數碼通 ValueGB 年卡加入 MNP！最平 $70 起 萬能卡以外好選擇？

左定坤 (Cho Ting Kwan) 2021-08-17 20:36 | 數碼通

相信有唔少人都會選擇用年卡，而每個人用年卡嘅目的都唔同，好似版主我咁，因為本身仲有另一個號碼係 CMHK 嘅無限數據 Plan，所以主號碼其實唔用數據都得，所以我就將主號碼 MNP 攜號轉台去 Lucky SIM 最平個年卡 Plan，當係養號碼，然後放落一卡兩號嘅手機，同無限數據 Plan 一齊用。而有其他人就同我相反，會將年卡當成後備卡，因為一年畀一次錢又都算好多數據，計返都係抵玩。一直以嚟，有得 MNP 嘅年卡主要有 3HK 萬能卡、Lucky SIM、鴨聊佳，最近終於連數碼通 ValueGB 年卡，都有得 MNP，最平 $70 起又用唔用得過呢？



咁多年一直以嚟都無得 MNP 攜號轉台嘅數碼通 ValueGB 年卡，最近終於都有得 MNP 喇！呢個消息對於想平用數碼通網絡，又想帶埋號碼過去嘅人嚟講，呢個消息都算係一個好消息，起碼叫做多個選擇！

不過，有一個重要嘅點，大家一定要注意，就係呢張 ValueGB 儲值卡，暫時只係接受所有儲值卡卡款轉台，包括數碼通自己儲值卡 (外傭卡唔包)，而如果你係上台客戶，就暫時唔接受轉台，所以如果你想轉去 ValueGB？你要先 MNP 咗去儲值卡先，例如 3HK 萬能卡，然後再等半個月至一個月左右過冷河，之後轉去 ValueGB 儲值卡，呢點可能會麻煩咗。或者嫌麻煩嘅，大家都可以等下嘅，我估計只係程序上問題，過多一排就可以上台卡上台，好似 So SIM 咁。

至於 ValueGB 現時有乜嘢年卡選擇呢？包括有：
 

組合	價錢
5GB + 2000 分鐘	$70
40GB + 2000 分鐘	$120
70GB + 2000 分鐘	$160
100GB + 3000 分鐘	$200

咁數碼通 ValueGB 係咪 3HK 萬能卡以外嘅好選擇呢？只能講，每個網絡商都有各自嘅 Fans，或者都要視乎你所在嘅地區，有啲地區呢個台收得好啲，有啲地區呢個台收得無咁好，所以好睇你平時用慣乜嘢網絡商。而如果對比 3HK 萬能卡同埋鴨聊佳嘅價錢，下面兩幅圖都可以畀大家參考一下嘅：