4G 最重要頻段 900、1800 拍賣完成!誰是大輸家 ?

2018-12-18 20:16
5G 可能真係太遠,但大家最關心嘅 4G 手機網絡覆蓋,今日有重要消息!可用於 4G 建網嘅 900 及 1800 頻段,今日再拍賣完成!四大網絡商,共用了 60 億港幣競投,其中 csl 佔了三份一,用咗 22.2 億!次次都估中資電訊商會出重手,結果都唔係。但無論出幾多錢,今次 csl 可能係大輸家,用咁多錢,頻譜有減無增。中國移動香港成為香港第二間 4G 全網通:900 / 1800 / 2300 / 2600 頻段同時擁有,網絡容量及發展能力,有力跟 csl 爭一日之長短! 

4G 最重要頻段 900、1800 拍賣完成!誰是大輸家 ?
 


900 / 1800  頻譜拍賣完成!價錢未算好貴

900 與 1800 頻譜對於網絡商來講,十分重要。首先,香港行嘅 5G NR 制式會係 Non Standalone,即係一定要與 3G 及 4G 網絡共存,而 900 / 1800 就係黃金頻段?點解,因為佢哋有入到屋嘅好處,用過 3HK 與數碼通嘅網友,都會發覺近年係屋企室內收唔到 4G 機會低好多,因為佢地都積極開通 900 / 1800 嘅 4G 覆蓋。大家之前睇過版主有關 3HK 測試 5G 嘅文章都知,5G 3.5GHz 其實基站 200 米以外,上網最高速度跟 1800 單一頻段相差不會太遠,所以 5G 要有好嘅 4G 覆蓋配合才發揮得最好。 

雖然如此,今次四大網絡商出價,比起近年頻譜拍賣,出價相約。以 2014 年 2100 頻段再拍賣作比較,網絡商花了 24.2 億去競投 49.2MHz 頻譜。今次網絡商共花了60 億去競投 120MHz 頻譜,每 MHz 競投價五千萬港幣左右,比起之前四千九百一十萬,略為上升,但不算好過份。今次拍賣的頻段由現時四間網絡商投標包括中國移動香港、和記電訊香港 (即 3 香港)、數碼通及香港電訊 (即 csl ) 四間公司投標,沒有新來者。

由於一個完整以大眾用家為目標嘅 5G 網絡,一定要有 3G / 4G 網絡,相信日後競投 5G 頻譜,如 2019 年中嘅 3.5GHz 頻段,有新來者的機會好低。

4G 最重要頻段 900、1800 拍賣完成!誰是大輸家 ?
▲ 網絡商在今次頻譜拍賣的使費。
 


csl 花最多錢

拍賣的結果如大家所預料,csl 因早年跟 HKT 合拼及收購 Sunday 及新世界傳動網,在今次競投遊戲規則下,佢地擁有嘅大量 1800 頻段,預咗會俾人搶。結果,佢哋擁有 72.8MHz 嘅 1800 頻段,最後保住了當中的 40MHz,而 900 頻段略升至 20MHz。頻段總數由 179MHz 減至 149.6MHz 元氣大傷 (減去 800 CDMA 頻段及  2600 頻段 Genius Band 部份以除二作處理)。但 HKT (csl) 卻係四間網絡商用最多錢投頻嘅公司,用咗 22.2 億!)

數碼通今次用咗 12.8 億競投,但 900 部份跌至 10MHz ,1800 反而升至 40MHz,1800 頻段又真正成為數碼通 4G 主頻。不過,佢地 900 / 1800 夾埋都有 50MHz,跟其他網絡商相約,但總頻譜量,唔計世紀 21 都係最少嘅一間。

3 香港今次投放 9 億去競投,叫做保得住 900 部份只少了 6.6MHz,20MHz 嘅 900 頻段,比起數碼通 CMHK 都多了。

CMHK 一如所料,頻譜總量升至 139.6MHz 能與 csl  的 149.6MHz 爭一日之長短,其中 1800 頻段升級至 40MHz 與本來 2600 頻段 40MHz 可以做得更高速嘅 4.5G 網絡,而新增 900 頻段,無論對佢地 3G 及 4G 覆蓋,都有顯著好處 (至少唔會一入到室內就跳去 3G 甚至 2G) 。

4G 最重要頻段 900、1800 拍賣完成!誰是大輸家 ?
▲ 900 / 1800 頻段,各大網絡商嘅增減。

4G 最重要頻段 900、1800 拍賣完成!誰是大輸家 ?
▲ 香港五大網絡商,頻譜分佈 2018-12 版本。

最後留意,今次網絡商頻譜大執位,都要在 2021 年才正式執行,為期十五年,到時可能已有 5G 網絡,怎樣協同,版主跟大家都要密切留意了。
多謝支持 ePrice.HK