小心中伏!版主偶遇「搵快錢」騙案,3HK / csl. / 數碼通客戶要睇路!

2019-08-28 21:32
文章分享
有人話,香港係一塊福地,但有個關係到民生嘅問題,就係物價高漲,打工仔賺到嘅人工,都追唔到通漲,唔識投資嘅,唯有死做爛做做多幾份,或者走偏門搵下外快。但如果你打算走偏門搵外快,你可能好容易會中騙徒的陷阱。版主最近就偶遇其中一種騙案 (唔係我中伏),針對對象主要為 3HK、csl.、數碼通的現有客戶,而我亦已向網絡商查詢確認。想知詳情,看下文吧!

小心中伏!版主偶遇「搵快錢」騙案,3HK / csl. / 數碼通客戶要睇路!

其實這類型的騙案,一直都有,而這些騙案至今依然可以繼續,證明到現在仍會有人中伏,所以佢哋可以繼續呃到人。而既然咁啱版主遇到,仲見到有好多人留言想了解,都希望提醒各位免中伏。騙徒使用的傳播途徑,主要都是 Facebook,開個新 page,開個 post,落廣告,等水魚。廣告內容為:「即出「3000」,只要你係CSL、1010、數碼通過一年用戶,3台過2年用戶即可!」而版主剛巧在 Facebook 見到,覺得可疑,上台咁耐都未聽過有呢支歌仔唱,無啦啦有錢賺,邊有咁大隻蛤乸隨街跳?於是我就 inbox 詢問一下詳情,並且向網絡商了解一下。

該專頁表示,簡單來說,佢認識 csl.、1010、3、數碼通裡面做嘅人,可以出到電話,電話佢哋收,費用全部佢哋出,只要登記本人出現,就可以即時收現金。佢講到咁含糊,於是版主問佢有無詳細講解,佢嘅答覆係 (已代為修改錯字):

「1. 幫你Check號碼邊間門市幫你做
2. 攞Offer,約好你、門市同事 時間日期
3. 帶你做的Partner會Whatsapp你,帶你到門市同事幫你做
4. 證明你係號碼登記本人
5. 幫你開Line出iphone
6. 費用我地俾
7. 成事你即時即場收現金」


咁做咁多嘢,佢哋可以有乜着數?版主都有直接問佢,佢話:咁佢哋有手機收嘛!而版主始終覺得成件事好可疑,於是同網絡商再查詢下,有網絡商指出佢哋曾收過類似投訴,聲稱可以出機賺錢,然後話可以幫你改地址走數,但當然走唔到數,最後機就果個人袋,數就要你去揹。
 

以下為各網絡商的回應 / 聲明

3HK:月中曾經出過以下聲明:
小心中伏!版主偶遇「搵快錢」騙案,3HK / csl. / 數碼通客戶要睇路!
▲ 要注意的是,專頁名可以有所不同,但手法應該類似。

數碼通:「本公司沒有接獲客戶相關的查詢。​」

csl.:早前 csl. 亦都有發出過聲明:
小心中伏!版主偶遇「搵快錢」騙案,3HK / csl. / 數碼通客戶要睇路!

另外題外話啦,版主都向相熟的街站朋友了解過,朋友表示聽過一單嘢,係朋友個朋友試過咁做 (即氹人幫佢出機之類),之後畀人告話呃錢,最後坐埋監 (呢個只係以訛傳訛,聽下算)。
 

以下為版主跟該專頁的真實對話內容:

小心中伏!版主偶遇「搵快錢」騙案,3HK / csl. / 數碼通客戶要睇路!

小心中伏!版主偶遇「搵快錢」騙案,3HK / csl. / 數碼通客戶要睇路!

歡迎 Follow 我哋 ePriceHK Telegram Channel,收取最新手機、科技及每日優惠資訊。
立即 Click 入:  ePriceHK Telegram 產品優惠科技資訊頻道
https://telegram.me/ePriceHK
Click 入有關 ePrice.com.hk 嘅 Telegram 頻道介紹
文章分享
您可能也喜歡▼