csl. 六條港鐵線有 5G!年底前覆蓋所有港鐵線

左定坤 (Cho Ting Kwan) 2020-09-30 11:25 | Csl
FB.jpg

5G 網絡已經推出一段時間,唔知有幾多網友已經快人一步玩緊 5G 呢?你又係唔係真係對 5G 非常滿意?相信目前嚟講,答案係否定,收到 5G 地方未夠多,搭地鐵亦好多都未有 5G 覆蓋。繼 SmarTone 六月時公佈過 5G 港鐵覆蓋細節以及時間表,csl. 今日宣佈,會率先喺六條主要港鐵線提供無縫 5G 網絡覆蓋。到底係邊六條,下文再講。

csl 宣佈

csl. 宣佈佢哋嘅 5G 網絡將會喺十月中伸延至超過 50 個港鐵站,喺六條主要港鐵線提供 5G 無縫覆蓋。而果六條港鐵線包括港島線(中環至太古)、荃灣線(中環至葵興)、觀塘線(黃埔至油塘)、將軍澳線(北角至油塘)、東鐵線(旺角東至羅湖)以及屯馬線(啟德至大圍)。無論喺大堂、月台定車廂入面,都一樣可以享用到 5G 的服務。

5G map (Chi).jpg

香港電訊喺呢啲港鐵站部署咗專屬頻譜以及設備提供 5G 服務,提供最好嘅 5G 客戶體驗之餘,佢哋表示仲可以保持 4G 服務水平,呢個部署可以令佢哋喺流動通訊量特別繁忙嘅港鐵入面,確保 csl. 4G 以及 5G 客戶同樣可以上到網。

另外,csl. 亦計劃喺 2020 年底前,逐步伸延其 5G 網絡覆蓋至所有港鐵綫,包括西鐵綫、東涌綫、機場快綫、南港島綫、迪士尼綫及高鐵。
 

最新新聞