12 月 9 日起食肆強制安心出行!版主嚴選勁平安心機

左定坤 (Cho Ting Kwan) 2021-12-04 18:10 | 網絡消息
有留意新聞都知道,香港政府早前已經宣佈咗,12 月 9 日起食肆等指定場所,強制要用安心出行,唔可以再寫紙仔。而呢個決定,相信會推更多網友,去買平價安心手機,難怪早前 Nokia 高層都話,多得安心出行呢件事,佢哋啲幾百蚊平機賣出咗好多。若果想幫屋企人買返部安心手機,有無咩好選擇呢?版主就嚴選咗幾部畀大家揀。睇下文啦!

Sony Xperia XZ

雖然安心手機基本上除咗用來裝安心出行,一般都唔會有其他用途,但最低限度應該係要相機唔太差,如果唔係成日掃 QR Code 掃唔到都好麻煩。而 Xperia XZ 其實係幾唔錯,想當年假假地都叫旗艦機,有 S820 處理器,不過呢部手機都已經幾舊,所以要搵全新貨,其實好難,但庫存倉底貨,都仲有得諗。見到有網店就搵到批日本庫存貨返嚟,只係賣 $550,作為安心手機相信都幾合格。況且做得安心機,影到相咪得囉,係咪先。

報價查詢:phone2phone.hk
 

Nokia C01 Plus + Nokia C20

既然 Nokia 講到佢哋幾百蚊安心機咁多人買,咁無理由我哋唔提嘅,咁其實 Nokia 而家大舖有買嘅安心機有兩部,分別為 Nokia C01 Plus 以及 Nokia C20,兩部都係 Android 11 (Go Edition) 系統,大舖同細舖賣價分別為 $698 同埋 $798,而出面細舖價錢其實同大舖差不多,所以最方便簡單,都係去大舖入手。幾百蚊安心機,specs 我就不值一提,1GB RAM 2GB RAM 貨仔囉,詳細規格睇我哋 Database la。
 
Nokia C01 Plus 詳細規格及最新賣價
Nokia C20 詳細規格及最新賣價
 

「索野」SOYES XS11 / 蘭鉑 L3+

呢兩部雖然都係國產機,不過都有佢哋嘅特色,前者係一部超細部嘅手機,尺寸為 43mm x 85mm,2.5 吋芒細細部,有 Google Play 裝到安心出行,不過呢類機可能出現一個問題,就係鏡頭可能會爭啲,有時掃 QR Code 未必對到焦,而最近深水埗有間店都入多款叫蘭鉑 L3+,同樣係 2.5 吋細細部,而呢間舖仲特登搵人調過焦,令掃碼可以更快。兩部手機都只係賣緊 $399,雖然國產機,但如果只係作「安心出行」用途,平平地都可以考慮嘅。
 
報價查詢:ZETA 科卓
 

最新新聞