上年我就親自飛去英國買 Pixel 4 嘅，今年因為疫情無得飛，過往買機都要 Amazon 買機，通當常就美國 Amazon 會相對平，但今年就畀我發現英國 Amazon 有得買 Pixel 5 之餘兼有得送去外國，如果你有喺歐洲網購就會明，只要寄件地不在 EU/ EAA 境內就唔洗畀 VAT，變相我係唔洗畀稅就可以買機，運費方面 International economy 就約 13 鎊一部機，而 International priority 則約 23 鎊一部，但我只要改到買 3 部機（每人可買嘅限額），只係 26 鎊三部機，我諗都無諗就買咗三部落嚟，再搵兩個朋友夾，反正總有 Pixel fans 喺香港。平均一部機都係 508 鎊左右，10月15日就送貨（事實上14日已經開始出緊 waybill）用 DHL 幾日就到香港。去到 10 月 19 日上午，已經收到一個包裹，入面就係自己期待咗好多日嘅 Pixel 5 到香港，雖然得黑色又無某水貨舖咁快，咁嘅價錢都無咩投訴。
同上一代 Pixel 4 相比，佢細盒好多，同 iPhone 一樣需要縮細 Size 滿足全球物流緊張嘅問題，不過都見到佢跟配件幾齊。
打開個盒，一部機一個叉電器一個 USB-C to USB-C 嘅線同埋一個 USB-A to USB-C 嘅轉換頭，而跟機叉電器係 18W 快叉。
拎起上手，發現就係拎住 Pixel 4a 咁手感，唔同上代 Pixel 4 用嘅玻璃，上手係無咁滑，而且都感覺無咁「最手」。
今代唔係用面容解鎖啦，回歸用指紋解鎖，喺 2020 年口罩年代嚟講，係絕對方便。鏡頭就唔係用長焦，用更有用嘅廣角鏡。
相機表現
Pixel 電話一定係講佢嘅影相，Google 最出名就係 AI 相機，有別過往有獨立嘅晶片處理，今代回歸到 CPU 處理，但科技進步，今代嘅 CPU 係有能力處理到相機成像嘅。今代用緊嘅係 1200 萬像素嘅主鏡頭，放棄咗 1600 萬像素嘅長焦鏡，用嘅係更加容易用到嘅廣角鏡，諗起對上一部廣角鏡機係 LG G5，隔咁多年又用返。講真，我用 Pixel 4 嗰陣都好少用到佢嘅長焦鏡功能，真係需要嗰陣我已經拎咗部大機嚟影。唔講咁多，先睇佢嘅成像。
正常同廣角就會係咁
[ImageCompare][/ImageCompare]
最後想講返幾樣 Google「Cut功能」嘅嘢。
1：CPU 唔係用 Flagship
今代 Pixel 5 對我嚟講，我都有少少心理唔平衡，一嚟佢唔係用旗艦嘅 S865 嘅 CPU 而係用 765G，可能佢覺得正常人係幾足夠嘅，如果只係上吓 Social media 覆吓人 message 係幾夠用嘅，但去到一年幾後就唔知會點，呢個我都答唔到。
2：Motion Sense 懸浮手勢操作及臉部辨識
其實我用 Pixel 4 頭幾日都有玩過吓 Motion Sense 嘅，但同 HTC Edge Sense 一樣，真係當有個新功能就算，係咪成日好用到我就唔係，起馬我之後一直都無用到。嚟到 Pixel 5 就已經無埋soli 雷達，好正常嘅事。
3：無支援 8K 攝影
其實 8K 手機拍攝對我嚟講都係一個賣點多，如果用返好現實嘅角度去諗，我會話 4K 已經好足夠，當年 2020 年係用 4K 係好夠，如果我真係要拍 8K 片我應該拎返部大機出嚟。有用就真係幾好用，我會更著重出嚟成像，例如吸光控制 noise 等等多過數字上嘅追求。
4：無咗 Neural Core
如果 Pixel 2 嗰陣需要係幾合理，不過 2020 年似乎可以用 CPU 處理，睇嚟今代就係無 Neural Core 嘅試驗，但我用落去又差別唔大。
總結
最後我都係唔會跑分吧，始終用緊 765G 嘅 CPU 同埋 8GB Ram 大家都心裏有數，家陣部機用得順，而功能係好適合我工作需要嘅，我已經好足夠，唔同幾年前好鐘意追 Top 嘅 spec，去到 2020 年睇到 Flagship CPU 同埋消費級嘅 CPU 手機嘅實際使用感覺差距唔係好大。我見到朋友用 Pixel 4a 都好開心，而我仲會選擇 Pixel 5 一嚟都係想用佢嘅 5G 同埋想要返一部一手掌握嘅電話。嚟緊我都會講返佢嘅續航力。有別香港主流嘅傳媒，我鐘意用嘅係 Pixel 機多，功能太多對我嚟講無用，但有 Google 嘅保安升級對於香港人嚟講都幾緊要，私隱係一件無價寶。
最後提一提大家 Pixel 5 暫時不支援香港 5G 網絡。