料 2019 首季推出,八達通 O!ePay 可支援 Apple Pay?

左定坤 (Cho Ting Kwan) 2018-12-19 18:28 | 科技新知
八達通卡有限公司今日舉行了發佈會,除了宣佈八達通 App 出現了新界面,加入一些新功能 (如可毋須依賴 NFC 查閱過去 3 個月八達通消費紀錄),並且當政府在 1 月 1 日正式實行「公共交通費用補貼計劃」後,可以透過 O! ePay 八達通 App 領取補貼金額,並同時透露了一些他們的未來動向:2019 首季他們會有新搞作,或者會令 O! ePay 可支援 Apple Pay?

八達通(Facebook).jpg

其實是咁的,八達通卡有限公司透露,預計將於 2019 年第一季,推出虛擬 Mastercard,讓 O! ePay 用戶在網購時更加方便。玩法估計是這樣的,例如當你網上購物時,選擇 Mastercard 付款,好似平時般輸入你的信用卡號碼等資料,然後就會直接在 O! ePay 帳戶內扣數。當然,話明係預付卡,你唔入錢落 O! ePay,就扣唔到數,扣唔到數就消費唔到,就係咁簡單。簡單來說,玩法就有少少類似 Tap & Go 吧。

咁既然八達通會推出虛擬 Mastercard,咁係咪代表可以好似一般 VISA / Mastercard 咁,放上 Apple Pay 度用呢?理論上係做到,但實際上未必。有虛擬 Mastercard 都唔代表可以放到上 Apple Pay,就好似之前 Tap & Go 張 Mastercard,都要搞咗一段時間先得,而 Tap & Go 張銀聯就到而家都未上到 Apple Pay。所以,最終八達通推出果張虛擬 Mastercard,係咪可以上到 Apple Pay 呢?暫時只能說是有這種可能性。不過咁,如果最終可以做到呢點,對於網友來說又係咪好消息呢?留言講下啦!
 

最新新聞