企硬唔減定大劈價? 版主即查 ASUS ZenFone 3 系列預訂情況

2016-07-13 19:46
而家大部份手機廠商推出新手機,都因為擔心會唔賣得,未開賣淨係預售,就已經急不及待做大舖減價優惠,就好似 HTC、Sony、LG...... 就算強大如 Samsung,都係一樣,唔理係 S 系列旗艦機定近期 C 系列中階機,總之一預訂,唔講咁多,先減價,希望可以吸引到更多客仔。而華碩 ZenFone 3 以及 ZenFone 3 Ultra 今日起有得預售,又會唔會都按照慣例,做到「一出即減」呢? 睇下文啦!

企硬唔減定大劈價? 版主即查 ASUS ZenFone 3 系列預訂情況-0

ZenFone 3 系列香港賣價昨日一出,十個有九個網友都認為,定價太貴,憑甚麼? 而通常到呢個時候,版主都會安慰一下大家,同大家講,家陣啲建議零售價根本就無參考價值,因為通常手機一出,都已經即刻有減價優惠,所以睇結果才是最實際。係嘅,但係凡事總有意外......正當大部份手機廠商都要減價吸客之際,華碩卻似乎自信心爆棚,要反其道而行,版主今日行場時向大舖一問,得出結果居然係:華碩企硬,預售唔肯減價!到底是哪來的自信呢?

企硬唔減定大劈價? 版主即查 ASUS ZenFone 3 系列預訂情況-1

當版主行大舖的時候,未見有 ZenFone 3 以及 ZenFone 3 Ultra 預售的海報貼出黎,從職員口中得知,ZenFone 3 5.2 吋版本照舊賣 $2399,而 5.5 吋版本則賣 $2799,兩個版本暫時都係得黑色,買機會送 Type-C 線一條。至於 ZenFone 3 Ultra 亦企硬高位,$4699 價錢,暫時得銀色,會送原廠 Flip Cover。至於其他顏色,大舖職員則表示,預計要到八月先會有貨。呢一刻,相信大家可能會好失望,但係,未到發售果日,都未知最終會賣幾錢,有大舖職員都表示,或者到正式開賣果日,就會有減價呢!網友認為,ZenFone 3 系列要減幾多,先叫做可以接受呢? 留言講下啦!

ASUS ZenFone 3 系列評測 + 相關文章
隱藏版 ZenFone 3 現身! ZenFone 3 系列開賣,二千四有找,香港價合理?
6.8 吋大芒進擊! 四款 ASUS Zenfone 3 兩分鐘,你會識揀
開箱!Zenfone 3 仲係性價比之王嗎?
6.8 吋手機!ASUS Zenfone 3 Ultra 全面實測
企硬唔減定大劈價? 版主即查 ASUS ZenFone 3 系列預訂情況

ZenFone 3 (5.2 吋) 在文章發表時,賣價為 HK$2399,按這裡有詳細規格及最新賣價
ZenFone 3 (5.7 吋) 在文章發表時,賣價為 HK$2799,按這裡有詳細規格及最新賣價
ZenFone 3 Deluxe 在文章發表時,香港上市日期未定,按這裡有詳細規格及最新賣價
ZenFone 3 Ultra 在文章發表時,賣價為 $4699,按這裡有詳細規格及最新賣價
發表於 2016-07-14 14:54
2 樓
"華碩企硬,預售唔肯減價" 我想問會唔會觸犯競爭條例?