Podcast 內容
今日 6 月 21 日，就係外國最出名嘅網購網站 Amazon：舉行嘅 Amazon Prime Day 活動嘅開始。Amazon Prime Day 係會員優惠日，本身係供佢哋嘅收費會員專享。會員優惠日有乜好？就係好多減價貨！今次我哋推介一下，有乜要注意嘅電子 Gadget ／電腦產品啦！今次我哋推薦產品都係香港未有、或者平過香港好多產品嚟，若果香港有，又要平，無必需要去外國網購網站去買吧！
Amazon Prime Day 先注意嘅事
如果你打算係 Amazon 網購平台購買電子產品，例牌要提醒你幾樣野。第一，產品電壓是否兼容香港 220V。不過，加陣大部份電子產品，都係用萬能 USB 火牛，所以好多都沒有電壓呢個問題。除非你好似我咁中意去日本 Amazon 買家電產品，咁就要小心唔好買錯日本本土電壓版，得 110V 電壓，係香港港用佢，一插電即爆。第二個要留意係，涉及到手機網絡數據上網的產品，例如、電話、平板咁，5G 網絡產品都會有頻譜的問題，意味住美國貨 5G 手機，未必支持香港 5G 網絡，所以，一般我都會同你講，唔好賭喇，當佢係 4G 機咁用就可以了。而部份 4G 機都未必係香港用到，最好 Check 清楚頻段。
▲ Amazon Prime 會員，以美國為例，月費都唔平，要 US$12.99 一個月，但有免費試用三十日。申請後，關購物事嘅係可以特快及免費送貨。按圖即申請
千元有找正 Chormebook
Amazon 有好多香港無賣或者平過香港好多嘅高質嘅 Chromebook，今次推介嘅價格都係 1900 港幣有找，包運費，截稿時候仲有少量貨。第一部係 HK$1879.82 嘅 HP Chromebook 11。呢部小型 Chromebook 續航力超過 15 小時係佢賣點，而且 11.6 吋屏幕擁有雪白機身，配 2.4 磅都無嘅重量，相信係唔少女士搬黎搬去上網睇劇嘅好工具。 MTK 8183 處理器，4GB RAM + 32GB ROM 容量組合， 一般上網睇片，少量 online 文書工作都毫無問題。
▲ HP Chromebook 11 按圖進入購買連結
另一部同樣都係 11.6 吋輕巧機系列，來自 ASUS 的 CX1100CNA， 賣價係 $1816.55，電量雖然比 HP 果個少啲，續航力只有 12 小時。但呢部機造工相當可靠，通過美國軍用規格測試 MIL-STD 810H，鍵盤的每個按鍵的面積都攞到儘量大一大，仲有防水濺設計，個芒仲可以 180 度打平。 處理器用上 Intel N3350 雙核心處理器 ，一樣係 4GB RAM +32GB ROM 組合。 但比較特別係內置 Google Titan C 安全晶片，Chromebook 本身都難破解，加埋呢個晶片想破解部機係難上加難！ 加多句，上面兩部機都係用 USB-C 充電的，所以，唔怕搵唔到充電器喇。
▲ ASUS CX110CNA Chromebook 按圖進入購買連結
值得一試 Windows 神機
兩部 Chromebook 之後，都會介紹翻 Windows 系統筆電，係最新款剛剛推出的三星 Galaxy Book Go 筆電，呢部官方本身都定位做平價機，但香港暫時未推出，但 Amazon 上已經光速有銀白色賣緊，只係 HK$2764.36，包運費送到你屋企。呢部機可以話係三星全新 ARM 制式處理器嘅 Windows 系統筆電 。全機身採用無風扇設計，因爲採用高通 Snapdragon 7c gen 2 處理器，同樣 8 核心，性能同手機版的 7 系列對標。重點係運行 Windows 10 系統之餘，又提供到 18 小時的續航力。機身亦提供完整的 USB-A、記憶卡、USB-C 、3.5mm 耳機 Port 接口。14吋屏幕的 Samsung Galaxy Book Go，都只係重 1.3 kg 左右。雖然，睇翻外國記者的評測對呢部機大加讚賞，但我其實只係建議快槍手網友買，想第一時間玩新玩具的網友，因爲香港可能會好快就推出呢部機；另一個建議大家冷靜的原因係 Windows 10 on ARM 的軟件支持問題，就好似 Apple 粒 m1 晶片咁，到今日都依然有各種兼容性小問題。 所以你可以當係玩具，搵食開工嘅要唸唸。
▲ Samsung Galaxy Book Go 按圖進入購買連結
如果你有錢的話，有一部機比香港版平好多，同樣無風扇設計，我之前亦測試過，超級輕薄筆電，Samsung Book S。13.3 吋屏幕加持，Amazon 版係 8GB RAM + 256GB ROM，HK$5126.06 就送到你屋企。 同香港版比較，最大分別係香港版係 512GB ROM，但價錢最平都見到係要 HK$6500。呢部 13.3 吋的 I.O 接口肯定唔齊，得兩個 USB-C + 3.5mm 耳機位，但勝在續航力好、機身只有 1KG 不到，而且系統係行原裝 Windows 10 ，唔係 ARM 版本。 對呢部機有興趣的朋友，可以參考 ePrice 相關評測。
▲ Samsung Galaxy Book S 13.3 吋，按圖進入購買連結
有筆有 5G ，三千有找超正手機
講完筆電，自然要講下手機。 老實講，香港買得到的手機，特別係 5G 機已經好平，因爲香港都無入口稅。 所以我哋偏向係 Amazon 上入手香港買唔到產品。以下呢部機都係新鮮出爐，剛剛發佈無耐，我都同大家簡單介紹過的，Moto G Stylus 5G 。先講機價，同美金定價 399 一樣，HK$3160 就可以送到你屋企。呢個價錢買得到的版本係 6GB RAM + 256GB ROM 組合，採用高通 S480 處理器，跟 Nokia X20 同級。 重點就當然係 5000mAh 巨電 + 支筆喇。 配合 6.8 吋 芒， 買黎睇片、簡單畫圖都無問題。 但再講多次，雖然有人知道個破解密碼係乜，個 5G 網絡你預左無辦法係香港用得到。 如果你只係需要 4G 網絡的觸控筆手機，咁其實 Moto有部 4G 版，處理器舊少少，高通 S678 處理器，採用 4GB RAM +128GB ROM 組合，電量只有 4000mAh。如果唔求大 ROM 多RAM 和大電池嘅話，4G 版可能更適合買黎做玩具。
▲ Moto G Stylus 5G按圖進入購買連結
▲ Moto G Stylus 2021 按圖進入購買連結
香港都無嘅絕版手機
如果講手機話題之王的話，MS 部 Surface Duo ，截稿前仲有幾部，128GB 版 HK$5288 直送你屋企，256GB 版本係 HK$5683，留意翻，部機唔支持插卡，建議有錢就買大。呢部機，你係香港用，只會個個都望住你，因爲真折芒手機係得佢一部，而且仲唔知會否推出新一代。 畢竟 MS 產品好多時候都會一代就絕版。絕版清貨，都值得各位收藏家入翻部。
▲ Surface Duo 按圖進入購買連結