回上一頁   到底部 

獨家爆 LG G7+ 新政策!買水貨可能再無未拆新機

2018-05-15 20:35
LG 手機曾經係香港玩機界神話,尤其係 G Pro 2 年代。但識玩都知,玩 LG 機,一係等行貨跌價 (近年唔多肯大跌了)一係入韓國水貨。韓水 LG 機比起行機,有唔少嘅差價。不過,版主收到風,為了保障行貨,LG 引入一個新政策,今買水貨嘅用家,會好麻煩。咁香港行貨用家,有無影響呢?都有!

獨家爆 LG G7+ 新政策!買水貨可能再無未拆新機


版主收風,由 LG G7 起 (香港會賣 G7+ ThinQ) 會引入 Regional Lock 政策。手機做 SIM Lock 一直係香港絕跡。日本機以前都有 Lock 機,要破解咗,先可以插入非日本 SIM 卡。版主知道,香港版 G7+ ThinkQ 會係中港澳三地版本,若果你買機後,立即用上唔係呢三個地區 SIM 卡,手機會被 LOCK 住唔用得。但呢個  Regional Lock 又跟以前 SIM Lock 唔同,只要你用一次當區 SIM 卡,以港版為例,就係香港,中國大陸或澳門網絡商 SIM 卡,插入半小時,咁 Regional Lock 會失效。之後,你用乜地區 SIM 卡都得。

呢個政策,似乎係保障香港行貨,唔會咁易賣比非中港澳三地用家。但同樣,若果你想買 LG G7+ ThinQ 香港行貨,送給外地親朋使用,你記得要先拆機,插 SIM 等半小時。

Regional Lock 係咪 LG 全球政策?報料人同我講好大機會。咁即係 LG G7 韓國水貨,由以前由韓國直運香港發售,要改為先拆機,再插當地 SIM,一來處理時間長咗,水機未必咁快運到香港,二來,成本大咗,會否要加價呢?版主問過賣韓國當地手機賣到出晒名,係先達有舖嘅三禾老闆 Simon。佢好驚訝呢個消息,表示暫時未聽過韓國本土 G7 會有此安排,但如果係真,當地代理都會處理得到。他表示:「LG 呢個政策其實好擾民,手機舖賣手機,都唔一定只賣本地人,外國人來香港買手機,會麻煩好多。」

唔知大家對 LG 呢個古怪政策,有什麼感想?

 
多謝支持 ePrice.HK
文章分享及讚好
會員回應
Facebook 發言
 回上一頁   回頂部