呢部「安心手機」幾盞鬼!八達通最後一期消費劵 用一半就買到

2021-12-16 18:40
早前其實版主都同大家介紹過幾部幾百蚊貨仔的「安心手機」,可以畀大家裝「安心出行」用,講真其實雖然只係幾百蚊貨仔,但其實之前介紹有兩部手機都幾有特色,一部係「索野」SOYES XS11,而另一部係蘭鉑 L3+,雖然兩部都係國產手機,但佢 sell 嘅賣點係可以一手掌握迷你機,其實係幾唔錯。幾百蚊貨仔,其實有部兒童用「安心手機」,個樣都幾盞鬼,反而無市面普遍「貴價」手機設計咁死板。出咗八達通最後一期消費劵,用一半價錢就買得到,你又會唔會有興趣呢?

呢部手機型號叫 SUGAR A100,定位其實係一部兒童手機,曾經獲得 Reddot Award 紅點設計大獎,以一部幾百蚊貨仔手機嚟講,佢嘅顏值相當唔錯,推出時開賣價大約 $599,而家 ASK Super Outlet 超級直銷城,更減至 $499 就買得到,仲話有一年香港保養喎。咁啱今日咪出咗八達通最後一期 $1000 消費劵,你而家只係拎一半出嚟,就買得到,樣又唔差,我覺得 OK 喎。

而呢部 SUGAR A100 除咗佢機身上有精美嘅卡通圖案,佢仲有一個標誌性嘅特色,就係佢下方一個巨大嘅喇叭,呢個設計喺現今市面手機入面,幾乎唔會見到。同時,SUGAR A100 用上 3.5 吋芒,解像度為 480 x 320,內置 2GB RAM 以及 16GB ROM,電池容量有 2500mAh,並且有 13MP 主鏡頭 + 5MP 前置鏡頭。另外,手機會預載 Android 8.1 作業系統。