齊頻 5G!復古懷舊!Moto RAZR 開箱評測:型到爆!

2020-10-09 17:10
老實講,尋日版主出完報價之後,我都係對 Moto RAZR 無乜興趣,重點係 $12990 呢個價,點解我唔買三星 Galaxy Z Flip 5G? 不過今日版主見過部真機,上手掂過部機,明白到有啲嘢係三星部摺機畀我唔到,講型,其實 Moto RAZR 比起 Galaxy Z Flip 5G,真係型到爆。即刻喺現場極速同大家做個開箱評測!睇下文啦!

齊頻 5G!復古懷舊!Moto RAZR 開箱評測:型到爆!
 

Moto RAZR 開箱!包裝盒設計有心思

Moto RAZR 定位同三星 Galaxy Z Flip 5G 一樣,都係追求輕巧便攜,不過 RAZR 仲有一個更值得考慮嘅賣點,就係具有經典復刻嘅設計,好有以前 Motorola 摺機嘅感覺,係結合咗懷舊 + 現代嘅合成品。手機採用了弧形邊緣設計,並具有後置指紋感應器,比起 Galaxy Z Flip 5G 好嘅係,Galaxy Z Flip 5G 個芒點搞都仲係會有少少摺痕存在,但 RAZR 版主現場睇過,真係唔會見到有摺痕,呢個確實係幾唔錯!不過戴返個頭盔先,用耐咗會唔會都有摺痕,呢個我都唔知,反正現場果啲機見唔到有囉~

至於會唔會摺得多會易壞,Moto 表示進行過嚴格測試,包括反覆摺合、跌撞、溫度以及其他耐壓測試,可以承受 200,000 次摺合,而一般用戶每日平均摺合手機 40 次,高用量用家每日平均摺合 100 次,Moto 表示就算高用量用家起碼可以用到 5 年喎 (首先部機要捱到 5 年)。另外,手機特製保護塗層,可以做到防刮,而且仲有內部防水層,可以防濺水。

打開 Moto RAZR,會見到有 6.2 吋嘅 21:9 OLED Flex View 屏幕,不過佢就做唔到好似 Galaxy Z Flip 5G 咁,可以好有彈性咁控制摺芒嘅角度。而摺埋部 Moto RAZR 之後,亦都會見到有個 2.7 吋 Quick View 觸控式副芒,可以快速用副芒做一啲簡單嘅操作,有趣嘅係,副芒連 PUBG 都可以開得到。當然,我哋就唔會傻到走去用個細芒去玩 PUBG 啦,佢個芒個實用功能,係如果你收到訊息之類,可以直接喺副芒度回覆就 OK,唔使揭開部手機。
  齊頻 5G!復古懷舊!Moto RAZR 開箱評測:型到爆!
▲ 有一個好型嘅功能,叫做「Retro Razr」,佢嘅作用係將屏幕畫面變成經典 Moto 手機嘅介面,好似下圖咁:

齊頻 5G!復古懷舊!Moto RAZR 開箱評測:型到爆!
▲ 連舊機「起哂格」嘅畫面都做到足,似到十足十。
 

配 S765G 處理器!Moto RAZR 效能測試

Moto RAZR 配備了 Qualcomm Snapdragon 765G 2.4GHz 處理器,內置 8GB RAM 以及 256GB ROM,不過電量就細啲,得 2800mAh。而版主都循例同大家做一做效能測試,用安兔兔評測測試 CPU / GPU 成績,用 AndroBench 5 測試 ROM 的讀寫速度。成績如下:

齊頻 5G!復古懷舊!Moto RAZR 開箱評測:型到爆!
▲ 安兔兔跑分為 292522 分,呢個成績比起正常 S765G 手機跑分低,一般 S765G 手機跑分大約為 33 萬左右 (vivo X50 / X50 Pro 分別為 324116 以及 333322 分,小米 10 Lite 都有 322825 分)。當中的 CPU 成績為 87597 分,而 GPU 成績則為 92455 分。

齊頻 5G!復古懷舊!Moto RAZR 開箱評測:型到爆!
▲ 連續讀取 / 寫入速度分別為 914.49 MB/s 以及 462.52MB/s,呢個速度代表佢個 ROM 係用上 UFS 2.1。而隨機讀取 / 寫入速度則為 131.93 MB/s 以及 115.16 MB/s,代表使用體驗還算不錯,唔會話超級順暢,但又唔會慢。
 

48MP 單鏡頭!Moto RAZR 實拍速睇

Moto RAZR 配備咗 48MP 相機,支持 OIS 光學防震,配備 Quad Pixel 技術,低光靈敏度提升 4 倍,而光學圖像穩定功能可彌補圖像及影片模糊情況,呈現細膩清楚嘅細節。另外,自拍都係用返同一個鏡頭,ToF 感應器加入雷射自動對焦技術,Moto 表示可以令相機更快對焦拍攝。

單鏡頭影出嚟質素如何?畀兩張相大家評下啦:

齊頻 5G!復古懷舊!Moto RAZR 開箱評測:型到爆!
▲ 得益於 48MP 高像素鏡頭,保留足夠的細緻度,咖啡機上嘅細字,放大後可以清楚睇得到。

齊頻 5G!復古懷舊!Moto RAZR 開箱評測:型到爆!
▲ 而拍攝出嚟嘅成像,色準、顏色都是合格質素。不過日拍其實部部手機影出嚟都唔會相差好遠,而因為手機無得借走,無法測試夜拍水平如何,呢點有少少可惜。
 

小結

用咗唔夠半個鐘嘅時間,簡單玩過吓部手機,覺得呢部 Moto RAZR 其實真係幾正,若果唔睇價錢,純以玩機角度,呢部手機都算係有啲睇頭,總有唔少人會鍾意啲經典復刻嘅嘢吧~初步睇手機都算係流暢,而且呢部手機唔單止支援 5G,而且仲要係齊頻,香港用嘅 5G 頻段,包括 n79 佢都有支持,呢個係值得一提嘅優點,如果唔係 csl. CMHK 呢啲網絡商去到結界區,無 5G 用就有 5G 機都無用啦~網友又對呢部手機有無興趣呢?留言討論一下吧!
 
您可能也喜歡▼