小米出品唔再抵買?小蟻 Action Camera 抵港炒貴接近 6 成!

2015-03-13 18:11
之前版主 Lawrence 同大家講過,小米都學人出 Action Camera ,而佢地既小蟻 Action Camera 主打都係平價,用 $399 人民幣(約 $500 港幣)就可以買得到。而呢隻運動相機最近已經登陸香港,可惜引入水貨既店家就炒貴接近 60 % ,咁既話都談唔上咩性價比吧?相對於「山狗」佢又有冇優勢呢?版主用文章同大家分析一下。

小米出品唔再抵買?小蟻 Action Camera 抵港炒貴接近 6 成!
 

小蟻運動相機抵港開賣!炒價唔平要 $780 !仲買唔買好?

小蟻運動相機賣點係咩?當然就係平!用 $399 人民幣(約 $500 港幣)的定價買到 1600 萬像素、 f/2.8 大光圈,可以拍攝 1080p@60fps 的運動相機,內置 1010mAh 電池,亦可以外置 64GB 插卡,其實呢個規格比起山狗優勢既就係可以拍到 1080p@60fps 同埋拍到 720p@120fps ,不過廣角只有 150 度相對黎講窄左少少(山狗都有 170 度啦),可以話係有辣有唔辣。

香港已經有鋪引入小蟻運動相機,不過價錢就炒到 $780 港幣,比起 $500 港幣的定價貴左接近 60% ,而呢個價係唔包防水殼,所以要另外選購的價錢。咁樣睇既話,真係買山狗比較划算。就以 SJ5000 Wi-Fi 版黎計,有 1400 萬像素、 2 吋屏幕、拍到 FHD 影片又支援到64GB 卡,街鋪都係賣 $748 ~ $798 ,如果唔需要 Wi-Fi 最低規格的 SH4000 就 $598 有交易,再唔係唔嫌像素低,上次版主講過既 PQI Action Cam 都係賣 $500 有找,都可以拍到 1080p 啊,何必要比炒價去買小米,係咪先?

順帶一提,今日版主收到消息,小蟻運動相機將會進軍台灣市場,價錢亦會和大陸差不多,可惜未有實際的推出時間。網友們覺得香港小米又會唔會引入 $399 人仔的小蟻 Action Cam 呢?

小米出品唔再抵買?小蟻 Action Camera 抵港炒貴接近 6 成!
▲ 有屏幕,有 178 度廣角、同樣影到 1080p 再加埋 Wi-Fi 既 SJ5000 Wi-Fi 版先賣 $798 ,小蟻運動相機都要賣  $780 有點說不過去icon。(如果要買更高規格, SJ5000 Plus 版主就搵唔到,不過都係支援到 1080p/60fps 的)