LG G4 行貨賣街! 格盡大舖細舖價,版主推介方案居然係....

2015-05-28 21:57
LG G4 香港行貨 (28/5) 今日上市,版主今日係免費報紙見到網絡商與 LG 自己都賣左唔少廣告。可能因為咁 Sony 今日亦公佈了 Xperia Z3+ 售價,兩部都係賣 $5698,都係有雙卡版本,較勁味道好強。今日版主行過場,其實你唔駛 $5698 都入到手。最聰明嘅方法,可能係俾多 $152 換一年無限上網服務。點樣出機好,睇實啦。

LG G4 行貨賣街! 格盡大舖細舖價,版主推介方案居然係....-0
 

連鎖電器店貨足無減價,細舖平幾舊

LG G4 香港行貨今日到場,難買嗎?版主係黃昏時段巡過旺角區及深水埗區嘅電器連鎖店與細舖,無論雙卡版定單卡版都有貨,連唔同款嘅皮背蓋都有得揀,絕對唔難入手。版主更係先達門口個間豐澤問過,版主目測見到成櫃都係貨! 嗱嗱嗱,唔代表無人買,貨量充都可能係好事。不過,問過百老匯、豐澤與衛訊,全部一蚊都無得減,$5698 單卡與雙卡都係一樣!  咁想平入手又點算好,深水埗嘅細店,好似鴨寮街嘅 M Phone,賣價就平兩舊水 $5498 買得到! 

LG G4 行貨賣街! 格盡大舖細舖價,版主推介方案居然係....-1
▲ LG G4 係連鎖電器店係充貨的,問過幾間旺角大舖,單卡、雙卡版不同皮背蓋都有貨。
 

網絡商零機價唔抵?有例外喎

之前都講過,網絡商都有大力大力咁推 LG G4,出過新聞稿通知嘅有 3HK 與 csl.,中國移動香港都有賣廣告嘅。但就算所謂零機價,上台月費貴得嚇死人,以 3HK 為例,所謂零機價出機,換來 $352 只有每月 1GB 用量,仲要 29 個月長約,好難用抵來形容。不過 Sun Mobile 上台 Plan 算係合理。佢地標 $4698 嘅上台價,可以用係 $96 限速 Plan,仲係短簽一年約,計埋月費,總出機成本只係比官方建議零售價貴 $152,除開每月 $12 就有 2GB 4G 限速 384kbps 上網,之後無限任用 128kbps 速度。當然一句,要上台,限速 Plan 又合用嘅話,呢個出機方法,算係一石二鳥嘅方法。Sun Mobile 上台大法,用係 Nexus 6 更加有平過連銷店賣價嘅情況

LG G4 行貨賣街! 格盡大舖細舖價,版主推介方案居然係....-2
▲ 上台 Plan,Sun Mobile 一向叫抵,抵在總出機成本唔會好貴,因為佢地門市個上台價,係容許 $96 最平個限速 Plan,仲要 12 個月短約。不過係咪抵玩,好視乎部機最平賣街價。好似 LG G3,出面都做緊三千幾左右,$3298 上台價又點會抵呢?但 LG G4 唔同,大店未減企硬$5698,上台價平一千,夾埋 $96 Plan 就抵用好多。提一提 Sun Mobile 只賣單卡版。
 

LG G3 行情膠著

LG G4 推出,更多人想上一代 G3 會唔會減價。今日版主行過大舖,價錢未有郁過,都係 $3998 (32GB 單卡或雙卡版本)。係深水場嘅 M Phone 就有三個價錢,分別係 $3398 (16GB)、$3498 (32GB) 同 $3598 (雙卡版)X。最平見到福仁有間版主相熟嘅 K-Digital 寫明香港版雙卡版本賣嘅 $3098,雖然比起旺角先達場內貴一百幾十,但都係平價入手「香港版」G3 嘅選擇來。

LG G4 行貨賣街! 格盡大舖細舖價,版主推介方案居然係....-3
▲ $3080 嘅 LG G3 係 4G 雙卡版本,32GB ROM

LG G4 正式推出,連鎖店暫未減價。LG G3 個價又唔多郁,你會買水貨 G3、轉買 Sony Xperia Z3+ 定係再等。你又有無 LG G4 平價入手地方好推介?齊齊發表意見 Share 吧。

在文章發佈的時侯, LG G4 單卡與雙卡版本,定價為 $5,698,按此看詳細規格和最新賣價。
多謝支持 ePrice.HK