SmarTone 用 DSS (ESS) 舖 5G 網嘅觀察

Keith Yim 2020-05-31 16:37 | 數碼通
s-fb.jpg

Intro 都唔寫,直入主題

講講數碼通嘅 5G 網絡

csl. 、3 香港、中國移動香港,開 5G 好依賴新頻譜,係初期都會用 N78 頻段 (當中嘅 3.5GHz) 作傳送。不過,N78 係新頻段,除咗要係現有發射站加裝儀器,因為 N78 (3.5GHz) 比起 現時 3G、4G 嘅頻段都要高,訊號穿透力會比較差,所以要建更多嘅基站去完善。所以, csl. 、3 香港、中國移動香港都集中喺香港嘅黃金地段覆蓋,當然,部份有財力嘅網絡商,如 csl.、中國移動香港,係新界個別位置,係文章發表時,都有 5G 訊號。

N78 + N1 頻段雙覆蓋

其實,數碼通都有自已嘅 N78 頻段,係開 5G 嗰陣,跟其他網絡商做嘅嘢,都差唔多。不過,佢哋就用咗 Ericsson 嘅 Ericsson Spectrum Sharing (ESS) 技術,將本來部份嘅 4G 頻譜,用作 5G 使用。Ericsson Spectrum Sharing (ESS) ,其實係 Ericsson 商用名詞,來自 5G 技術 Dynamic Spectrum Sharing (DSS) 動態頻譜共享。呢個技術係 5G 標準,Nokia、華為、中興都會有自己嘅方案。而 Ericsson 係呢方面係跑前咗好多。SmarTone 就係東南亞地區首個用咗係商用網絡地方,而台灣七月 5G 開台,都會用上呢個技術建網。事實上,我相信,未來 csl、3 香港等都會採用 (佢哋當然會用華為方案啦)。

版主 Keith 係數碼通開 5G 嗰日,其實已大約介紹過 DSS,可 Click 呢度再睇。用咗 DSS  技術,數碼通就可不用加裝太多基站下,4G 變作 5G 使用,目的係用好快嘅方法,加快舖網速度,令更多地方收到 5G。以前一篇分享文,用作比較嘅 csl 5G 為例,數碼通嘅 5G 覆蓋,的確比起 csl 好好多。

DSS 好處

其實,4G 變作 5G 使用,唔會係數碼通嘅專利。今日版主 Keith 測試,發覺 csl. 都係個別位置,有同樣嘅處理。但 csl. 與 SmarTone 做法有乜唔同呢?就係 SmarTone 搶先用咗 DSS,或者 Ericsson 叫作 ESS 嘅技術:4G 與 5G 會共用某一段頻段頻譜。

比較過 csl 跟 SmarTone,佢哋兩個都用上本來用作 4G 網絡嘅 N1 (即 4G 嘅 B1,2100MHz 頻段),改作 5G 網絡。但 csl. 夾硬把 10MHz 撥作 5G,呢 10MHz 4G 用家無法採用。而數碼通將 15MHz 撥作 5G,但 DSS (ESS) 技術下,4G 嘅用家,係同一時間都會用得到呢 15MHz 收 4G 網絡。

z01.jpg
▲ csl 係旺角呢個位置,用咗 N1 做 5G,但得 10MHz。 

不過,熟香港網絡運作嘅網友,都知道 csl 嘅 4.5G 網絡,其實全力用 B3(1800) + B7 (2600) 建網,佢哋有嘅 B1 (2100) 都係用於 3G 網絡為主,現時相信超過九成嘅手機都支援 4G,就算佢哋家陣打算轉咗 10MHz 做 5G, 都唔會對用家有太大影響,所以未必要咁快行 DSS,單單切走 10MHz 做 5G 就得,餘下給予 3G 都應該夠。3 香港就麻煩啦,佢哋跟數碼通一樣,無 N79 (4.9GHz) 頻段。係 5G 結界(大埔、馬鞍山等地),唔用 N1 (2100) 做 5G,就等於放棄咗好多 5G 覆蓋。但華為 DSS 方案未 Ready,佢夾硬拆走部份 B1 用作 4G / 3G 資源做 5G,真係大埔有 5G,4G 大件事。

數碼通慢慢開 N78 

數碼通 5G 一樣有用 N78 (3.5G) 頻段。不過,今日由大欖隧道,再坐巴士出旺角,真係行到去 The Forest 商場附近條街,先見到有 N78 頻段覆蓋。其餘我去過嘅地方,包括朗豪坊五樓、大欖隧道轉車站附近、坐巴士途中嘅屯門公路,西九龍幹線等、天水圍等,數碼通都會用 N1 頻段作覆蓋。

N78 嘅 5G,先係速度快嘅 5G 

N78 與 N1 頻段嘅 5G 覆蓋最大分別係邊?N78 即 3.5GHz 頻段,以數碼通來講,係我哋測試上睇到,先用上 40MHz 作通道,而 N1 會用上 15MHz 作通道。要明白,好簡單。40MHz 數字上,大過 15MHz,條水管大D,可以谷出來嘅水多 D。係 5G 上面來講,即係行 N78 嘅 5G 比起行 N1 嘅 5G 速度都會快D。所以,就算自已比自己,數碼通有 N78 覆蓋嘅地方,事實上比起 N1 覆蓋嘅地方,係 Speedtest 測試速度上,都會快好多。

DSS 有無影響到 4G?

SmarTone 用 DSS 以 N1 (2100) 頻段作 5G 覆蓋,而 N1 即係 4G 網絡嘅 B1 (2100) ,兩者係共用嘅。雖然話用上軟件,加上算法,去調控 5G 與 4G 嘅實時用量,用開 4G 嘅用家,唔會少咗好多資源,但經過觀察,你用緊 SmarTone 5G,記住要用番 5G 手機,跌咗落 4G ,上網效能,會差過未升級 5G 嗰陣。

以我屋企為例,位置是市郊,離發射站位置都遠,一向係屋裡面,以我部 Samsung Galaxy S20+ 來講,未有 5G 之前,4G 組合係咁嘅

B1 (2100) 15MHz 做主頻,用 CA (Carrier Aggregation) 載波聚合再加入 B3 (1800) 10MHz 及 B8 (900) 5MHz。

==> 呢個共有 30MHz 頻寬嘅組合,係非繁忙時間,上網下載速度,接近 100Mbps。

(我同時有一張 3HK Net+ 嘅 SIM 卡。3HK 嘅 CA 組合係最誇張,可以做到集合 B1, B3, B7, B8, B40,非繁忙時間,上網下載速度,真係過 100Mbps 架。)

但係升咗上去 5G,就麻煩了,我屋企嘅 N1 (2100) 5G 唔係收得好好。當佢自動跌落去,或者手手動轉落去4G 嗰陣,個頻段組合會變咗咁: 

B8 (900) 5MHz 做主頻,用 CA (Carrier Aggregation) 載波聚合再加入 B3 (1800) 10MHz,得番 15MHz 頻寬。

==> 呢個轉變有乜影響?我用咗 5G Plan,而我係屋企改為 4.5G 嘅話,係非繁忙時間,速度會跌得好勁!最多得番 20Mbps 左右... 若果 B8 主頻,拖唔住條 B3 ,個刻就只享用 5MHz 頻寬嘅速度,其實同 3G 無分別。若果我轉咗部不支援 CA 嘅手機,例如我最近玩開嘅 Nokia 5.3 (click 呢度有評測) ,就大件事,佢會長期 Lock 住係 B8 頻段....有 4G,但上網速度慢如 3G。

未升級 5G 影響不大

與此同時,版主有另外一張 SmarTone 嘅儲值卡,只有 4G 無 5G。我發覺,數碼通系統會識別到你係咪 5G 用戶,係用 4G 嗰陣,上面講嘅 CA 組合改變,成個 B1 會消失咗嘅現像,係唔會係你未升級 5G 嘅情況下出現。

所以,數碼通嘅 DSS 技術舖 5G 對現時嘅 4.5G 手機有無影響?其實係無嘅,有都唔係好顯著。反而,5G 用戶會用少咗 4G 嘅資源。所以,你上咗 5G Plan,最好都係用番 5G 手機啦!

z03.jpg 
▲ SmarTone 嘅 N1 頻段 5G,由 B8 (900) 嘅 4G 帶住。當番落去 4G,亦會變咗 B8 做主頻,有 5MHz。好采嘅話,夾到 B7 (2600) + B3 (1800) , 10MHz + 10MHz 做 CA,總共 25MHz 令 4G 上網,不致太慢。但數碼通嘅 B7 唔算全網都有,室內亦比較難收,無咗 B7 做 CA,變返 15MHz 做 4G,咁上網就唔會好快架啦。

值唔值得家陣升級

咁 SmarTone 嘅 5G 仲值唔值得家陣升級?首先,若果你覺得 21mbps 無限上網,或者年卡已夠用 (假設你係高用量),或者 5G 手機選擇少,揀唔落手,其實唔駛再討論,無論任何一個台嘅 5G 都唔駛考慮。

若你住係市區,OK 嘅。上面講到 SmarTone 嘅 DSS 建網,5G 用戶變返 4G 嘅影響,其實,我係市區測試,佢哋 4.5G CA 架構,會加到多一層 B7 (2600) 上去,會令你嘅上網速度,不會太慢。

另外,好視乎你去開嘅地方,收到幾強嘅 N78 (3.5G) 或 N1 (2100) 訊號,收得強,速度係快嘅。

SmarTone  5G :  月費 $399 + $18 (行政費) 即係 $417 有 100GB 數據
SmarTone  4G :  月費 $268 + $58 (無限上網) 即係 $326 有 18GB 數據 + FUP  無限上網不限速

首先,我當 100GB 數據已係無限上網,因為都幾難用得晒,除非鬥氣不停狂 download。$326 vs $417 即係畀多 $91,有得用 5G,睇完試玩報告,睇埋我嘅觀察,係呢個時候值唔值咁樣升級?大家可以唸唸。

按呢度有 Speedtest 結果

最新新聞