不需充電、兩種插口! 開箱試玩 ASUS 360°全景相機

YKer 2018-01-07 13:28 | 情報分享
聖誕節總會收禮物,今年版主比左一件「衫碌拎」手機配件本 YK 玩,就係 ASUS 360° Camera 全景攝影機! 詳細的資料我就唔多介紹,版主虎仔都已經有簡單介紹,詳情可以參考呢度。其實 ASUS 呢類「衫碌拎」產品,最好就係唔使額外充電,去 Party 隨手拎出黎就可以影到全景 / 360° 相片,確實唔錯。至於實際效果如何,睇睇下面試玩就知道!

FB.jpg

開箱啦!
包裝盒小巧,與普通手錶盒大小相若,呢款產品只支援 micro-usb 及 type-C 接口,也就是說 iPhone 拜拜啦!ASUS 360° 全景相機(下稱「全景波」)香港行貨定價一千有找,相比起其他同類的產品,價錢叫做可接受範圍內,但產品的用途單一,只係作為 360° 全景相機影相或拍片之用,是否值得就見仁見智。但以送禮的用途黎講,我會覺得是一份很有趣的禮物。 

IMAG3097.jpg IMAG3098.jpg
▲ 盒身寫明四大賣點:全景拍攝, 360°全景直播,即時分享,以及 VR 觀賞。

IMAG3099.jpg
▲ 包裝盒內除了「全景波」之外,仲有兩個轉接頭,分別係 micro-usb to micro-usb,以及 micro-usb to type-C usb,根據不同 Android 手機接口而自行搭配。

IMAG3100.jpg
▲ 「全景波」只有 28g,大小比扭蛋更小;波身兩側各有一個 210° 鏡頭,透過軟件進行合併還原,官方聲稱可以達全方位 720° 視野(我數學唔好,有無高手可以講下點樣計出黎?)。

IMAG3101.jpg
▲ 波身只有一個接口,使用此波無須充電,一插就得。

IMAG3102.jpg IMAG3103.jpg
▲ 輕輕一插,波板糖達成!注意手機需要上下倒轉地使用。

IMAG3104.jpg IMAG3105.jpg
▲ 「全景波」插在手機上其實不完全穩固,所以使用時要小心翼翼,最好「波向上、手機向下」;另外,我建議大家可以購入 10 蚊個的耳機盒作為「全景波」的保護盒。


配合專用 App
市面上絕大部分 360° 全景相機都需要配合專用 App 使用,ASUS 呢款都係。Google Play Store 就有得下載,安裝後插「全景波」落手機就用得喇!

Screenshot_20171222-105802.png
▲ ASUS 呢款「全景波」使用手機電力,玩得多自然會耗電,手機系統會經常提醒你呢件事。 

Screenshot_20171222-105810.png
▲ 如果你手上只有一個「全景波」,建議好似我設定一插就自動開 App 無煩惱。

Screenshot_20171222-105509.png Screenshot_20171222-105517.png
▲ 第一次用就要升級。。。


拍照有趣、影片效果一般
上面的標題正是我對「全景波」的結論,拍片的效果強差人意,不論是光 / 暗的場景,畫面細膩度不足,油畫過油畫,手機睇勉強可以接受,一落電腦睇就不行了。ASUS 官方 App 內置濾鏡,亦設有基本三種觀賞模式:全景、小行星、水晶球。實際體驗後發現,最大問題反而係泛兼容性,也就是要特定 App 才能做出互動預覽,容許你用手指拉黎拉去。更加唔好話要編輯圖片 / 影片,封閉的限制比想像中大,只能講作為玩具是不錯。

P2018_01_07_11_55_38_06.jpg
▲ 呢張相片係直讀手機獲得的版本, 360° 照片 / 影片始終需要特定 App 黎讀取先有趣,唔係下下都係上載到 Facebook,Youtube 先睇到。

vpai20180107120813.jpg
▲ 呢個就係「小行星」模式,有種「小王子」的感覺。

vpai20180107120929.jpg
▲ 呢款係「水晶球」模式,但成品會有黑邊。

vpai20180107121013.jpg
▲呢款係「全景」模式,重點係可以拍攝到對面的女職員,完!


▲ 最後送上一條 2K 解像度( 2048x1024,其實姐係 FHD冒汗 )影片 比大家參考。(請用 Chrome 瀏覽器)

asus360.jpg
▲   ASUS 360 規格,係文章刊登時,於 ASUS HK Store 有售,賣價為 $998。

結論:玩具一件、送禮不錯
以本 YK 多日的體驗來講, ASUS 360°全景相機優點是輕便免差電,隨時抽插就用得,相片畫質還可以,自家 App 玩味十足,但影片畫質我實在難以接受。 而數碼縫合技術仍然未成熟,不論是相片 / 影片,都輕易發現縫接位。我參加幾場年末聚會,都攞出黎同朋友們試玩,一個二個都係嘩嘩聲,對「全景波」非常感興趣,一致認為係有趣的玩意。但即使當佢係一件玩具,定價接近一千大元我認為太進取,卻不失為一件有驚喜的送禮選項。
 

最新新聞