iPhone 11 可能有得炒?版主猜測有這可能性!網友齊來討論下!

左定坤 (Cho Ting Kwan) 2019-09-10 18:58 | Apple
今晚凌晨一時正,Apple 就正式發表 iPhone 11 系列新機,按照傳聞消息指出,將會有三部新機,分別為 iPhone 11、iPhone 11 Pro 以及 iPhone 11 Pro Max,以取代現有的 iPhone XR、iPhone XS 以及 iPhone XS Max。而每年出新 iPhone,其中一個重大的意義,就係有無得炒!事實上,iPhone 有得炒呢枝歌仔,早在一兩年前已經無,就算有得執都係一百幾十,今年情況會唔會有唔同呢?我哋一齊討論下!

FB.jpg


以前 iPhone 點解會有得炒?果陣時 iPhone 仲有點特色,都係其次,最主要係大陸無首賣,大陸人要買 iPhone,就要落嚟香港買,咁自自然然會形成有「炒價」的現象,好合理。但近呢幾年中國都有首賣,而且大把貨,香港貨無大陸人接,又邊仲有得炒呢?所以呢幾年炒情都相當慘淡,好多時都出現「日全蝕」現象,亦即是說開賣第一日,回收價已經跌穿建議零售價。

今年情況會唔會不一樣呢?雖然問過好多深水埗、先達店舖,大家似乎都唔係太睇好 iPhone 11 系列會有得炒,但版主有諗過,會唔會存在着一種可能性,就係今年中美貿易戰鬥得咁勁,會唔會 Trump Trump 又玩嘢,突然命令 Apple 唔畀中國參與今年的首賣?會唔會有咁嘅可能性,你當版主吹下水咁講,但唔可以話完全無呢個可能性,呢個 moment 亦真係無人知會唔會突然玩嘢,要到發佈會完後,等 Apple 自己公佈。但假如中國抽起無首賣,又有機會會令 iPhone 炒情死灰復燃!想知結果,就要留意今晚的發佈會,或者聽日起身睇版主文章喇!

歡迎 Follow 我哋 ePriceHK Telegram Channel,收取最新手機、科技及每日優惠資訊。
立即 Click 入:  ePriceHK Telegram 產品優惠科技資訊頻道
https://telegram.me/ePriceHK
Click 入有關 ePrice.com.hk 嘅 Telegram 頻道介紹

最新新聞