「硬」係賣點,粗用必備!Nokia 三防 5G 手機 XR20 香港賣價

2021-10-05 18:30
回想以前,提到 Nokia 嘅功能手機,大家都會諗起,跌極都唔爛嘅形象,特別係 3310,當時被譽為「宇宙最強」,變態級耐用。而 Nokia 將呢項「硬淨」嘅優點,帶到今日智能手機市場,喺香港推出三防 5G 手機 XR20,最啱粗用。到底賣幾錢,睇下文啦!

「硬」係賣點,粗用必備!Nokia 三防 5G 手機 XR20 香港賣價-0

據版主收到嘅消息指出,Nokia XR20 香港建議零售價會係 $4198,預計於 10 月 20 日正式開賣。而作為一部支持三防的 5G 手機,到底這部 XR20 賣呢個價錢,係咪抵玩呢?咁我哋就要首先知道,到底呢部手機規格係點。

「硬」係賣點,粗用必備!Nokia 三防 5G 手機 XR20 香港賣價-1

如標題所講,Nokia XR20 嘅最大賣點,就係「硬淨」,最適合粗用嘅人。佢係一部三防手機,顧名思義即係防水、防塵、防撞,除咗擁有 MIL-STD 810H 軍規防撞規格,同時亦支持 IP68 防水防塵,理論上可於 1.5 米水深浸泡 1 小時。同時,佢亦支持 -22 度至 55 度耐熱耐寒能力。不過,佢個外型就唔係好似平時見到 CAT 果啲三防手機咁,成個坦克咁,而係似乎一部普通嘅手機外觀。

而其他規格方面,Nokia XR20 採用了 6.67 吋 LCD 屏幕,解像度為 2400 x 1080,屏幕用上 Gorilla Glass Victus,更加增添其堅硬程度,配備 Qualcomm Snapdragon 480 處理器,雖然係 4 系 U,但呢粒 U 具有中階級數嘅效能,一般日常使用依然夠用,同樣用上呢粒 U 嘅手機,係 Nokia X20 同埋 Nokia X10。手機具有 6GB RAM 以及 128GB UFS 2.1 ROM,內置 4630mAh 電池,支持 15W Qi 無線充電。相機只有雙鏡頭,分別為 48MP 標準以及 13MP 超廣角鏡頭,而前置鏡頭則為 8MP。另外,Nokia XR20 係一部 5G 手機。

Nokia XR20 在文章發表時,建議零售價為 $4198,按這裡有詳細規格及最新賣價