iPhone 13 mini 開箱 性能相機評測!細芒控必買 但我不買的理由是......

左定坤 (Cho Ting Kwan) 2021-09-24 03:19 | Apple
入行玩手機咁多年,上手過咁多唔同嘅手機,我發覺自己嘅喜好,變咗好多,由當初成日講到鍾意大芒,而且入行前仲用部當時叫做「巨芒」嘅華為 Mate 7,但玩得多唔同嘅手機之後,發覺唔係「大」就係好,唔適合你嘅,勉強無幸福。原來,我心底入面,係一個細芒控,因為我天生「女仔手」,好細隻,一手無法掌握令我跌爛過無數手機,就算我而家用緊都唔算大嘅 iPhone 11 Pro,都仲係嫌大。咁啱最近我部 iPhone 11 Pro 又意外爛咗,我都對 iPhone 13 mini 有啲興趣,但上手試過 iPhone 13 mini,係咪真係我杯茶?下文我就同大家開箱分享一下啦!

FB

iPhone 13 mini 開箱上手:可惜都係玻璃機背,美中不足

首先我會由外觀部分講起,其實關於呢方面,我係好 care,可能我本身係個外貌協會會員,外觀大過天,外觀唔吸引,佢個餡幾好,都唔係我杯茶。iPhone 13 mini,一部細芒機,屏幕尺寸 5.4 吋,其實好啱我口味。一手掌握,好舒服,但其實拎上手感覺,同上代 iPhone 12 mini 都差唔多,你可以話,呢樣係細芒機嘅價值所在,基本嘢,但係咪因為咁,我就一定買佢?

對我嚟講,iPhone 13 mini 外觀,雖然同上代差不多,差別唔大,但我認為呢個正係我今代都唔打算換佢嘅原因。我最唔鍾意,係佢依然用上玻璃機背,而呢種質地最大問題,係容易痴手指膜,而比較完美主義嘅我,並唔係太接受到呢點。其實,我唔介意佢屏幕正面個 M 字額有定係無,亦唔介意到底個瀏海有無窄到,但我會介意機背痴哂手指膜。所以,我一直都好希望,iPhone 13 mini 係用返好似我手上嘅 iPhone 11 Pro 咁,果種磨砂質感嘅材質。

不過,會介意呢點嘅,一般都係好似我咁,鍾意裸機嘅人,一般人用手機,都會笠返個保護殼,所以對於大部分人嚟講,磨砂唔磨砂,用乜材質,都未必係乜大問題。而如果 iPhone 13 mini 配返原廠保護殼,撇除個人對外觀方面主觀感受,其實無論手感定 size,都係相當 perfect。
   
IMG_5231.JPG
▲ 笠個套就唔怕沾指紋問題。

IMG_5234.JPG
▲ 細機最適合「女仔手」嘅我,可以一手掌握。

性能完勝 S888!iPhone 13 係細芒旗艦代表作

再來就係效能部分,iPhone 13 mini 係用上 A15 Bionic 處理器,呢粒處理器同 採用咗 5nm 制程,nm 數值愈低,代表理論上會更加慳電。不過點解會話理論上?好似 Android 陣營所用嘅 S888 處理器,同樣都係 5nm 處理器,但並不見得真係特別慳電,所以 iPhone 13 mini 用 5nm,係咪代表真係慳電,呢樣並唔係版主用果一晚時間,就可以確切感受得到嘅事。所以,Apple 官方講到,iPhone 13 mini 續航比上代長 1.5 小時,只能信住先,但比上代多 1.5 小時,係咪真係就夠大家用呢?我記得有朋友買咗 iPhone 12 mini,講到舊電好倒水咁,咁喺好倒水嘅情況下多 1.5 小時,係咪真係叫好咗呢?呢樣就真係見仁見智。

言歸正傳,iPhone 13 mini 所用嘅 A15 Bionic 處理器,到底性能方面係點?版主照常用 AnTuTu 安兔兔評測軟件結果做個參考,得出總分有 816286 分,呢個成績比起 Android 旗艦常用嘅 S888 都要高,當中 CPU 成績有 214804 分,而 GPU 成績則有 336661 分,無論係 CPU 定係 GPU,都完勝所有用 S888 處理器嘅手機,亦係現時細芒旗艦嘅代表作。

IMG_0110.PNG

加入電影效果模式!iPhone 13 mini 基本拍攝成像 + 相機新功能試玩

同上代一樣,iPhone 13 mini 都係得雙鏡頭,一個用來標準拍攝,另一個則係用來超廣角拍攝,而規格都係 12MP。而 Apple 永遠都會話自己相機成像質素靚咗,又點點點,係咪真係質素影得好,其實網友自己肉眼睇,自己感覺得到。下面轉頭會畀相大家睇。

反而我想講下,iPhone 13 mini 新增咗嘅功能:電影效果,呢個功能以前係無嘅,而佢有咩用呢?作用就係,喺拍片嘅時候加入景深效果,而且能夠喺拍攝期間進行對焦轉換,而用呢個模式拍完條片之後,仲可以後期切換焦點以及光圈值 (F2.0-F16),效果都幾明顯,而如果我用 iPhone 13 mini 嚟影小朋友,想喺條片突出佢嘅話,呢個模式啱哂我。

可惜版主今天不回家,咁唯有用死物去示範畀大家睇啦:


▲ 你會見到喺影片中,景深都相當明顯,而從 MacBook 與 Redbull 罐之間切換焦點,都算係自然流暢。

螢幕截圖 2021-09-24 上午2.53.44.png
▲ 去相簿搵返條片,按下編輯,入面你可以見到可以後期切換焦點以及光圈值,而光圈值可以從 F2.0 至 F16 之間進行調整。

標準拍攝 VS 超廣角拍攝
 

IMG_0099.jpg
IMG_0100.jpg
▲ 第一組。 
 

IMG_0101.jpg
IMG_0102.jpg
▲ 第二組。 
 

IMG_0108.jpg
IMG_0109.jpg
▲ 第三組。

從以上三組的照片中,可以看到在夜間拍攝之下,iPhone 13 mini 拍出來的照片,比起肉眼看更光亮,你可能會覺得與肉眼所見的不符,但或者呢個係 iPhone 13 mini 夜拍上嘅優點之一,主要多得佢用上雙相機系統之中歷來最大嘅感應器,具備 1.7 微米像素,聚光能力提升咗 47%,所以有助夜拍時成像更光亮。

不過,雖然佢超廣角相機換上全新感應器,話可以喺相片陰暗位減少雜訊,呈現更多細節,但我覺得放大嘅話,雜訊問題依然存在。不過,縮圖無限好,你要 share Facebook IG,100% 肯定夠用。

小結

老實講,iPhone 13 mini 真心唔差,影相靚,性能勁,又係細芒,啱哂我呢啲細芒控。然而,呢個唔構成我買機嘅理由,因為外型方面,我覺得美中不足,追求完美嘅我,希望等佢再完美啲,我先再考慮。最好,換上磨砂機背,我會開心啲。不過,呢啲係主觀意見,我唔買亦係我個人抉擇。唔知大家又鍾唔鍾意細芒機,又會唔會考慮買呢部手機呢?

相關產品 (1)

相關報導 (3)

iPhone 13 mini 開箱 性能相機評測!細芒控必買 但我不買的理由是......

iPhone 13 mini 開箱 性能相機評測!細芒控必買 但我不買的理由是......

入行玩手機咁多年,上手過咁多唔同嘅手機,我發覺自己嘅喜好,變咗好多,由當初成日講到鍾意大芒,而且入行前仲用部當時叫做「巨芒」嘅華為Mate7,但玩得多唔同嘅手機之後,發覺唔係「大」就係好,唔適合你嘅,勉強無幸福。原來,我心底入面,係一個細芒控,因為我天生「女仔手」,好細隻,一手無法掌握令我跌爛過無數手機,就算我而家用緊都唔算大嘅iPhone11Pro,都仲係嫌大。咁啱最近我部iPhone11Pro又意外爛咗,我都對iPhone13mini有啲興趣,但上手試過iPhone13

左定坤 (Cho Ting Kwan) | 2021-09-24
iPhone 13、mini、Pro、Max 規格詳情 + 香港賣價 +發售日

iPhone 13、mini、Pro、Max 規格詳情 + 香港賣價 +發售日

經過一整年的網路傳聞洗禮,蘋果在今(15)日的線上發表會中,一如外界預期發表了2021年度新款iPhone智慧手機,型號也並未避諱,直接稱為iPhone13。iPhone13一如上一代iPhone12系列,一口氣推出四個型號:iPhone13mini、iPhone13、iPhone13Pro與iPhone13ProMax,四款機種將於9/17展開預購,9/24上市。#iphone13

Jason | 2021-09-15
iPhone 13 / 13 mini 價格平咗!Pro 版同上年同價 新增 1TB

iPhone 13 / 13 mini 價格平咗!Pro 版同上年同價 新增 1TB

Apple發佈會終於完喇!太感動了!但不代表版主可以睡,只是代表可以繼續專心工作!發佈會完,Apple例牌會在官網更新新iPhone的香港價錢,到底今年的iPhone13系列,包括iPhone13、iPhone13Pro、iPhone13ProMax以及iPhone13mini,香港會賣幾錢呢,幾時開賣呢?一表話你知!#iphone13

左定坤 (Cho Ting Kwan) | 2021-09-15

最新新聞