發現 3HK 訊號! 三間網絡商 5G 通地鐵!剩低呢間無

2020-10-25 21:12
iPhone 12 上市,開始多人用 5G!唔知幾多人仲肯坐港鐵,但趕時間迫住都要坐。因為港鐵唔肯開時間俾網絡商舖線,各間網絡商唯有想計仔,點樣打通 5G 網絡,當中有乜料可以爆,版主 Keith 留番係 Patreon 收費台同大講。而今日想同大家分享,3HK 已靜靜雞開通港鐵 5G,我哋測試過,效果可以跟大家分享。

發現 3HK 訊號! 三間網絡商 5G 通地鐵!剩低呢間無
 

升級 5G 要等下

一如 3G、4G 開台,要係港鐵收 5G,其實都要安排一下。港鐵俾網絡商舖線時間有限,所以永遠都係等一段時間,用家先可以係港鐵用到新網絡。版主都記得,係 4G 年代,港鐵只可安排用「舊」頻道開 4G,當年用咗 B3 (1800) 做 5G,其實呢個安排,攪到今日港鐵上網,都係好「x」慢嘅原因。當然,今日網絡商係港鐵都做咗好多擴容工夫,我可以講,係升級 5G 嗰陣,對 4G 用戶來講,都應該有好處。
 

都係「3G / 4G」變 5G

上次,喺旺角站測試 csl. 嘅港鐵覆蓋,仲快過官方揾「自己友」媒體嘅 Briefing。今次,版主一樣係 3 香港未公佈之前,搶先測試。3 香港跟 csl. 一樣,採用舊「3G、4G」頻譜改為 5G,即係由 B1 (2100) 改為 n1 (2100)。咁 3 香港係港鐵 5G 表現如何?

發現 3HK 訊號! 三間網絡商 5G 通地鐵!剩低呢間無
▲ 今次發現 3 香港港鐵 5G 訊號地點喺旺角港鐵站大堂。測試嘅手機係 Samsung Galaxy Z Fold 2,是日期,時間都顯示咗出來。我哋揾咗最近發射站嘅地方。

發現 3HK 訊號! 三間網絡商 5G 通地鐵!剩低呢間無
▲喺 Service Mode,我哋見到 3 香港收訊情況。呢個位訊號強度 RSRP -73dBm 代表收訊情況十分理想。當時,3 香港以 4G LTE B8 (900) 作錨點,再連接至  5G NR n1(2100),同時以 ENDC 連結咗 B7 (2600) 及 B3 (1800),可以頻寬有 45 + 45MHz。

發現 3HK 訊號! 三間網絡商 5G 通地鐵!剩低呢間無
▲  測速結果有 130Mbps  Download 及 50Mbps Upload,Ping 有 14ms。

發現 3HK 訊號! 三間網絡商 5G 通地鐵!剩低呢間無
▲ 我試試夾硬鎖去 4G,主頻為 B7 (2600),再以 CA 連至 B3 (1800) 及 B8 (900),可以頻寬有 35 + 35MHz。由於 3 香港沒有採用 DSS,整個 n1 (2100) 頻譜都變咗做 5G,好明顯,4G 用家用到嘅頻譜資源,比起 5G 用家,係港鐵環境下,係用少咗。


發現 3HK 訊號! 三間網絡商 5G 通地鐵!剩低呢間無
▲ 咁 4G 速度係點?都有 108Mbps 嘅 download、21.3Mbps 嘅 upload,都比起 5G 慢啲啲。5G 喺呢度,其實跟我哋最近試嘅效果都好相似。若果係用「3G/ 4G 改出來嘅 5G」下載速度,未必跟 4G 好大分別,但上傳與 Ping 都會比 4G 有較好嘅效果。
 

後記:

港鐵可以用 5G,對 4G 用家有乜好處。其實,版主觀察到,因為現時採用 5G NSA 程式,因為要用 n1 (2100) 頻段進入港鐵,要有速度,要網絡商導入更多 4G 頻段做 ENDC 輔助。亦因為咁,原本嘅 4G 客,都有得益。另外,我哋測試咗四間網絡商嘅港鐵係旺角站覆蓋,原來有一間係無嘅,佢幾時會有?港鐵舖 5G 網,又有乜故仔?呢啲就留番係 Patreon 版再同大家傾傾啦。


發現 3HK 訊號! 三間網絡商 5G 通地鐵!剩低呢間無 (Patreon 加料版本,會有港鐵舖 5G 網嘅最新消息及故仔,每月 US$6 就可以睇到架啦
 
多謝支持 ePrice.HK
您可能也喜歡▼