機呢?Nikon 最新發表的入門級單反相機 D5600,網友又覺得能唔能夠成功挑戰 EOS 760D 呢?

2416 萬像素 + 藍牙自動傳相!入門級單反 Nikon D5600 發表

Nikon 日前在日本發表了 D5600 相機,佢係一部入門級 DX 格式的數碼單鏡反光相機,同 Canon EOS 760D 一樣,具有 3.2 吋多角度 LCD 觸控屏幕,可以翻開及旋轉,對於鐘意玩低炒的網友來說,呢個多角度 LCD 屏幕應該相當方便。另外,D5600 亦在重播縮放模式中加入了裁剪功能以及影像快進條,並新增了在進階型號 D7200 上具有的微時短片功能。

2416 萬像素 + 藍牙自動傳相!入門級單反 Nikon D5600 發表

Nikon D5600 配備了2416 萬像素的 DX 格式 CMOS 影像感應器,並不設低通光學濾鏡,結合 EXPEED 4 影像處理引擎,ISO 範圍為 ISO 100 至 25600,就算在昏暗環境下拍攝,都可以有效抑制雜訊。Nikon 強調,透過 SnapBridge 應用程式以及 Bluetooth 低耗電 (BLE) 技術,D5600 可與智能裝置無間斷地連接,影完嘅靜態影像,能夠自動傳送到已配對的智能裝置上,方便用戶上載及分享高品質的影像,就算相機電源已關閉,都依然可以繼續傳相,並將影像上載至 NIKON IMAGE SPACE 儲存及分享。另外,相機亦都內置 Wi-Fi 功能,可以無線傳送短片以及遙距拍攝。

Nikon D5600 賣幾錢,目前未有消息,只係知道外國定價為 799.99 歐元,折合港幣約 $6750。不過 Nikon 表示,將會在今個月內推出,同時備有淨機身、連 AF-P DX Nikon 18-55mm f/3.5 - 5.6G VR 鏡頭套裝,或連 AF-S DX Nikon 18-400mm f/3.5-5.6G ED VR 鏡頭套裝可以選擇。唔知網友對呢部相機,有啲乜嘢睇法呢?會唔會好過 Canon 入門相機呢?留言講下啦!