極速到港!立即睇華為摺芒機 P50 Pocket 水貨賣價

2021-12-24 18:40
華為尋日先喺中國大陸發表咗直向式摺疊屏幕手機 P50 Pocket,估唔到水貨勁快就到港,率先到港嘅係 8GB RAM + 256GB ROM 版本,第一水賣價為 $13800,呢個價錢相比中國賣價 8988 人民幣高 $2800 左右,不過花粉會唔會搶先入貨支持華為呢?

規格方面,華為 P50 Pocket 打開會有 6.9 吋主屏幕,屏幕尺寸為 21:9,支持 120Hz 屏幕刷新率,而將佢對摺後會見到,機身會有兩個大圈圈,一個就係裝住三鏡頭,而另一個則為副屏幕,自拍果陣亦可以透過副屏幕見到自己,變相可以用主鏡頭去拍出高質素嘅自拍相。而手機配備 Qualcomm Snapdragon 888 處理器,不過就唔支持 5G。

相機部分,華為 P50 Pocket 用上首創 XD Fusion Pro 超光譜影像技術,更能突出畫面氛圍感以及提升人像膚質,具有 4000 萬像素原色鏡頭、1300 萬像素超廣角鏡頭以及 3200 萬像素超光譜鏡頭,並且具有補光燈以及激光對焦傳感器,支持超級人像拍攝,即使在逆光下都能拍出清晰的人像照片,在昏暗環境下也能拍得可見度高的照片。