$2700 三星 5G 中階手機效能、影相如何?Galaxy A32 上手評測

2021-02-03 21:26
愈來愈多中價位嘅 5G 手機推出,不過唔知大家有無發現,撇除 Qualcomm S720G / S730G 不說,好似中低階嘅 5G 手機,多咗好多用 MTK U,就好似天璣 800U 咁。甚至連三星手機,都居然用 MTK U,最新推出嘅 Galaxy A32 5G,就係其中一部。版主就剛剛借得呢部 Galaxy A32 5G,到底呢部手機靚唔靚仔,用落性能又如何? 就等我極速同大家做個上手評測。看下文吧!

$2700 三星 5G 中階手機效能、影相如何?Galaxy A32 上手評測
 

三星 Galaxy A32 5G 實機外觀圖賞

一如既往都係由外觀部分說起,講到呢部 Galaxy A32 5G 嘅外觀,我會同大家講下呢部手機嘅好與壞。首先講咗好話先,呢部手機外觀上嘅優點,係個設計正正常常,玻璃機背具有無縫設計以及全新嘅鏡頭排列組合,6.5 吋芒有水滴額頭,而且有 3.5mm 耳機孔;而講到缺點,就相信大家都認同,就係無 FHD+ 芒,解像度只有 1600 x 720,以一部賣 $2698 嘅手機嚟講,仲係用緊 HD 芒,呢樣係爭啲。另外,無真三卡槽都係一個小缺陷。

呢部手機就有黑、白、藍、紫四種顏色,而我手上嘅 Galaxy A32 5G,則係黑色版本。我一收到部機,對佢第一個感覺係,佢個黑色玻璃機背好似 iPhone 8 機背嘅感覺,好唔好就見仁見智,我個人就對黑色覺得一般般,如果其他顏色可能會更好。
   

MTK 天璣 720? 未聽過? 即刻話你知效能係點

三星 Galaxy A32 5G 配備了 MTK 天璣 720 處理器,而呢部相信係香港推出首部用呢粒 U 嘅手機,效能係點,唔知,所以我哋就為大家測試一下,睇下佢係屬於大約 Qualcomm 乜嘢 U 嘅 Level。都係啦,我哋都係會用安兔兔同 AndroBench 5 嚟測試 CPU / GPU 以及 ROM 嘅讀寫速度,次次都固定用呢啲評測軟件測試,可以方便我哋去做比較。

而得出嘅成績如下:
 
根據安兔兔評測的跑分結果,得出的成績為 257400 分,當中的 CPU 成績為 83216 分,而 GPU 成績則為 62386 分。呢粒 U 相較天璣 800U 性能偏低 (天璣 800U 跑分成績為 295958 分),而如果用 Qualcomm U 嚟比較,就大約係 S730G 的級數 (據記錄用上 S730G 的小米 Note 10 Pro 成績為 261321 分)。

至於用來測試 ROM 讀寫速度嘅 AndroBench 5,連續讀取以及連續寫入的速度分別為 907.4 MB/s 以及 377.11 MB/s,呢個速度代表佢係用上 UFS 2.1; 而影響使用體驗嘅隨機讀取以及隨機寫入速度,則分別為 169.34 MB/s 以及 152.05 MB/s,有呢個速度理論上用起上嚟都會幾順暢。
 

三星 Galaxy A32 5G 四鏡頭成像質素即睇

相機部分,三星 Galaxy A32 5G 用上四鏡頭組合,分別為:

- 4800 萬像素高解像度鏡頭
- 800 萬像素超廣角鏡頭 (支持 123 度視角)
- 200 萬像素人像景深鏡頭
- 500 萬像素微距鏡頭

而到底各個鏡頭拍攝出嚟嘅質素係點?因為版主收到部手機已經接近夜晚,就等我同大家分享下用佢夜拍出嚟嘅成像係點啦!

1200 萬像素標準 VS 4800 萬像素高解像度拍攝
▲ 如果唔放大來看,就算你開咗 4800 萬像素高解像度拍攝,都唔覺得有太大差別。

$2700 三星 5G 中階手機效能、影相如何?Galaxy A32 上手評測

$2700 三星 5G 中階手機效能、影相如何?Galaxy A32 上手評測
▲而當你放大咗嚟睇,我覺得反而 1200 萬像素成像會比較平滑啲,而 4800 萬像素則顆粒較為明顯。 

800 萬像素超廣角拍攝
$2700 三星 5G 中階手機效能、影相如何?Galaxy A32 上手評測
▲ 超廣角鏡頭幫你拍到更多嘅景物,而 Galaxy A32 5G 拍出嚟嘅超廣角照片,算係合格範圍,但始終同其他手機嘅超廣角拍攝一樣,細緻度唔係太高。

200 萬像素人像景深拍攝
$2700 三星 5G 中階手機效能、影相如何?Galaxy A32 上手評測
▲ 人像拍攝模式畀你在 1-1.5 米範圍影完之後自行調節景深效果,而 Galaxy A32 5G 嘅景深邊緣算法還算準確,可以接受。

500 萬像素微距拍攝
$2700 三星 5G 中階手機效能、影相如何?Galaxy A32 上手評測
▲ Galaxy A32 5G 微距拍攝範圍為 3 - 5cm 之間,飲品上嘅細字可以近距離拍攝到。
 

小結

初步試完呢部三星 Galaxy A32 5G,我會認為喺影相部分,以一部二千零蚊嘅手機嚟講,都算係唔差,擺脫咗以前成日話 Galaxy A 系影相唔好嘅問題,唔係超正,但不過不失。外觀部分,就無乜太大挑剔,始終呢啲感覺好主觀,我覺得麻麻但總會有人鍾意,正如我覺得 Galaxy S21 嘅紫色幾靚,但仍有人唔 Like 一樣。至於效能,如果你唔係用嚟打機嘅話,其實都算係夠用,如果硬要打機,唔太高性能要求嘅 Game 相信都玩到嘅。對於呢部手機,網友又有乜評價呢? 鍾唔鍾意? 留言討論下啦!

三星 Galaxy A32 5G 在文章發表時,大舖賣價為 $2698,按這裡有詳細規格及最新賣價
 
您可能也喜歡▼