黑色星期五 (Black Friday) Amazon 新手攻略!集運推介 + 實用 Tips

2021-11-20 17:54
每年 11 月第四個星期四,就係美國 Thanks Giving Day 感恩節,而感恩節嘅第二日,就係 Black Friday,好多人都會趁住呢個日子,去 Amazon 呢類美國網站掃貨,因為好多商戶都會推出唔少促銷優惠,就好似雙 11 咁。而對於 Amazon 新手嚟講,到底去 Amazon 買嘢有咩嘢需要注意,又有無咩 Tips 呢?我哋就同大家整理一下 Amazon 購物嘅攻略。

除咗 Amazon,其實仲有好多網購平台都會有好多 Black Friday 優惠,好似 Walmart、Bestbuy 等等,就年年都有搞作。就算唔係美國網購平台,好似日本嘅樂天,甚至香港好多商家,都會推出大大小小一系列嘅促銷優惠,去吸引大家買平貨。不過,以美國網購平台嚟講,始終最多人用嘅,都係 Amazon。有 Amazon 買開嘢嘅,當然唔使聽我講,你哋先係專家,但對於初學用 Amazon 嘅,有啲地方就要留意。
 

001: 留意能不能夠直送香港 + 集運公司推介

部分產品可以直送香港,所以大家睇有乜貨掃嘅時候,要望清楚係咪可以 ship to Hong Kong。當然,如果佢話唔可以 ship to Hong Kong,都可以用集運嘅方式。

而市面有乜集運公司可以選擇呢?我個人就比較推薦 Buy and Ship,記得以前試過 Amazon 買 FireTV Stick 同埋其他產品,當時就試過用 Buyandship 嘅網站去集運。而集運方法都好簡單,都係先填寫個人資料註冊,註冊完撳入去「海外倉庫地址」,搵到屬於你嘅集運地址,然後你 Amazon 買嘢果陣,送去呢個地址,咁就搞掂。而之後你會喺「管理我的貨件」位置,「申報貨件」,填返貨品追蹤編號等等嘅資料,然後就搞掂。當所有貨品都入哂倉,你就可以畀錢合併轉運,運去香港嘅收貨地址。

順帶一提,Buy and ship 未必一定係最平,但我覺得都算係幾簡單易用,不過都係提醒大家,其實你用集運嘅方式,唔多唔少都有一定風險,有咩損失你未必追究得到。所以若果唔係有必要,建議都係搵啲可以直送香港嘅產品買。
 

 

002: 格價網站追蹤 Amazon 價格歷史,唔使唔小心買貴咗

如果平時有 Amazon 買開嘢,可能都會知,但我哋而家當大家乜都唔知,就會講下以下呢個 Amazon 嘅格價網站,Camel Camel Camel,佢係可以幫你去追蹤 Amazon 貨品嘅價錢變化,同時可以睇返歷史價錢,幾時落價。呢個格價網站係幾好用,亦都應該係最多人用嘅網站。
 


003: 留意有無 Amazon 官方認證

另外,有一點都值得留意嘅,係 Amazon 有啲貨品係寫到明 ship from and sold by Amazon,即係由銷售至配送都係 Amazon 一手包辦,呢類產品如果發現有問題,退貨同換貨都係由 Amazon 負責,相對信心大增。而有啲就只係 Amazon 負責包裝同配送,保證產品質素,而賣家係其他人,呢種情況如果貨品發現有問題,Amazon 都一樣會退錢畀大家;至於 Amazon 無份參與果啲,風險就比較高,有咩問題上嚟,都好難退貨。