即衝!Nokia 四千電手機大舖減價,千頭好機推介

2021-08-12 19:34
大家收到第一期消費券,唔知已經開始用未呢?如果唔想一炮過用哂嗰 $2000 消費券,但又剛好想買部平平地千元手機自用,又有無咩好選擇?最近留意到有大舖將一部 Nokia 手機限時減價,一千頭就買到呢部四千大電嘅手機,又會唔會係一個可以考慮嘅選擇?而差不多價位嘅手機之中,大舖又有無其他選擇?睇下文啦!

即衝!Nokia 四千電手機大舖減價,千頭好機推介-0
 

Nokia 3.4 衛訊限時減價 $300

首先講下最近留意到大舖減價嘅消息,話說碌碌下 Facebook 就見到,衛訊即日起至 8 月 18 日,會有限時優惠,將 Nokia 3.4 減價清貨,由 $1398 減至 $1099,平咗 $300 左右,如果你用消費券買機嘅話,都仲有八百蚊剩。

不過,呢部 Nokia 3.4 規格係點呢?等我睇返 ePrice 關於 Nokia 3.4 手機資料庫先!原來,Nokia 3.4 係有 6.39 吋芒,解像度為 1560 x 720,配備 Qualcomm Snapdragon 460 處理器,內置 3GB RAM 以及 64GB ROM,規格唔高不過叫做有 4000mAh 電,正常使用一日所需一般都夠用。另外相機仲有 13MP 標準 + 2MP 景深 + 5MP 超廣角鏡頭,一千蚊左右用來影人像、超廣角風景相,叫一般正常需要嘅功能都有。

不過,大舖差唔多價位仲有無其他選擇呢?

即衝!Nokia 四千電手機大舖減價,千頭好機推介-1
 

Nokia C30

呢部手機版主 Keith 早前同大家分享過佢嘅開賣消息,講到規格,佢芒相比 Nokia 3.4 又大啲,有 6.82 吋 HD+ 屏幕,電又大啲,有 6000mAh,建議零售價都係 $1199。咁係咪應該揀呢部唔揀 Nokia 3.4?睇你為大電定點囉,效能嚟講呢部 C30 就輸蝕啲,配備 Unisoc SC9863A,但因為得 28nm 制程,其實電嘅數字大咗,唔代表續航好得過用四五千電嘅手機,內置 3GB RAM 以及 64GB ROM,運行嘅係 Android 11 Go 系統。

即衝!Nokia 四千電手機大舖減價,千頭好機推介-2
 

小米 POCO M3 Pro 5G

Nokia C30 無錯係大電啲,芒又大啲,但未必一定好過 Nokia 3.4,而講到呢個價位,其實小米 POCO M3 Pro 5G,或者都可以考慮一下。平平地得嚟又支持 5G,雖然話大家對 5G 需求唔係真係話太多,但無嗰陣又會覺得硬係爭咁啲,呢部 POCO M3 Pro 5G 仲用 MTK 天璣 700 7nm 處理器,性能上好過 Nokia C30 同 Nokia 3.4,而且有 6.5 吋 FHD+ 90Hz 芒以及五千大電,雖然價錢係比上面兩部貴少少,$1299 起,但或者會相對用得舒服啲嘅。

即衝!Nokia 四千電手機大舖減價,千頭好機推介-3

Nokia 3.4 在文章發表時,衛訊限時優惠價為 $1099,按這裡有詳細規格及最新賣價
Nokia C30 在文章發表時,建議零售價為 $1199,按這裡有詳細規格及最新賣價
小米 POCO M3 Pro 5G 在文章發表時,建議零售價為 $1299,按這裡有詳細規格及最新賣價
您可能也喜歡▼