最平 Plan 玩完!CMHK $168 無限數據將加價!轉台襯早慳二千三?

2018-09-26 17:43
今次真係唔可以再拖!錯過咗,下次都唔知再等幾時,先會有咁嘅優惠。版主你 Up 乜呀?係咁嘅,早前我咪同大家提過,csl. 無限上網加返價,唔再玩平價 Plan,甚麼 $180 真無限已經 bye bye,平價市場得 CMHK 獨霸,$168 真無限 + 送 1GB 大灣區數據,係抵嘅。但版主剛才同 sales 傾開,佢話 CMHK 將會加價,而且講到已係肯定的事,$168 Plan 都正式宣佈玩完,仲想玩平價 Plan,呢兩日好轉台。

最平 Plan 玩完!CMHK $168 無限數據將加價!轉台襯早慳二千三?

版主自問講嘢唔叻,但我好鍾意周圍交朋友,特別是大舖 / 街站 sales 等等,熟絡咗,有時都方便收下風,了解行情。而版主頭先經過相熟街站,又埋去吹陣間水,傾傾下講起,CMHK 去到 30/9 就會加價,$168 無限 Plan 正式玩完。見佢講到實牙實齒咁,應該九成九已成定局。或者就係因為見 csl. 加返價,所以佢都無必要再打平價戰,無對手,索性完咗呢個 offer 佢好過。

至於會加價至幾錢?暫時未知。不過 sales 猜測,無限上網 Plan 應該會回到正價 $266,即係月費 $248 + $18 行政費。雖然唔係話十分貴,但每個月差 $98,24 個月計都俾多成 $2352。雖然 CMHK 上網唔算係好快,不過 $168 呢個價勝在夠平,錯過咗都唔知幾時會再有咁平,你會唔會拿拿聲轉台呢?