某台出 SMS 講明最快 21/9 有貨！
今日唔少某大台嘅網友，會收到一個 SMS 短訊，居然是叫你今日去某台續約及用指定上台計劃，就可以極快速度，iPhone XS / XS Max 開賣日，即聽日 21／9 出到真機！版主跟咗 iPhone 開賣新聞咁多年，網絡商首日最多只會賣俾「貴」客，即用咗好多年，或者係 VIP 嘅客人，出晒 SMS 叫人提早簽約就有機，係十分少見嘅舉動。
中國聯通香港仲誇張，出埋 Facebook 講明提早上台，iPhone XS / XS Mas開賣首日就有得攞機。而佢哋要求嘅上台計劃，只係普通 SIM Only 嘅大中華計劃，最平月費未計行政費只係 $220，已有 8.5GB 中港澳台共用數據，抵過其他台多多聲。最重要係首賣日，就有機！中國聯通香港都好多貨？可以話散就散？
▲ 中國聯通香港都提早叫人上台，開賣日即可購入新 iPhone。
網絡商代表爆料：登記預訂人數比上年少一半
供與求，是經濟學的入門，網絡商不用惜售，可能只係因為佢地有足夠貨源，未必係新 iPhone XS / XS Max 係香港需求比起以前減退。不過，版主又聽到網絡商代表跟版主講，今年做開嘅預留出機名額，登記人數大副減少。我問佢少咗幾多人登記，佢話比起上年 iPhone X ，少咗一半左右。其實，今年網絡商對 iPhone XS / XS Max 比起往年相對低調，有兩間網絡商只係出 email alert 放下出機月費網址就算，什麼賣點也不列出來！比起三星 Note 9 等出機的長長新聞稿，有天淵之別，或多或少反應網絡商推廣呢次 iPhone 力度，不及以前。
▲ 包括 SmarTone、HKBN 及 csl 嘅 iPhone XS 及 XS Max 開賣新聞通知都十分 hea 做，感覺都唔係好想記者去寫一樣。
大家嘅圈子上面，又有幾多人第一時間出機呢？齊齊講兩句！