勁平!好癲!$99 買運動相機!跟機有 IP68 防水殼

2021-12-24 18:24
版主曾經有段時間,對運動相機係幾感興趣,但好多時運動相機都唔係平,買咗返嚟又唔知係咪真係會成日用到,所以種種原因令我每次都卻步。除非,賣到好平,咁我可能會買隻玩。$99 夠唔夠平?直澄平到笑啦!見到 $99 有運動相機,仲有埋 IP68 防水殼,我當然都第一時間留貨!想知詳情,睇下文啦!

留意到有網店將 Motorola Verve Cam+ 清貨,只需 $99 就買得到,呢部運動相機係 2017 年推出嘅產物,4 年前叫價都要成千蚊,而家 $99 其實當玩具玩下,都值得,所以我即刻就同店主講:「幫我留一部,唔該!」而問及 $99 嘅 Verve Cam+ 多唔多貨,店主話好多,有成百幾隻,所以應該唔難買到,唔知你又有無興趣呢?

Motorola Verve Cam+ 係一款市面少見用上圓形設計嘅運動相機,重量只有 60g,機身支持 IPX4 防濺水,不過配合埋隨附嘅 IP68 防水殼,就可以支援 30 米水中拍攝。而相機隨咗支持 138 度廣角拍攝,仲可以拍到 2.5K@30fps 以及 1080p@60fps 影片,更具有循環錄影、縮時錄影等功能。電量方面有 600mAh,充滿一次電可以拍到 90 分鐘 2.5K 影片。

購買查詢:K Digital 奇數碼