5G 神器:3 香港推 KOL 5G 串流+超清畫質直播服務

2020-06-15 09:16
呢排版主睇好多 Facebook、YouTube Live。係街直播嗰 D,播播下會窒片已見怪不怪;就算用寬頻輸出,都會耐不耐會起格甚至斷線。呢個好大可能跟網絡連線質素有關係。3 香港打算利用佢哋嘅 5G 網絡,推出 4K 直播服務,當中更打算針對 K.O.L 網絡紅人嘅計劃。將來,大家睇直播,可能做到更加清更加靚,甚至有 4K 畫質。

5G 神器:3 香港推 KOL 5G 串流+超清畫質直播服務
 

示範用 5G 直播

早前,3 香港舉辦咗一場「5G 同 Sync 鼓.樂澎湃」,係 Facebook 睇佢哋嘅宣傳,叫晒公司同事,打鑼打鼓,又話香港加油去宣傳呢場 Live Show。老實一句,開頭都唔係好知佢哋賣緊乜嘢。原來,呢嗰 Show 用香港中樂團加英皇明星做包裝,裡面包含咗一套,佢哋想 sell 嘅 5G Live 方案。即係點呢?

簡單嚟講,3 香港呢場嘅「5G 同Sync 鼓.樂澎湃」,就係透過佢哋嘅 5G 網絡,直播出去,呢個技術,更支援 4K 畫質直播。場 Show 係用來示範佢哋嘅 5G 直播方案。
   
係呢個人人都有 SmartPhone 年代,我買咗部 Samsung 5G 手機,開咗嗰鏡頭,按一下 YouTube、Facebook 直播,都一樣做到。

呢套嘢,有乜咁特別?係技術層面係咁嘅:

001: 今次直播,3 香港跟一間叫「天開數碼媒體」嘅公司合作 (已 F.C. 為本地公司),為現場拍攝嘅 4K 視像,通過佢哋嘅 Hermes Live 技術進行特定直播編碼 ,而呢個 Codec 更加適合用來作網絡傳送。  
002:即場訊號,會播過華為嘅 5G CPE,傳送至 3 香港嘅 5G 網絡。
003:3 香港網絡會認得出此類 Codec,直接係「核心網」層面作派送訊號嘅工作。
004:當然,視像訊號可以派送至大家都用開嘅直播平台,如 Facebook 或者 YouTube。
005:而 3 香港更會跟「天開數碼媒體」合作,開始指定 4K 畫質頻道,呢個方案更支援未來嘅內容收費。

咁用呢個方案做直播,有乜好處?就係可以直接將視像訊號由網絡商作優先派送,減少咗係公家互聯網因為網絡擠塞,出現嘅窒片或唔清嘅問題。而 3 香港更可以提供 4K 及專用收費頻道,為內容供應商,甚至乎係 KOL,提供 YouTube 課金以外嘅收費途徑。
   
睇咗今次 3 香港嘅直播示範,又有明星,又有成 Team Crew 去拍。一個 K.O.L 在家作業,或者只係出去現場拍拍新聞,點用得咁多?3 香港表示,之後會有一個 K.O.L 方案,包括咗 5G SIM 卡,5G 手機及 5G CPE 及 2K 解碼服務 (無 4K 咁誇張,但已好過 1080p 畫質) ,不過,到時收費係點,就要等佢哋稍後嘅公佈。
 
多謝支持 ePrice.HK
您可能也喜歡▼