iPhone eSIM 懶人包!十個經驗談 +儲值卡市場分析

2018-11-01 20:29
iOS 12.1 升級,迎來 eSIM 嘅面世!eSIM 即係換手機唔駛再用 SIM 卡,SIM 資料記存係手機到,轉 Plan 係手機攪掂晒!本來話香港無咁快有份,但網絡商似乎為爭第一,好投入。ePrice 早前搶先全港,獨家爆香港會有 eSIM 用,估唔到唔止一間咁少!eSIM 真係咁好用?睇咗呢個懶人包,你會明!

iPhone eSIM 懶人包!十個經驗談 +儲值卡市場分析
 


001:eSIM? 返去 CDMA 手機年代?轉號碼要轉埋手機?

當年 GSM 手機可以敗走 CDMA / DAMPS 其中一個原因是用上 SIM 卡!換手機,只要把 SIM 換上就可以,不一定要換埋手機轉埋台。eSIM 即係變番上台及個人資料儲番係手機到,係咪大倒退?當然唔係,今日技術已好唔同,啟動 eSIM 不用人手認證,用email 寄 QR Code 給用家就可以啟動,手機仲可以儲多過一個 SIM number 及計劃!
 

002:咁乜手機用到?

以香港行貨來講,暫時只有 iPhone XS 一款。而中國、香港及澳門以外嘅 iPhone XS Max 及 iPhone XR 都會支援 eSIM。大家不要忘記仲有 Google Pixel 3 及 Pixel 3 XL!
 

003 : 水貨機用到嗎?

eSIM 存在,其中一個原因是方便漫遊時,用到當地嘅數據計劃,照道理是應該沒有水貨限制!若果你覺得香港得 iPhone XS 一款,無乜選擇,你大可以買水貨嘅。事實上,版主剛買了 3 香港的 eSIM 漫遊儲值卡予台灣 ePrice 的 iPhone XS Max 作測試,已順利把 eSIM 寫入手機並可以上網,證明水貨機都用到本地 eSIM 服務。
 

004: Google Pixel 3 / Pixel 3 XL eSIM 香港支援嗎?

暫時未有人測試到,但 eSIM 是國際標準,相信未來 Pixel 3、Pixel 3 XL 也用到 eSIM 嘅。不過咁,Pixel 3 / Pixel 3  XL 支援 eSIM 也不會是雙卡雙待,因為兩款手機,每款機只有一個 IMEI,只能作單卡操作,跟 Apple 造法不一樣。
 

005:一部手機,可以儲存幾多張 eSIM ?

Apple 網站,沒有明確說明一部 iPhone 可以儲入幾多張 eSIM,但可以肯定係多過一張,有網絡商人員跟版主說,可以儲存 8張!儲 8 張 eSIM 有乜用?假設之後 eSIM 成為大熱,手機其實可以儲存多過一張漫遊 SIM,或者其他副卡,因為 eSIM 之間,是可以切換使用,就好似你轉 SIM 卡咁,但手機按幾個掣,唔駛插換實體 sim,亦唔怕會跌咗,係方便嘅。
 

006:一部手機,只可以同時使用一張 eSIM + 一張實體sim ?

一部手機,是可以同時使用一張 eSIM + 一張實體 nano sim 同時收訊,跟普通雙實體 SIM 一樣,可以做到雙卡雙待,安排呢一張上網,嗰一張接聽電話等。而一部手機,亦可同時使用兩張 eSIM ,做到上面講嘅同樣功能。但若果你兩張 eSIM 同時使用,實體 SIM 部份,就唔可以再用啦!
 

007:手機壞咗,送修等待打唔到電話?

因為 eSIM 是嵌入到手機裡面,因此手機送修時,無法好似實體卡咁,囉出來換到其他手機上用,因此手機送修之後就無法用原本號碼撥打電話,你可能要問網絡商轉一張實體 SIM 或再把 eSIM 轉入另一部手機裡面。
 

008:如果唔用 iPhone XS ,即唔用  eSIM 的話要點先補回實體 SIM 卡

可到網絡商門市更換( Lost SIM 之類手續)
 

009:eSIM 可以做 MNP 帶號上台嗎?

eSIM 只是提供服務其中一個媒體,基本上,上台流程與實體 SIM 卡差不多,重點就是要沒有合約係身,先好去其他網絡商辦理 eSIM MNP 帶號上台手績。
 

010:香港有邊間網絡商,提供 eSIM 服務

文章刊登時,只有 3 香港、csl 及 1010 提供。其中,3 香港提供數據漫遊 eSIM 服務,暫未有上台 eSIM。而 csl 及 1010 及 club sim 容許客戶更換 eSIM 不另收費。
 

最後,會否滅絕儲值卡市場分析?

版主認為,以 Apple iPhone 嘅 eSIM 操作及一機可儲多張 eSIM 嘅方式,會令未來儲值卡仲有生存空間,只要網絡商肯把 eSIM 技術,下放至 MVNO 及代理使用。而根據版主買 3 香港 eSIM 儲值卡經驗,網絡商只要求你輸入任何一個電話號碼,任何一個 eMail address 用作啟動 QR Code,再用信用卡付款。eSIM 太空卡,其實是絕對可以存在,只要香港政府不會攪手機號碼實名制就可以了。
多謝支持 ePrice.HK