最近留意開衛訊官網，發現成個版面都唔同咗，成個設計變得以網店為主導，同時亦留意到多咗唔少手機選擇。不過，目前睇都仲未係所有手機都有得賣，留意智能手機頁面「篩選-品牌」部分，目前只有 Samsung、OPPO、Nokia、Sony 的選擇，居然連華為都無，實在罪大惡極！
不過據了解，暫時未有齊咁多手機，係因為有啲舊款手機尚未放返上去，主力放咗新機先，遲下就會愈來愈多，愈來愈齊。而除咗手機之外，衛訊網店仲會有唔同類型嘅產品賣，就算係門市好少見到嘅電腦產品，網店都會有，大家唔使出街都可以慢慢揀，都係一件好事嘅。
版主都問過，衛訊遲啲都會搞多啲網店嘅優惠，吸引更多網友用優惠價錢消費。嗱，老老實實版主平時寫咁多優惠，衛訊有優惠係好，但要睇下佢哋肯唔肯做得好，若果好似豐澤網店咁，搞搞下星期五 Outlet 愈搞愈無料到，咁就乜優惠都 WFC。你話係唔係先？