【忽發奇想】假如手機能成組合 邊幾部手機能入圍?

2021-12-31 19:46
ViuTV 選女團,搞咗場《全民造星 4》大龍鳳,又話乜乜 20 強全民投票,一半分數來自觀眾,一半分數來自評判,到頭嚟我覺得 ViuTV 自己本身心目中都已經有哂人選,場 Show 單純只係娛樂大眾,實際係唔係一個公平比賽?相信大家心中都有個答案。不過,我又忽發奇想,我哋就平時寫手機多啦,咁如果手機都可以變成一個組合,喺大家心目中,2021 又有邊幾部手機可以入到圍呢?大家可以留言講下,不過以下我就分享下我心目中嘅入圍名單先!

首先講下 2021 年推出嘅手機之中,我心目中嘅 Top 5 名單有邊幾部先,分別有:
 
第 1 名 iPhone 13 mini
第 2 名 Google Pixel 6 Pro
第 3 名 三星 Galaxy S21
第 4 名 Sony Xperia 5 III
第 5 名 OPPO Reno 6

咩話,有乜理由無呢部果部㗎?嗱,你鍾意邊部,就由你留言畀我聽,就算睇比賽都會有個人偏好啦,更何況揀我最欣賞嘅手機,好主觀㗎啫~當然,除咗個人偏好之外,我都會睇埋實用性、外觀、相機等方面,去決定我心目中嘅機選,而從上面我嘅排名之中,大家都應該睇得出,我嘅個人偏好就係細芒手機,而綜合外觀 + 性能 + 實用性等各方面,iPhone 13 mini 無可能唔係第一。而三星 Galaxy S21 同埋 Sony Xperia 5 III,同樣以細芒為定位,當然設計上唔係好特別,但我覺得呢兩款手機都係手感相當唔錯,使用體驗十分正。
 
ViuTV 選女團,最常聽到就係乜嘢唱歌擔當、跳舞擔當、RAP 擔當之類,計我話手機都可以有 XX 擔當,例如顏值擔當、性價比擔當、打機擔當、手感擔當。而喺我心目中,呢啲乜乜擔當,以下嘅手機絕對係實至名歸:
 
顏值擔當 Google Pixel 6 Pro
性價比擔當 小米 POCO F3
打機擔當 ASUS ROG Phone 5s
手感擔當 iPhone 13 mini
 
你會見到,以上有啲「擔當」手機,雖然入唔到我心目中嘅 Top 5,但係無可否認佢哋嘅定位相當清晰,例如小米 POCO F3 定位係一部好平嘅 S870 旗艦手機,而打機擔當老實雖然我無實際用過部 ROG Phone 5s 打機,但以我一直由 ROG Phone 2、ROG Phone 3 以至到而家用緊嘅 ROG Phone 5,我覺得打機嚟講市面上無一款手機係可以贏到佢 —— 當然你要先無視佢嘅價錢。

而老實講,點解 Google Pixel 6 Pro 會入到我心目中嘅 Top 5?並唔係因為有「親生仔」嘅光環,而係因為佢本身無論影相、性能都唔會差,兼且佢今代係有啲設計,令人一眼望落與眾不同,所以好自然咁入到我心目中嘅 List。最後 iPhone 13 mini 就唔使講啦,機仔細細性能勁影相唔差,絕對係無得輸!

你唔同意我嘅選擇?我想講我都唔同意《全民造星 4》評判嘅評分㗎,但選擇呢啲嘢就係咁主觀㗎啦~你唔同意,咪講下你心目中嘅 List 又係咩囉~【忽發奇想】假如手機能成組合 邊幾部手機能入圍?-5【忽發奇想】假如手機能成組合 邊幾部手機能入圍?-5