配件一覽
碳纖筆電其實之前有其他廠用緊，但只係得部分位置用，因為技術唔夠班、以及成本太高昂。 但日本匠人精神真係不得了，VAIO Z 直接比到 4 面全機體碳纖材料，碳纖維的特性是強韌和輕巧，揸落去好似塑膠版咁，但韌度強度卻異常地高，超級跑車所採用的碳纖外殼亦係同類物料。 普通版 VAIO Z 會用黑色塗層掩蓋住碳纖物料獨特的紋路，只有在香港版 SIGNATURE EDITION 上才能見到若隱若現的 CARBON FIBER 碳紋。
▲ 真機登場！ 已可用肉眼見到隱若的碳纖紋路，配件上有一組 USB-C 充電火牛。
▲ 充電火牛提及相當細小，同一般手機用火牛無太大區別。
▲ 火牛支持 5V/3A、9V/3A、15V/3A、20V、3.25A 四種輸出模式，支持最高 65W PD 快充模式，號稱最快 60 分鐘充 7 成電。
▲ 你睇個 USB-C 接頭造工相當紮實，又粗又厚令人相當安心。
▲ 標準可拆式電源線，可以自行更換成更短的三腳插線，更方便外出公幹時攜帶。
機身外觀
▲ 再望真多次，VAIO Z SIGNATURE EDITION 係擁有天然碳纖堆疊的紋路，每一部機的紋路都不同。根據 VAIO 官方介紹縱橫交錯的碳纖維堆疊成型，並亦 3D 立體成型方式一塊過建立出轉角、彎曲位等。所以，機體本身通過軍規級耐用測試，高度達到一米跌落都機體依然能運作。
▲ VAIO 的日本製造工藝，除了是精密可靠的代名詞之外，更重要係設計實用，實而不華係商務機應有的設計元素。
▲ 碳纖維其實係會阻礙天線信號收發，所以頂部留空左一條寬厚的信號位，確保 VAIO Z 的無線網絡受到最少的干擾。
▲ 機身底部一樣都係碳纖殼，佈滿最簡單的十字螺絲，對於快速維修 / 自己維修黎講係一大好處（當然無人希望要用到維修服務啦 ~）。
▲ 機身底部除了螺絲穩固之外，亦用上類「入榫」卡位的方式，並加一條防滑膠。
▲ 機身前沿有左右兩個外放喇叭，獲得 Dolby Audio 加持。
▲ 全新設計的轉賬位置配備一條防滑膠。
▲ 香港版暫時未見有 Cellular 版，但 SIM 位就已預留好，唔知之後有無得加錢升級呢？
▲ 機身角落位可以見到碳纖底蓋 3D 立體成型的實際效果。
▲ VAIO Z 最獨特之處，肯定係呢塊斜面金屬塊； 從幾何結構上黎睇，呢個斜面係會有助加強碳纖維結構的硬度； 碳纖維物流如果係平面板塊，會因為韌性大而容易彎曲，但如果塑造成立體，有菱角有彎曲位的話，就會變成強結構立體。呢塊金屬塊本身裝飾用途為主，但下面的斜面先具備實際用途。
▲ 金屬塊的末端仲有一粒小小軟膠，係揭開個芒時，屏幕外殼邊沿和桌面的接觸點。
▲ 從檯面上攞起部 VAIO Z 會比其他筆電更輕鬆容易，因為VAIO 特意將機身後方整成倒梯形立體，四隻手指就有空間伸入去，配合大拇指更穩固地抓起機身。 「有個位比你一抽就攞得起」，亦體驗日本人玩實用設計的細緻認真程度。
▲ 機身最薄的部分只有 12.2mm 厚度，而 VAIO Z 的重點大約是 1kg 左右，視乎個別型號，我手上這部頂規版實測重量是 1.017 公斤，咁樣的性能配置下絕對係相當輕巧。
▲ 機身左側有用安全鎖孔、USB-C Thunderbolt 4 接口（支持 USB PD 充電）、 3.5mm Combo Jack 接口。
▲ 右側擁有 HDMI 輸出，另一個 USB-C Thunderbolt 4 接口（同樣支持 USB PD 充電）。
▲ VAIO Z 特殊設計的散熱方案中，左右兩側皆是出風口，雙風扇三熱導管設計，將風從機體後方抽入，再帶走廢熱從左右散出； 所以，提醒大家一個電腦應用小知識，如果你正在進行高熱量的性能操作，聽到風扇呼呼聲的話，記得將充電線擺放好，軟膠電線不能對正出風口喔 ~
▲ 半開合狀態下的 VAIO Z 轉軸下沉，亦可以形成鍵盤傾斜度，令打字過程更舒服。
▲ 全新設計的大幅度下沉式轉軸，支持 180 度的全開合角度，絕對是商務機必備的設計，但一般極少在輕薄筆電上看得到。
▲ 真打平狀態就係咁，開合幅度咁大的話，方便我訓係床到擱住部筆電黎開工。
內部佈局
▲ VAIO Z 的 B 蓋和 C 蓋都係用碳纖維物料製成。
▲ 鍵盤佈局同以前一模一樣，但鍵程深度增加提高輸入時的穩定性，而鍵帽塗層亦改良左，提供更佳的觸感。
▲ 官方亦表示鍵帽上的字刻是重新設計過獨有的日系風格字體，我估計要對美學相當有研究的設計師先會感受到當中的差異。
▲ 大型固定式觸控板塗層相當順滑，而且操作精準無飄移，左右實體按鍵亦獲得保留，確保快速點擊和操作能夠準確無誤。
▲ 深灰色的「VAIO」標誌低調務實，完全 FIT 晒我一貫的作風 ~
▲ 鍵帽之間的距離、觸控板的擺放都相當合理，本 YK 的大手掌亦不會覺得有任何難適應之處。
▲ VAIO Z 重點係採用 H 尾綴的處理器，代表性能比一般超輕薄筆電強大。
▲ 一塊 14 吋 4K 3840 X 2160 的 16:9 HDR 屏幕，仲要係防反光磨砂面！ 你睇我上面左右打爆燈都只係見到少少光暈咋； 呢塊屏幕覆蓋 99.8% DCI-P3 色域，而且支持節能刷新技術，會比一般 4K 屏幕省電。
▲ 支持 Windows Hello 登入的 200 萬像素視像會議鏡頭，左右兩個收音孔位置食到正，確保開會時對方能夠聽到你清晰的發言。
▲ 另一個商務機必備的功能：實體 CAM 擋板，唔用的時候就直接推擋板把視像鏡頭完全擋住，杜絕比人偷偷開你 CAM 偷睇你的風險。
▲ 實體 CAM BLOCK 配合實體收音咪開關，VAIO Z 有埋指示燈就更清楚。
▲ 左右窄邊框的設計，但留意碳纖維縫接位係會有少許不平整，根據官網提示屬於正常碳纖維物料的特性。
▲ 值得稱讚係 VAIO Z 沒有過份追求四窄邊潮流，反而保留頂邊粗 BAR 的做法，好處是能強化邊框的堅固度及留空間保證信號接收的良好。
▲ 呢個電源鍵有小玄機，佢同時都係一個指紋識別器！ 你估唔到掛，因為個樣完全唔似。
▲ 更令我驚訝的是，電源鍵綠燈有一個相當貼心的設計；綠燈做了傾斜面，意味住平時用戶工作視覺只會見到淡淡窄窄一條綠線，不會見到大面積綠燈而影響注意力。 個情況就好似你入戲院睇戲，設計差的戲院「EXIT」燈好好光，影響你睇片的注意力一樣。
各項性能測試
性能絕對係 VAIO Z 的賣點，在同屬輕薄機類別中，佢敢於採用 H 尾綴的高性能 i7 移動晶片，意味住對於散熱的設計、供電的穩定都有更高的要求。 而作為旗艦機，除了處理器性能要強之外，其他的規格亦不能馬虎，VAIO Z 港行版頂級配置有 32GB RAM 和 2TB SSD，Ultrabook 可以剪片的傳說睇黎可以由 VAIO Z 黎展開。 咁當然，咁薄咁輕的機身，無可能再加入獨立顯示卡，而 11 代 Intel 的 GPU 單元亦以高性能做賣點。
規格一覽
▲ VAIO Z 所採用的是 Intel 第 11 代採用 10nm SuperFin 制程的 i7-11375H 四核心八線程處理器，Intel 官網列明最高可達到 5GHz 超高頻，亦擁有 12MB 快取記憶體；而 VAIO Z 呢款處理器屬於 35W 高性能版，並非 28W 的閹割版。
▲ 內置 32GB LPDDR4x 記憶體，而根據 CPU-Z 所顯示是四通道模式。
▲ 全新的 Intel Iris Xe 核顯單元，在 i7-11375H 身上跟其他版本的 i7 有沒有性能上的額外優勢呢？
▲ 主機板廠商是 VAIO 自己搞翻，而 BIOS 就交比 Phoenix 公司去製作。
開機速度
▲ 開機需要 11 秒才完成系統啟動，再過 15 秒時間就完成載入，一般而言 30 秒內完成整個啟動都算快速。
綜合性能
▲ 在 Novabench 綜合性能測試中，VAIO Z 獲得 2436 分，對比我最近測試過的一部 i7-1165G7 筆電，VAIO Z 分數都係擁有絕對優勢，四個項目得分各自領先 10% - 25% 左右。
SSD 測試
▲ 呢個 NVMe SSD 的代碼應該就是三星首款 PCIe Gen 4 的 OEM 版 PM9A1 固態硬碟；聽聞是 980 PRO 的 OEM 版本，主控晶片是一樣的。
▲ 在連續讀寫結果中，VAIO Z 獲得 4538mB/s 和 4561mB/s 的成績；而多工隨機讀寫 （4K Q32T1）達 369mB/s 和 503mB/s 速度；對比起 Gen 3 速度當然快，如果對比零售版的 980 PRO 似乎速度上還有一些距離。 但讀寫速度上到幾千 mB/s 基本上你都分唔到個差距，我會寧願選擇重視溫度控制。
CPU 處理器性能
重頭戲黎了，到底 VAIO Z 所搭載的 11 代 i7-11375H 性能係咪真係如官方所講咁強大呢？ 同普通版 i7 （例如 i7-1165G7）比較又有幾大優勢？ 最重要係，VAIO Z 普通模式，性能模式下的差異又有幾多呢？ 處理器性能測試當然要用 Cinebench R23 黎實測喇！
▲ 一般模式下在 Cinebench R23 版測試中，VAIO Z 的 i7-11375H 單核心獲得 1475 分，就咁睇係差過 i7-1165G7 的 28W 版。
▲ 而多核心表現獲得 5976 分，分數超過 i7-1165G7 的 28W 版近 1000 分； 但咁樣的結果，我覺得只係贏得好險。 一旦 VAIO Z 面對突如其來的 High Demanding 的工作時，例如剪片、跑程式，性能無人會嫌多。
▲ 高性能模式下在 Cinebench R23 版測試中，VAIO Z 的 i7-11375H 單核心獲得 1560 分，立刻恢復應有的水平。
▲ 而多核心表現更獲得 6181 分，拋離晒 i7-1165G7 28W 版，實在驚人； 當然，一旦開啟高性能模式，處理器被 CHUR 盡的話，散熱風扇都會呼呼作響，缺點係嘈，但短暫的嘈可以保證高火力輸出，更快完成你手頭上的工作，亦確保 VAIO Z 不會因為過熱而降低處理器工作效率。 十足動畫高達裡面的「爆 Seed」或者「Trans-Am」模式 ~
GPU 圖像處理性能
▲ 在 Basemark GPU 標準測試的 4K Vulkan 1.0 測試中得到 1600 分；對比以前的 UHD 核顯自然拋離幾倍；更重要係證明左 Nvidia 萬年入門顯卡可以收埋了，放多舊野但圖像處理性能無優勢， Iris Xe 核顯性能足夠有餘。
▲ 而在 4K DirectX 12 測試中獲得亦 1417 分， i7-11375H 的 Iris Xe 核顯得益於主頻率較高，所以測試結果亦比 i7-1165G7 28W 版好。
電力續航測試
▲ 檢測軟件顯示電池生產商係 VAIO 自家出品，官方宣稱內建 53Whr 大電量； 雖然官方發佈會寫最高 34 小時續航力，但明眼人都知道這個是文書工作才有可能達到的續航時間。 畢竟強大的處理器，耗電是必然的事實。
▲ 果然，係 Full Load 測試只能跑出 2 小時的續航力，意味住如果你真係有辦法 CHUR 盡 VAIO Z 的極限性能，那麼你最少也會有 2 個小時可用。
▲ 而利用 Chrome 做播放指定的 720p 解析度 Youtube 影片恆常測試中（亮度最暗、WiFi 附近）； 過了 62 分鐘後 VAIO 還有 90% 電量，也就是說可以連續觀看 Youtube 10 小時，而這個數值跟外國 VAIO 官方聲稱的 10.5 小時吻合。
總結
截稿時 VAIO HK 的官網上依然是預購狀態，SIGNATURE BLACK 顏色的碳纖紋路版本，給你最高容量的 RAM （32GB）、最大容量的 SSD（2TB）、最高解析度 4K 的 HDR 屏幕。 而且強韌的全碳纖機身市面上暫時未見有其他廠跟得到 VAIO 的技術方案。 比較吸引自然是採用高性能 H 尾綴的處理器，商務精英經常要埋門一腳先要出全力勁射，要在極短時間內完成手上的任務。日本製造 VAIO Z 及其高硬件配置絕對無得頂，而造工和細節上亦能體驗到日本人的謹慎和功力。
作為一部頂級商務機王，VAIO Z 係咪毫無弱點呢？ 當然唔係，激進的 I/O 接口方案，踢走傳統 USB-A 的接口，但如果又無原裝附送一條轉接線，變相要用戶自己購入一條 USB-C 的 OTG 線（也是 Android 用戶必備的線材）。 而另一個缺點，客觀講應該係本 YK 個人的缺點：荷包深度不足啊！ 但其實，香港預售價格港幣 33980 元比中國市場定價 RMB 29888 元（折合港幣 35600 元）平左千幾蚊。
重要的係，VAIO Z 一黎就有 36 個月機體保養（電池、火牛是 12 個月保養），無人想用維修服務，但只怕萬一咋，保養長唔好咩？ 最後提醒一下打算買機的朋友，如果用公司地址購買 VAIO Z 係會獲得上門維修服務架！ 當然，咁貴重的工作拍檔，最好係有實機可以摸下揸下係咪？ 等多一兩個星期預購期結束後，月底網友們就可以落大鋪睇真機試下手喇！