與別不同 以 DSS 先行舖網方式! 數碼通 5G 速度搶先試

Keith Yim 2020-05-30 21:34 | 數碼通
對於 csl. 、3 香港、中國移動香港推出 5G,版主 Keith 表示,唔多關我事。記得 5G 推出當日,其實係疫情最嚴重嗰幾日,我又幾乎日日 WFH,屋企附近又「收條毛」,有卡都無用。今次數碼通推出 5G 就唔同啦。好貼心咁,本來嘅 4G 記者 SIM 自動升級 5G,我攞返張舊卡,插入 5G 手機就得,唔駛等數碼通寄過張新嘅過來。最重要係:我屋企附近:有,訊,號!點解咁爽歪歪?因為數碼通用咗 DSS 技術開網,主打 N1 (2100) 呢條頻。有訊號有得試,今日又出開旺角,由我屋企附近出發,一齊睇下數碼通 5G 收訊係點嘅樣,用呢個方式先行舖網,上網速度又快唔快。

fb-final

睇以下嘅 SmarTone 5G 試用心得之前,大家記得睇番 SmarTone 用 DSS 技術 + N1 (2100) 頻段舖網會係一件乜嘢嘅一回事,我就唔係呢篇文再講咁多,直接去 Speed Test。

一切由屋企開始

是咁嘅,版主住近郊區,無論 csl、CMHK 定係 3 有 5G,都注定係呢一刻,同我無關。因為知道 SmarTone 都開 5G,我就靜靜雞將佢哋借畀我嘅記者 SIM,插入我部 Samsung Galaxy S20+ ,立即發現有訊號喎。不過,就唔算強,有時收到有時收唔到。由於收得好唔穩定,我就唔做 Speedtest 啦,只可以講,間屋收到,對呢次測試,會係一個好開始。

揾到最近嘅發射站

由我家出發,首先到達巴士轉車站。呢到 5G 訊號好強,應該發射站就係附近。事實上,我屋企其中一個收訊站,都應該係呢到附近發射出來。速度係點,立即睇!

a01.jpg
▲ 由三星手機嘅 ServiceMode 見到呢到收緊 N1 (2100) 嘅 5G 訊號,用咗 15MHz 頻寬。

a02.jpg
▲ 由於我唔想透露太多我住係邊到附近。上面嘅圖片有 Show 地點嘅資訊,我會 Bar 左佢,大家認到都無法。SmarTone 5G 係呢個少人用,又收得強嘅地方,試咗幾次,㨂出最佳速度有 104Mbps 下載、8.68Mbps 上載、Ping Time 10ms。

a03.jpg
▲ 呢個係 SmarTone 4.5G 嘅速度,121Mbps 下載、2.6Mbps 上載、Ping Time 17ms。

a04.jpg
▲對比我剛剛申請嘅免費 csl 5G 卡,係呢個 location,只收到 4.5G,最佳速度係 42Mbps 下載、1.12Mbps 上載、Ping Time 20ms。

a05.jpg
▲ 去到等巴士嘅地方,發射站就係對面遠方,SmarTone 5G 係 N1 頻段下,速度係 191Mbps 下載、26.8Mbps 上載、Ping Time 11ms。

坐巴士

SmarTone 係早前嘅發佈會,好著重講佢哋係交通幹線都收得到 5G,係我出去旺角嘅巴士行程,會經過屯門公路,版主發覺,過咗汀九去荃灣,就開始收到 5G 訊號,當然係 N1 啦。而手中嘅 csl,其實成程巴士都係收唔到 5G 訊號。由於巴士行得好快,車程唔長,呢段 csl 就無做對比啦。

a06.jpg
▲ 係巴士裡面, 屯門公路接近往荃灣出口,SmarTone 5G 速度係 63.2Mbps 下載、12.6Mbps 上載、Ping Time 11ms。

a07.jpg
▲ 呢架巴士,行到大角咀港灣豪庭附近,SmarTone 5G 速度係 56.7Mbps 下載、36.3Mbps 上載、Ping Time 10ms。

旺角測試

去到旺角,依照我嘅行程,邊行邊測,同時亦用 csl 5G 作對比一下。csl 5G 係旺角嘅 5G 效果,早前版主阿坤都測試過,部份位置,速度係唔錯嘅,咁 SmarTone 呢?

a08.jpg
▲ 落車位係旺角亞皆老街與彌敦道交界嘅上商銀行對嘅十字路口,呢個位好奇怪,SmarTone 呢個位無 5G,但 csl 有。但更奇怪嘅係 csl 都係用 N1 (2100) 做覆蓋,而唔係 N78 (3.5GHz),點解會咁處理?我真係唔知。

a09.jpg
▲ 用三星 ServiceMode 發現呢個位 csl 居然用 N1 (2100) 做 5G,用上 10MHz 頻寬。

a10.jpg
▲ 呢度 csl 用 N1 (2100) 做 5G,成績會係: 45.8Mbps 下載、21.1Mbps 上載、Ping Time 13ms。

a11.jpg
▲ 去到滙豐銀行過少少嘅萬寧,呢度數碼通都係無 5G 訊號,但 csl有,仲要係 N78 (3.5GHz) 開盡 50MHz,csl 5G 係呢個位,係快嘅:216Mbps 下載、76.5Mbps 上載、Ping Time 9ms。

a12.jpg
▲ 去到朗豪坊五樓 Coffee Shop 出面,SmarTone 有 5G 訊號,都係用 N1 (2100) 覆蓋。不過,係呢個位, Speedtest 最好一次成績都只有.....15.6Mbps 下載、14.7Mbps 上載、Ping Time 10ms。

a13.jpg
▲ 同樣呢個位,csl 收 N78 (3.5GHz) 訊號,成績係咁嘅:  75.9Mbps 下載、33.5Mbps 上載、Ping Time 9ms。

z11.jpg
▲ 去到 The Forest 商場出面條馬路,即係旺角波鞋街啦!終於見到 SmarTone 5G 用 N78 (3.5GHz) 放 5G 訊號啦,用嘅係 40MHz 頻寬,比起 csl. 50MHz 為少。但速度都好唔錯,206Mbps 下載、64.3Mbps 上載、Ping Time 7ms。

c01.jpg
▲ 最後一站,版主去咗深水埗,喺港鐵 C1 出口,對住大家樂門口坐喺到試。呢到有 SmarTone 5G ,都係用 N1 (2100) 嘅。係咪平民就無得咁快有 5G 享受?係文章發表嗰日,csl 係呢到,未有 5G。咁 SmarTone 5G 係呢度,速度如何?57.8Mbps 下載、44.7Mbps 上載、Ping Time 12ms。

c13.jpg
▲ 同時期,SmarTone 4.5G 速度係 41.8Mbps 下載、9.34Mbps 上載、Ping Time 19ms。

c12.jpg
▲ 同一時段,csl 4.5G 速度係 24.9Mbps 下載、14.8Mbps 上載、Ping Time 31ms。

小結:用 5G ,會有實際得益

版主 Keith 一向都唔鐘意做定點網絡 Speedtest 大比拼。係咪 A 網商收到 1Gbps,但五六百蚊月費,你會用,定係 21mbps 無限,百幾蚊月費你會有興趣?我相信 ePrice 網友,大部份揀後者。我反而有興趣想知,網絡商嘅建網策略,點樣影響整體網絡嘅表現,即係網友想知嘅上網速度啦。SmarTone 5G 舖網策略係好 Interesting,用咗歐洲部份國家如徳國、荷蘭及瑞士嘅方法,先用部份 4G 頻譜轉 5G,盡快打好覆蓋,再 Top Up 用新頻譜加強上網速度。係香港 Work 唔 Work?試用咗一日,我會咁睇:

001: SmarTone 用 N1 (2100) 做 5G 廣泛覆蓋,連我呢d住近郊區嘅人,都用到 5G 係開心嘅。就算係市區,似乎 SmarTone 覆蓋似乎都要比 csl 好。

(Sorry CMHK 5G 係好定唔好,我真係唔知喎,我唔肯幫佢哋做全港 Speedtest,佢哋無 SIM 借到俾我;csl 有借卡,但版主阿坤用緊;好采 csl 有人人免費試玩一個月計劃,所以唔駛同阿坤爭。3 香港,我有卡嘅,哈哈哈,就算吧,除非我只係試「海之戀」商場,或者日日去中環置地廣場和你 Lunch)

002: 用 N1 (2100) 做 5G 覆蓋,唔會係 SmarTone 專利,剛剛我係旺角試到,原來 csl 都做緊。

003: 咁 SmarTone 5G 呢個策略,係好定唔好?若果你今日上台,喺佢哋以 N1 為主嘅覆蓋下,SmarTone 5G上網速度,未必跟 4.5G 有好大差別,最好嘅成績,download 可以接近 200Mbps ,但差起上來,真係得 1x Mbps 左右。不過,大家可以留意返上面嘅成績,5G 網絡,就算只係用 N1,上載同 Ping Time 都會比 4.5G 好。即係話,如果你要成日打機、或者要上傳影片,那怕你只係用 N1 (2100) 嘅 5G ,都會有得益。

004: 重申一點,SmarTone 5G 跟其他網絡商一樣,都有 N78 (3.5GHz) ,暫時來講都係以覆蓋旺區為主啦,遇到 N78 嘅 5G,速度就會比 N1 嘅 5G 快好多,以今次測試為例,速度跟同樣用 N78 (3.5GHz) 覆蓋差唔多,都有達 200Mbps 下載速度嘅成績。SmarTone 講明下年 (2021) 年中,戶外有九成地方都有 5G,希望佢可以快快加建 N78 基站啦。

其實,關於今次測試,有更多 SmarTone 用 DSS 技術嘅觀察及分享,因為我好驚大部份讀者都唔明我寫乜,所以會用另一篇分享文再講。立即 Click 呢度

最新新聞