舊機最後試玩! 3 香港搶先結朿 2G GSM 網絡

2020-12-14 14:59
版主 Keith 都四十有五,玩咗手機咁多年,一定有古董手機。部份我都收藏幾好架,耐不耐都會攞番出來,插張 SIM 卡入去開著玩下,試下打電話,有時仲會攞出街威威一下。可惜,好快就無得用,古董就真係古董,因為網絡商好快會係下年一月底起,結朿 2G GSM 網絡,到時陳年手機,插張 SIM 卡都收唔到架啦!

舊機最後試玩! 3 香港搶先結朿 2G GSM 網絡
 

頻譜重組 2G bye bye

其實版主 Keith 一早估到 2021 年 1 月,會係 2G GSM 係香港嘅大限。主要因為,1 月 12 日,香港嘅 900 / 1800 頻段開始「大執位」,因為早前頻譜再拍賣,網絡商擁有 B8 (900) 及 B3 (1800) 頻段會再分配外,政府都會收回家陣提供 2G GSM 嘅「碎頻段」。由於 3G、4G、5G 都起碼要有 3MHz 先可以提供服務,太少令上網速度極慢,網絡商無晒「碎頻段」,而市面大部份手機都係 4G /5G 為主,3G 為副,2G GSM 變得可有可無,要終止 2G GSM 服務都係理所當然。

首先跟用戶出通告係 3 香港。部份採用 2G 手機嘅用戶,已收到 SMS 短訊,內容如下:

「3 香港重要通知:3 香港用於提供 2G 服務的 900 及 1800 兆赫頻普於 2021年1月12日及9月30日獲重新指配。經全面考慮後,3 香港將於明年 1 月 12 日起逐步終此 2G 服務,以便更有效運用頻譜資源。」

內容亦提及若果使用相關 2G 手機,有機會之後不能使用該公司服務,並要求客戶於 2020 年 12 月 31 日前聯絡 3 香港升級。

提提大家,3 香港其實都終止咗採用 2100 頻段 3G 網絡服務,部份早期 3G 手機,加上今次終止 2G 網絡,可能都提早永遠再不能用上 3 香港網絡。

舊機最後試玩! 3 香港搶先結朿 2G GSM 網絡
▲ 好似呢部 Sony Ericsson K800i ,支援 3G 嘅,但係因為早期 3G 機,只用到 2100 頻段,係下年1 月中起,就完全用唔到 3 香港網絡啦。

相信今次 3 香港嘅決定,都會影響其他網絡商,大家係時候向 2G GSM 服務講再見啦!

想知道更多 5G 科技及測試,歡迎課金 ePrice 嘅 Patreon 收費頻道。除咗 5G 科技,仲有好多 ePrice 免費版無嘅時政科技分析,專題同埋每日科技新聞 Podcast。每月都只係 US$6 咋。
多謝支持 ePrice.HK
您可能也喜歡▼