轉新玩法,VIP 可早一晚進場
今次有新玩法,就係易賞錢同 iClub 嘅 VIP,可以喺前一晚優先入場選購平貨,即 25 / 4 就可以進場。變相就係,如果你唔係易賞錢同 iClub 嘅 VIP,第二日嚟到有機會無乜好嘢買到,因為有好嘢都先畀「VIP」買咗先。至於點先做到「VIP」?
如果要成為 iClub VIP,就比較麻煩少少,因為唔係淨係做會員咁簡單,而係要做完會員後再在一年內消費滿 $20000,先可以成為 VIP;至於易賞錢,就似乎唔見有分 VIP 制,即變相普通做個會員就得,而你可以去屈臣氏填個 form 就做到會員,簡單。(更新: 同豐澤了解過,表示易賞錢都會有 VIP,要做 VIP 就要消費滿「指定金額」,有趣的是問及「指定金額」即係幾多,豐澤表示成日轉,佢哋都唔知......)
有幾多網友符合以上條件,可以搶先進場掃平貨呢?你又會唔會 go?留言講下啦!