網傳 Samsung 手機「資料送中」?上網行蹤直上 114DNS

2020-10-08 08:30
呢兩日香港嘅 HKEPC 討論區同埋連登,關於手機討論最熱門話題,居然係懷疑三星香港行貨手機,會自動將使用者嘅手機上網情況資料,上傳至與中國管理嘅伺服器,引起用三星手機,仲要係香港行貨版會否「資料送中」嘅熱烈討論。呢個指控相當嚴重....

網傳 Samsung 手機「資料送中」?上網行蹤直上 114DNS
 

114DNS 之謎

今次懷疑三星手機「資料送中」最初來自 HKEPC 討論區。有位師兄話,用三星香港行貨手機,以 WiFi 連線上網,手機會有機會「被強迫」使用由「中國南京信風軟件有限公司」負責 DNS 114.114.114 (114DNS) 服務,令個人上網行蹤紀錄,暴露於中國公司控制嘅伺服器,引起「資料送中」嘅效果。

網傳 Samsung 手機「資料送中」?上網行蹤直上 114DNS
網友用 DNS 測試軟件,以上截圖是試到佢哋部三星手機,當連入 WiFi 嗰陣,顯示兩個 DNS 伺服器服務,一個係本地 IP 192.168.1.1 另一個係 114.114.114.114 地址。

網傳 Samsung 手機「資料送中」?上網行蹤直上 114DNS
▲ 網友又用 Router 防火牆做記錄,無論你自訂設定任何 DNS,它都總會連去 114.114.114.114 地址。

(screen cap 來自 HKEPC : 連結)(另有 lihkg 相關事件討論連結)
 

中國著名 DNS 服務供應商

呢間 114DNS 早期主力負責爲中國電信及中國聯通的用戶提供 DNS 服務。而身處中國大陸用戶如果使用 Google 8.8.8.8 會發現速度好慢、成日 Load 唔出網站,因爲中國有網絡審查以及 DNS 污染。而根據 114dns 官網宣傳旗下 DNS 服務高效、安全、反應快,所以成爲不少中國用戶的選擇。但因為 114DNS 係中國公司全權管轄,網友對此表示擔心,在討論區中多次表示擔心資料可能「送中」。

網傳 Samsung 手機「資料送中」?上網行蹤直上 114DNS

 

測試:真有其事

我哋用兩款三星行貨手機實測過,發覺真有其事。用 Note 20 及 S10 Plus 三星香港行貨,駁住 WiFi 作測試。全自動模式,用晒預設設定參數,再在瀏覽器上 dnsleaktest.com 再運作 DNS 伺服器追蹤測試,發覺除咗有當時 WiFi 網絡商「和記電訊」提供嘅 DNS 服務公司,會同時多咗一間叫 Cogent Commuincation 嘅 DNS 服務供應商。而呢間美國公司,背後老闆都係 114DNS。即係話,你用三星手機駁 WiFi 上網,會經過 Cogent Communication DNS 服務,再作連結。呢間跟中國有關公司,會睇到你去咗乜嘢嘅網站。

但令人最稱奇喺我哋第二組「斷網測試」,我哋嘗試把手動揀選 DNS 公司選項 (IP 靜態 模式下) , 填入「老作」嘅名稱。正路係上唔到網,但事實上,係上得到,而 DNS 服務,同樣由 Cogent Communication 提供。


網傳 Samsung 手機「資料送中」?上網行蹤直上 114DNS
▲ 用連上 WiFi 上網嘅 Samsung 手機,用瀏覽器進入 dnsleaktest.com,進行 extended 測試。呢個網站會嘗試找出手機會連結嘅 DNS 服務器。在沒有改動手機設定,不定期會測出連上 114DNS 旗下嘅 Cogent Communication 伺服器。
 

測試後小結

經過測試,我哋可以咁講
- 用三星手機,駁 WiFi 上網,至少我哋手頭嘅 Note 20 同埋 S10 Plus,會不定期自動連接「中國南京信風」 144DNS  服務。

- 而比較得人驚嘅係,就算我哋專登手動強行入錯嘅 DNS 地址,都會連上 114dns 再幫你上網,呢個情況,即係網友講嘅「有隱藏的 DNS 3 服務」,而其他品牌手機未發現呢個情況。

到底,呢個設計,係 Bugs 或是後門? 甚至如網友所言,DNS 查詢連接到中國公司控制嘅 Server 會「資料送中」或許是你擔心的事情? 但比較好嘅消息係呢兩部香港行貨嘅三星手機,連到嘅 114DNS 服務供應商 Coagent Communications,伺服器實體位置喺美國,南京信風雖然有資料控制權,但法律監管位置喺美國,佢哋應該會守美國嘅資料安全法例? 嘿嘿,信者得平安呀,老友~

此文章有 Smarttech HK Patreon 頻道提供,若想知道有無破解方法,了解更多 DNS 運作,呢次「資料送中」機會有幾大,立即進入 ePrice 嘅 Patreon 頻道 Smarttech HK,每月 US$5 起,有每日時政科技分析,通訊技術新聞分享。

三星手機 114DNS 事件文章 (部份為 Patreon 收費頻道限定)
​網傳 Samsung 手機「資料送中」?上網行蹤直上 114DNS
網傳 Samsung 手機「資料送中」?詳細測試 + 分析 + 破解 (Patreon 詳細解說版)
三星手機 114DNS 事件 更加驚人的發現 (Patreon 會員獨家內容)
三星手機 114DNS「資料送中」事件更進:升級後可解決?不過要等.....
多謝支持 ePrice.HK
您可能也喜歡▼