上手舒服、質感提升
今次上手玩既係全白色版，正、背面玻璃都用上白色，令手指紋不容易被察覺，而中框係銀色金屬框架。市面上極少採用雙面玻璃加金屬框既組合，而且我體驗是，小米 Note 使用既 2.5D + 3D 玻璃和金屬框造工可以匹敵國際品牌大廠，甚至抽贏韓國塑膠旗艦啦！ 揸落冰冷又舒服，5.7 吋屏幕亦能夠做到一手輕鬆揸機，而且完全沒有刮手的問題。撇除小米品牌既偏見，不得不稱讚手機既選材和造工屬於頂級手機之一！
▲ 小米 Note 採用窄邊框設計，令屏佔望落相當高，而且機身亦做到窄身少少。
▲ 擁有 5.7 吋芒黎講，呢個機身唔到 7mm 厚算細，我只係一個普通男人咋，單手都無難到；背面設計非常令我滿意，點解？ 因為夠簡潔，無嗮一堆標誌文字，只有「MI」字樣咋！
▲ 屏幕下方既三天王會發光，最左邊既多工按鍵，長按會變成選單鍵；底部有喇叭孔，同標準既 Micro-USB 接口。
▲ 右側金屬音量鍵和電源鍵反饋清脆明確，而左側既雙卡插槽係一大一細既 nano-SIM 和 micro-SIM，支援雙打雙待 4G 切換；頂部當然有 3.5mm 耳機插孔，大家也會見到頂部底部都有兩條白色短短既天線訊號位，加上兩側修窄既設計，好有 Note 4 既感覺。
▲ 擁有 F/2.0 大光圈 1300 萬像素 OIS 主鏡頭，以及雙色補光燈，下面會有詳細試相片。
陽光屏加持 5.7 吋大芒靚
點解我係開首既時候話，小米引入標配版小米 Note 係正確選擇呢？ 其中一個原因係，如果你對規格無追求，手機用 2K 芒真心無太大必要，唔係個個都有咁精密既眼掛！
▲ 一黎我就攞個大燈射住部機，大家見到畫面內既 icons 都清楚睇到，但接近光源既部分就都係唔太望到，但整體表現已經好過大部分旗艦手機。當然面對猛烈太陽，個芒點光都好難同太陽鬥。
▲ 可視角度方面大家有眼睇，真心非常好，邊個角度望落去都無明顯偏色情況！ 而且呢個係 FHD 芒，當然比 2K 芒省電好多啦！
▲ 抗眩光方面，小米 Note 表現符合預期，室外光亂入既情況下，畫面仍算清楚可見。
S801 效能夠嗮日常玩機
最多網友嫌棄港版小米 Note 用 S801，希望引入頂配版既 S810。但我的經驗是，目前連大廠都未能完美駕馭呢粒「噴火龍」，雖然小米有另外加設散熱片，但 S810 遊戲八核全開下仍然逃不了發熱問題，如果係日常玩遊戲、聽歌睇片上網既操作，其實 S801 已經夠玩架啦！
▲ 安兔兔跑分有 47236 分，符合 S801 水平；處理器既然係 32-bit，系統方面就當然係 32-bit 既 Android 4.4.4；64GB 版本既港行小米 Note，實際容量有大約 53GB 左右，無得插卡都夠用啦！
▲ Vellamo 瀏覽器跑分有 4192；金屬得分係 1419；多核分數有 1563。說明在瀏覽網頁，以及處理器核心效能都有著高水準既表現，勝任絕大部分既手機工作。
▲ Basemark ES 2.0 Taiji 既圖像跑分結果，理所當然攞到接近滿分既 58.52fps，代表絕大部分既高圖像要求遊戲都順暢運行！
▲ 用上 S801 當然無發熱問題啦。CPU-Z 檢測顯示，跑完幾個效能測試軟件後，小米 Note 溫度都唔過 50 度，而我手掌未能感受明顯既熱力。
相機小測試
發布會上最令小米方面自豪既係個鏡頭，同 iPhone 6 會突出既鏡頭相比，小米聲稱維持質素同光學防震既同時將個鏡頭鏟平左！ 美學角度黎睇，iPhone 6 個鏡頭真係好醜。但如果只係為左美學而整平個鏡頭，港版小米 Note 究竟係影相方面表現又如何呢？ 1300 萬像素 f/2.0 大光圈配 OIS 功能，個人覺得成像方面並無令我驚艷既地方，測光和色溫大部分時間都是準確，而相片質素亦能滿足日常用途有餘架啦！ 而前鏡頭採用 Ultrapixel 技術，姐係 HTC 手機果種，我回應一位網友要求，為他尋找出「米女」自拍照作前鏡頭測試。
總結：品牌係心裡關口
小米 Note 既造工不得不承認已經達到了世界最高水平之一，而且在外觀設計、用料質感甚至比部分國際大廠更為大膽。而且在 S810 熱潮下，標配版既 S801 和省電 FHD 屏幕明顯是更佳既選擇。而目前 5.7 吋左右既選擇並不多，有 2K 芒 S801 既 LG G3，Oppo Find 7a 和 OnePlus One，平均價錢比小米 Note 平少少，但小米 Note 港行係 64GB 版本，加上其他對手都係塑膠機身為主，上手質感我覺得差過小米 Note，咁樣又好難比較。
但最重要既一點係，從網友既反應可見，小米 Note 港行既入手心裡關口，並非在於產品方面，而係過往小米主打性價比，令大眾牢固印上一個「小米 = 廉價」既形象，賣價稍微高多少少就令網友大為不滿，這也屬正常狀況。我在小米 Note 的使用體驗中，對這款產品既硬件評價是非常高，可以說頂得住一線廠旗艦機；但 MIUI 既操作語言有別於公版 Android，而且也加入了不少自家軟件，是否好用就見仁見智。
補充一點，係小米 Note 有樣主打既 HiFi 晶片，小弟因時間和技術既關係，難以做到相關既測試。但插入耳機後，有加入獨立晶片既小米 Note 聲底比其他手機是有明顯既提升，還原度確實比較高！ 但至於是否達到各位網友「 HiFi 耳」既要求就好難講，Sound Profile 呢樣野真係各有各說。 仲有一樣要提提大家，如果你有中港 4G 需要既話，小米 Note 香港版並不支援中國移動內地既 TDD-LTE 網絡。
各位網友，你地對小米 Note 港版有無野要問？ 又或者講下對呢件產品既軟件、硬件有咩睇法啦！ 一齊討論下啦！ BTW，果位求米女圖既網友，上面令你滿意嗎
？ 小米 Note 標配版 64GB 在文章發表時，售價為 $2999，詳細規格和發售資訊請參考這裡。
