大像素!Canon、Nikon 有份!千元價位 DC 仔有無得揀?

2017-12-19 20:09
年年都有傳媒教路請假攻略,想放長假的話,今個聖誕就有得請 3 日放 10 日,由 23/12 放到 1/1,真係版主見到都覺得爽,但可惜這些機會不屬於我......痛哭 有長假,一定有人會去旅行,而有趣的是,一到呢啲日子,版主就變左相機租用戶,突然會好多朋友問我借相機。其實,我有的相機都不過是 cheap 機,有 Casio EX-10、Nikon J4、Canon 760D 同埋一部唔記得乜型號的 Canon DC 仔,要求唔高、想搵部平價大像素旅行 DC 仔,根本千幾蚊已經可以入手,去旅行可以不求人。有乜可以揀?睇下文啦!

大像素!Canon、Nikon 有份!千元價位 DC 仔有無得揀?

除左 Canon 760D 單反之外,版主所有相機都係二千唔使入手,質素唔可以話好「標青」,但要求唔高的話,已經相當夠用。不過,我有果啲相機實在太舊,出面未必再輕易找到,所以呢篇文章會比較集中介紹,近期比較平價的千元相機。


45x 光學變焦,缺點是顯示屏像素低

版主長存家中舖塵的那部 Canon DC 仔,正正就是 SX 系列的相機,不過也許我果部太舊,所以令我對 PowerShot SX 系列 DC 仔印象不太好。不過,今時今日相機質素進步左咁多,就算千幾蚊一部平價相機,都可以影到一些不錯的相片,就好似呢部今年年頭推出的 PowerShot SX430 IS 咁,配備左 1/2.3 吋 CCD 2000 萬像素感光元件,並且支持 45 倍光學變焦防震鏡頭,等效焦距為 24-1080mm,真係由近至遠都可以影得到,算是一個可以考慮的選擇。不過,版主個人對相機顯示屏的像素都有要求,SX430 IS 只有 23 萬像素 3 吋芒,在顯示屏上看會有少許不夠清晰的感覺,會讓我對這部相機大打折扣。不過,想買 SX430 只能購買水貨,水貨價約 $1780,貴又唔算好貴,但會唔會有更好選擇?繼續睇落去!

大像素!Canon、Nikon 有份!千元價位 DC 仔有無得揀?
 


千元相機有防水、防塵、防摔

Fujifilm FinePix XP120 亦是今年年頭推出的產品,現時市面細舖水貨價約 $1200,講真外型就麻麻,至少唔係我鍾意果 Type,不過佢有一個重要的賣點,就係平得黎有 20m 防水、1.75 尺防摔,雖然正常都唔會拎黎浸水,但你話平時落雨呢種情況,你都唔使擔心佢會整濕。Fujifilm FinePix XP120 配備了 1640 萬像素 CMOS 感光元件,具有 3 吋 92 萬點顯示屏,光圈值由 F3.9 - F4.9。

大像素!Canon、Nikon 有份!千元價位 DC 仔有無得揀?
 

同樣賣點為長焦鏡頭,好過 Canon?

近年 Nikon 千元相機選擇並不多,不過如果想買平機的話,去年年初推出的 Nikon Coolpix B500 水貨價 $1600 左右,配備 1602 萬像素感光元件,賣點是支持 40 倍變焦,有 900mm 超遠攝,光圈值介乎 F3.0 - F6.5 之間,最大感光度為 ISO 6400。另外,Coolpix B500 支持 3 吋 92 萬像素反芒,內置 Wi-Fi 、藍牙、NFC 等連接功能,似乎比起同樣玩長焦的 Canon PowerShot SX430 IS 還要有吸引力。

大像素!Canon、Nikon 有份!千元價位 DC 仔有無得揀?
 

【百元機】其實最抵玩平價相機,識玩一定玩佢?

上面介紹左咁多款千元相機,但其實幾百蚊貨仔,一樣可以俾到你不錯的質素!講緊係 HTC RE,大家都係平價機,其實質素上本身都不應抱太大期望,專業影相人士可以略過。但對於普遍要求不太高的用家來說,會唔會 HTC RE 仲好過上面咁多部千元相機呢?有 1600 萬像素鏡頭,係外型騎呢左少少,同埋無芒,要駁手機先可以睇到畫面,但勝在價錢超級平,特別是水貨,$305 就可以入手 (版主見過曾經出現過 $299 添!)。

大像素!Canon、Nikon 有份!千元價位 DC 仔有無得揀?

當然,在網友心目中,可能以上的都不是你的心水,你可能還會有其他更好的選擇。千幾蚊平價相機,網友仲有無乜嘢好建議呢?留言分享下啦!