外型同 70D 差別不大，首部採用 100% 覆蓋率觀景器的 Canon 中階單反
首先，版主要澄清一點，我並不是「龍友」，亦無咁多錢去入手一部咁貴的單反相機，所以一直都只係用緊 Canon 入門級的 EOS 700D。用左兩年左右，開始覺得部 700D 滿足唔到我，想搵機會換過部新相機，但又可以用番現有的鏡頭。今日版主上手玩呢部 80D，覺得以中階機來說，都可以話勉強滿足到我，就有一點覺得唔係好慣，可能係用慣 700D 的關係，一直習慣拍攝模式的轉盤在右邊，但 80D 的轉盤就在左邊，呢點就需要時間去習慣。
不過講番外型方面，其實 80D 同 70D 的差別並不是太大，機身體積為 139.0 x 105.2 x 78.5 mm，淨機身重量約 650g，比我部 700D 略重，但其實都可以接受。80D 同樣具有「握手位」，方便單手拍攝，而且能夠更穩定，同時具備 3 吋 104 萬點解像度 3:2 多角度多點觸控式 Clear View II 屏幕，支持觸控對焦、瀏覽及設定操作 (呢點對於版主來說並沒有甚麼特別，因為即使在入門機 700D 上，其實都可以做到)。另外，Canon EOS 80D 同樣配備光學觀景器，不同的是，今次是 Canon 首次在中階 EOS 系列的觀景器中提供 100% 覆蓋率以及 0.95x 放大率。
▲ Canon 80D 的正面圖，版主上手試玩所用的鏡頭，並不是跟機果枝 kit 鏡，而是 Canon EF 100mm f/2.8L Macro IS USM 鏡頭。
▲ 呢個方向望落去，EOS 80D 的前方會有鏡頭拆卸鍵以及內置閃光燈開啟鍵。
▲ 另一邊就有「握手位」，方便單手拍攝，而且在拍攝時能夠增加手持的穩定性。
▲ 機背方面，其實如果俾我講，我會覺得同 700D 差別不大，同樣具有設定鍵、播放鍵、方向鍵、清除鍵、功能鍵等功能，而且亦有光學觀景器，Canon 表示是首次在 EOS 中階系列相機上提供 100% 的覆蓋率以及 0.95x 的放大率。另外右上亦有 AF Lock 鍵，在拍照模式時按「START/STOP」，可以開啟或者關閉 Live View，而在錄影模式的話，就會變左開始以及暫停錄影鍵。
▲ 左下方會有個「LOCK」，呢個並不是甚麼新功能，在 70D 上都已經有，可以 LOCK 左上方的轉盤，讓你無法改變其設定。
▲ EOS 80D 具備 3 吋 104 萬點解像度 3:2 觸控式 Clear View II 屏幕，可以多角度翻轉，方便從不同的角度，借助 Live View 的幫助，拍攝出不同的效果。
▲ 機的上方會有熱靴，可以裝上外置閃光燈、麥克風等配件。另外，上方仲有曝光補償、開關、模式切換、ISO 等功能，而且能夠顯示相機資訊。
▲ EOS 80D 除了有基本的程式自動曝光、快門先決、光圈先決的拍攝模式，亦有 C1、C2 自訂拍攝模式。
▲ 機身側面會有 SD 卡插槽。
▲ 另一側則有3.5mm 外接立體聲麥克風插孔、3.5mm 耳機插孔、C 型 (解像度自動切換) 兼容 CEC HDMI 輸出插槽等等。另外，Canon 80D 是支持 NFC 功能的，所以你都會見到會有 NFC 的圖示。
▲ Canon EOS 80D 採用了 LP-E6N 電池，利用觀景器拍攝，最多可以拍攝 1390 張照片。
▲ EOS 80D 淨機身重量約 650g，雖然係比版主手上的 700D 略重，不過其實都係可以接受的。Model 上手 Canon EOS 80D，你覺得哪個吸引啲呢?
採用 AI SERVO AF II 自動對焦演算法，支持每秒 7 張連續拍攝
配置方面，Canon EOS 80D 採用了 2,420 萬像素 APS-C 尺吋 Canon CMOS 影像感應器，配備 DIGIC 6 數碼影像處理器，標準感光度範圍為 ISO 100 至 ISO 16000，並可擴展至 ISO 25600。雖然版主手上的入門級 700D 都可以去到 ISO 12800，不過其實去到 ISO 1600，影出黎的質素已經好勉強，但 80D 作為一部中階機，即使使用更高 ISO 感光度，亦能夠拍出相對較好的相片質素。另外，Canon 在 80D 的鏡頭像差校正中加入了「變形校正」，能夠即時修正鏡頭的變形像差，提升影像質素。
除此之外，EOS 80D 亦內置 7,560 像素 RGB + IR 測光感應器，支援 63 區測光，配備全新設計 45 點全十字型自動對焦感應器，相比上代能夠支持更廣闊的覆蓋範圍，中央對焦點更為支援 f/2.8 光圈的雙十字型對焦點，低光對焦能力改良至 EV-3。新對焦系統在 f/8 光圈時亦可支援 27 點自動對焦點，其中 9 點為十字型自動對焦點。EOS 80D 提供 4 種自動對焦區域選擇，包括新加入的「大區域自動對焦」(Large Zone AF)，並採用 AI SERVO AF II 自動對焦演算法，能夠更精確地追蹤主體進行自動對焦。值得一提的是，EOS 80D 具有改良版的「色調偵測自動對焦」功能，在單次自動對焦可以自動對焦偵測到的膚色，同時亦可以在 AI SERVO AF 時啟用 Color Tracking 自動對焦，提升其自動對焦的表現。連拍方面，EOS 80D 支持每秒 7 張連續拍攝及每秒 3 張連續靜音拍攝，最高快門速度為 1/8000 秒，而在 Live View 模式下，亦可連續拍攝 5 張相片。
▲ 從以上影片中，你可以看到，EOS 80D 的連拍速度並不算太慢，配合 AI SERVO AF II 自動對焦演算法，能夠追蹤主題進行自動對焦。隨着主體的移動，你可以看到對焦點會不斷改變。不過值得一提的是，80D 的連拍上限大約為 25 張，所以你會發現，連拍到咁上下，會突然間好似慢左落黎咁。相比版主之前試的 Nikon D5 或者 Sony 無反相機 A6300，Canon 80D 的連拍限制相對較多。
▲ 以上是開啟了 AI SERVO AF II 進行連續拍攝時，其中一張相的效果。
Canon EOS 80D 試拍
都係果句，因為場地限制的關係，所以無辦法影到太多的景物，場內有一些模型，版主就利用手上的 Canon EOS 80D 配 EF 100mm f/2.8L Macro IS USM 鏡頭，拍下以下的照片，俾大家睇下大致的效果。另外，版主亦會俾大家睇下其他利用 EOS 80D 所拍的照片，讓大家能夠參考一下。
場內試拍
▲ 鏡頭：EF 100mm f/2.8L Macro IS USM；ISO 值： 800；光圈值：f/5.6；快門速度：1 / 64。
▲ 鏡頭：EF 100mm f/2.8L Macro IS USM；ISO 值： 800；光圈值：f/5.6；快門速度：1 / 125。
▲ 鏡頭：EF 100mm f/2.8L Macro IS USM；ISO 值： 800；光圈值：f/5.6；快門速度：1 / 32。
▲ 鏡頭：EF 100mm f/2.8L Macro IS USM；ISO 值： 800；光圈值：f/5.6；快門速度：1 / 16。
▲ 鏡頭：EF 100mm f/2.8L Macro IS USM；ISO 值： 800；光圈值：f/5.6；快門速度：1 / 20。
更多相片
▲ 鏡頭：EF-S 18-135mm f/2.5-5.6 IS USM；ISO 值： 200；光圈值：f/11.0；快門速度：1 / 320。
▲ 鏡頭：EF-S 18-55mm f/3.5-5.6 IS STM；ISO 值： 400；光圈值：f/5.6；快門速度：1 / 100。
▲ 鏡頭：EF 600mm f/1.4L IS II USM；ISO 值： 200；光圈值：f/5.6；快門速度：1 / 4000。
▲ 鏡頭：EF 70-200mm f/2.8L IS II USM；ISO 值： 400；光圈值：f/4；快門速度：1 / 5000。
小結
初次上手 Canon EOS 80D，雖然起初覺得真係比我自己果部 700D 好好多，曾經有一刻的動搖，不過用落左之後，其實發覺如果你要影靜態的相片的話，其實兩部機並不是差太遠，不過 700D 在 ISO 感光度方面做得唔係咁好，唔可以 tune 得太高 ISO，如果唔係相片質素就會降低，而 80D 的限制就無咁大。但係如果平時需要拍攝動態主體的話，例如一些運動項目，Canon 80D 在這方面的確做得比 700D 好好多，呢點係無可否認的。可惜，版主平時好少會影動態的野，比較中意影下風景或者花草樹木，所以雖然佢在自動對焦方面落左不少苦功，對版主來說，其實作用不大，所以版主都決定暫時繼續用番自己部 700D 先，睇下之後仲有無其他單反可以吸引到我下定決心換機。不知網友們又點睇呢?