話咁快又嚟到 2021 年最後一日，本地新聞唔算多就同大家做個小總結。到底今年最多人關注嘅，係乜嘢新聞呢？原先我仲以為，為咗促進消費，政府派 $5000 電子消費劵應該會係最多人 Care 啦，但數字就呃唔到人，電子消費劵相關嘅，估唔到只係排第二，咁到底第一名係啲乜？即刻同大家回顧一下啦！
2021 十大 ePrice 新聞排行榜
以上就係 ePrice 十大新聞嘅排行榜，可以見到雖然政府派 $5000 電子消費劵，都係一啲小福利，但大家更關心嘅，似乎係私隱相關的問題，首先就係 WhatsApp 要同 Facebook share 數據，大家都唔想有呢件事發生，再加上 WhatsApp 幾乎係人都會用，所以大家都非常關注都合理嘅，而及後有關呢段新聞嘅後續消息，都好多人留意，例如「外媒踢爆 Facebook 澄清 WhatsApp 更新條款係謊言」。
而去到 5 月倒數 10 日嘅時候，如果唔 Accept 其私隱政策，WhatsApp 隨時會被停用，依然係好多人關注。所以可以見到，「WhatsApp」會係 2021 嘅關鍵字之一。
政府派消費劵，唔係話無人 care，佢受關注程度同 WhatsApp 事件相比，其實只係略遜一籌，而十大事件之中，有兩則新聞都係同電子消費劵有關，包括「用八達通領取政府 $5000 電子消費券 建議用第二張卡 話你知點解」同埋「Tap & Go / 八達通 / AliPay HK 點揀？要否實名？」。
至於豐澤特賣場居然排第三位，我個人會覺得有少少出奇，雖然都係一個唔錯嘅結果，但比我想像中或者比較返往績嚟講，少咗人關注，可能近年疫情關係經濟唔係咁好，影響咗大家消費意慾，又或者因為而家豐澤特賣場有限制人流，唔再係好似以前咁可以 Walk in 去排，或多或少都會有啲影響。
最後， 預祝大家新年快樂，身體健康，新一年繼續支持 ePrice 以及各位版主！
