有誠哥無窮人!送 SoSIM 兼派錢!再請飲嘢 + 送營養師 1 對 1 服務

2021-04-14 19:01
真心覺得:有誠哥,無窮人!除咗出張 SoSIM 令普羅大眾都可以平價享高用量上網之外,仲不時加入一啲新嘅著數。雖然早前就話取消咗開卡獎賞,無咗「歡樂通宵」23:00-07:00 無限上網、10000 通話分鐘同埋 50GB 社交媒體數據,不過今日又宣佈推出新優惠,送 SoSIM 兼派錢,有一大堆嘢送,簡直係平民救星!想知詳情,睇下文啦!

有誠哥無窮人!送 SoSIM 兼派錢!再請飲嘢 + 送營養師 1 對 1 服務-0

3HK 今日宣佈同屈臣氏合作,喺屈臣氏線上線下商店推出 SoSIM 儲值卡,不過呢單嘢其實都唔係咩新嘢,版主之前已經出文寫過,大家亦都知道咗一段時間。而呢篇文章嘅重點,應該係優惠先啱!到底上面講嘅送 SoSIM 兼派錢,係乜一回事呢?

其實就係,由即日起至 5 月 13 日,凡於全線屈臣氏線上線下商店買 SoSIM,就可獲額外 $40 屈臣氏現金券。先唔講其他優惠,淨係睇呢個,買張 $33 嘅 SoSIM,但送 $40 現金券,現金券都係錢嚟㗎嘛,咁變相仲唔係送 SIM 之餘,仲送多 $7 畀你?

有誠哥無窮人!送 SoSIM 兼派錢!再請飲嘢 + 送營養師 1 對 1 服務-1

你話,$7 送畀我都多 X 謝。唔好忘記,我上面講嘅只係其中一個優惠,仲有其他優惠包括:

- 由即日起至 4 月 30 日,易賞錢會員於全線屈臣氏門市或網店買咗 SoSIM 儲值卡之後,再喺 4 月 30 日前完成網上登記,就可額外獲贈屈臣氏星級化妝師網上化妝班 45 分鐘 (價值 $400) 或者屈臣氏註冊營養師一對一網上諮詢 20 分鐘 (價值 $238)。

- 由 4 月 17 日起至 7 月 8 日,於任何一間屈臣氏或百佳增值 SoSIM,即送免費指定飲品一支,每段推廣期送出不同飲品,包括屈臣氏鹼性水 9.0、屈臣氏北海道蜜瓜味蘇打水、屈臣氏蜂蜜水 (玫瑰味) 等,數量有限,送完即止。