實體肩鍵爽過 ASUS ROG 5? 黑鯊 4 上手評測 + 玩後體驗分享

2021-05-07 21:10
唔知大家平時打機,玩開咩嘢 Game 呢? PUBG Mobile 曾經 hit 過一段時間,而家大家仲有無玩呢? 的而且確現時係少咗好多人玩,但版主有時老婆仔女訓哂覺,夜瀾人靜嘅時候,都會開嚟玩吓 (雖然近期少咗玩 PUBG 多咗玩 Switch 嘅芒亨,我諗呢期好多人都係玩芒亨)。由 2019 年開始,我打機就一直用 ASUS ROG Phone 2,近期開始轉 ROG Phone 5,點解用佢,因為市場無對手,尤其佢嘅肩鍵玩槍 Game 最爽。但而家終於有另一部手機吸引到我,佢就係黑鯊 4,即場借走做開箱評測,順便比較下同 ROG Phone 5 感覺有乜唔同。事不宜遲,Let's Go!

實體肩鍵爽過 ASUS ROG 5? 黑鯊 4 上手評測 + 玩後體驗分享-0
 

144Hz 屏幕刷新率 + 720Hz 觸控採樣率 秒殺 ASUS ROG Phone 5?

作為一部電競遊戲手機,對我嚟講無可能無內置肩鍵,尤其玩槍 Game 最有用。所以我一直都話,ASUS ROG Phone 系列呢方面確實係幾成功,又咁講,以前黑鯊呀、RAZER 呀出所謂嘅電競手機,實在太失敗,想要有類似肩鍵嘅功能,你仲要另外買個配件,進一步咁講,都唔方便啦。而黑鯊終於聽到我嘅聲音,知道打機嘅人有啲乜需要,今次呢部黑鯊 4,終於加入咗肩鍵,而且係實體,而非 ROG Phone 5 嘅所謂超音波觸控設計,我個人咁睇,覺得有實體鍵實在好太多,撳係幾好撳嘅,但黑鯊 4 係咪真係畀到好正、好得心應手嘅遊戲體驗畀我,反應夠唔夠快,呢個係後話,講咗手機外型先~

雖然一部遊戲手機嚟講,個樣就唔係重點,但都要講下。今代黑鯊 4 外型上比以前係普通咗,但相對以前嘅設計,「陸味」無咁重。屏幕尺寸又係同其他小米手機咁,都係同一個模,都係 6.67 吋,解像度 2400 x 1080,對比度 5,000,000:1,用咗穿窿芒設計,不過個窿直徑唔大,只有 2.76mm,算係比大部分穿窿芒手機細。另外,黑鯊 4 同 ROG Phone 5 一樣,都係支持最高 144Hz 屏幕刷新率,同時亦可按照個人喜好同需要,自訂 120Hz、90Hz 或 60Hz 嘅屏幕刷新率。

仲有一點,ROG Phone 5 觸控採樣率都只係 300Hz,講到觸控延遲只有 24.3ms,好似好勁,但黑鯊 4 有成 720Hz 嘅觸控採樣率,理論多指觸控延遲低至 8.3ms,遊戲中嘅最低槍擊延時亦低至 24ms。觸控採樣率愈高,代表屏幕接收到你手指發出嘅指令後,作出嘅反應時間亦會愈快。

實體肩鍵爽過 ASUS ROG 5? 黑鯊 4 上手評測 + 玩後體驗分享-1
▲ 黑鯊 4 包裝盒。

實體肩鍵爽過 ASUS ROG 5? 黑鯊 4 上手評測 + 玩後體驗分享-2
▲ 包裝盒側面見到寫住支持 Hi-Res Audio。

實體肩鍵爽過 ASUS ROG 5? 黑鯊 4 上手評測 + 玩後體驗分享-3
▲ 跟機配件有火牛、Type C 充電線以及硬膠殼。

實體肩鍵爽過 ASUS ROG 5? 黑鯊 4 上手評測 + 玩後體驗分享-4
▲ 火牛支持 67W 快速充電。

實體肩鍵爽過 ASUS ROG 5? 黑鯊 4 上手評測 + 玩後體驗分享-5
▲ 6.67 吋 1080p 屏幕。

實體肩鍵爽過 ASUS ROG 5? 黑鯊 4 上手評測 + 玩後體驗分享-6
▲ 前置鏡頭個窿好細。

實體肩鍵爽過 ASUS ROG 5? 黑鯊 4 上手評測 + 玩後體驗分享-7
▲ 機背設計無以前咁浮誇,陸味都無咁濃。

實體肩鍵爽過 ASUS ROG 5? 黑鯊 4 上手評測 + 玩後體驗分享-8
▲ 具有三鏡頭。

實體肩鍵爽過 ASUS ROG 5? 黑鯊 4 上手評測 + 玩後體驗分享-9
▲ 機底有充電插槽以及 3.5mm 耳機孔。少少使用感:因為 3.5mm 耳機孔打橫部手機係設於下方位置,當你使用肩鍵而又用有線耳機果陣,會頂住好唔就手,而 ASUS ROG Phone 5 設於上方,會感覺無咁頂住手掌,打機會舒服一啲。所以如果你用肩鍵又打機,最好就唔好用有線耳機,戴返藍牙耳機啦!

實體肩鍵爽過 ASUS ROG 5? 黑鯊 4 上手評測 + 玩後體驗分享-10
▲ 右側除咗有結合指紋辨識嘅電源鍵,上下兩方都會有肩鍵以及肩鍵嘅開關,開咗肩鍵就會彈出嚟,唔用果陣關咗佢,肩鍵就會收返埋。

實體肩鍵爽過 ASUS ROG 5? 黑鯊 4 上手評測 + 玩後體驗分享-11
▲ 左側係 SIM 卡槽以及音量鍵,老實講音量鍵喺左邊,我會有少少唔慣。仲有一點都係無 ROG Phone 5 咁好嘅,係佢無一個畀人側面充電嘅插槽,當你玩啲橫向畫面嘅 Game,就會頂住唔就手,最後玩玩下會忍唔住拔走充電線......
 

S870 不是問題?黑鯊 4 效能測試

同樣地,作為一部電競遊戲手機,強悍嘅處理器同樣相當重要。所以,黑鯊 4 都係用上旗艦級數嘅處理器,但可能就係因為 S888 供不應求嘅緣故,為咗可以滿足到貨量,黑鯊 4 退而求其次用上比 S865 Plus 強,但比 S888 弱嘅 S870 處理器。無所謂嘅,老實對我嚟講就算 S865 Plus 已經好夠用,S870 對我嚟講無乜問題,若果成本較低,無必要用到 S888。另外,黑鯊 4 會有兩個容量版本,分別為 8GB RAM + 128GB ROM 以及 12GB RAM + 256GB ROM 嘅版本,電池容量有 4500mAh。最後,實際效能表現如何,我哋都係例牌用安兔兔評測以及 AndroBench 5 應用程式,測試一下黑鯊 4 CPU / GPU 實力,以及 ROM 嘅讀寫速度。

實體肩鍵爽過 ASUS ROG 5? 黑鯊 4 上手評測 + 玩後體驗分享-12
▲ 安兔兔跑分成績為 613539 分,當中 CPU 成績有 142534 分,而 GPU 成績則有 244058 分,雖然總分比不上 S888 處理器,但呢個性能玩大部分嘅手機 Game 都好夠用。

實體肩鍵爽過 ASUS ROG 5? 黑鯊 4 上手評測 + 玩後體驗分享-13
▲ AndroBench 5 用來測試 ROM 讀寫速度,連續讀取以及連續寫入分別為 1661.11 MB/s 以及 747.31 MB/s,代表佢係用上咗 UFS 3.1;至於隨機讀取及隨機寫入速度則分別為 288.13 MB/s 以及 257.1 MB/s,速度算挺快,代表在使用體驗上理論上也會很順暢。
 

實體肩鍵才是正路!黑鯊 4 遊戲實際體驗分享

一部電競遊戲手機嘅靈魂,就係用佢嚟打機嘅表現。雖然而家係少咗人玩 PUBG 食雞,但無計因為版主我自己間唔中仲有玩開,最後我都係用佢食咗場雞。對比起 ASUS ROG Phone 5,黑鯊 4 實體肩鍵確實相對超音波觸控好,首先你更容易知道自己有無撳到,其次手感更佳。我用 ROG Phone 5 打機嗰陣,唔係話 ROG Phone 5 唔好,但容易會有誤觸嘅情況,尤其 ROG Phone 3 開始已經玩到愈嚟愈多按鍵,淨係肩鍵都可以變到又 L1/L2 同 R1/R2,你唔係實體鍵真心好易撳錯,同埋 Air Trigger 靈敏度調高,會容易 Hi 到,靈敏度調低,撳果陣又好似唔係咁舒服。所以總括嚟講,我覺得黑鯊 4 今次係做得唔錯,最緊要係,價錢都平一大截。

順帶一提,用黑鯊 4 玩 PUBG 嘅過程中,手機完全唔覺得有發熱嘅情況,呢樣相信係得益於佢用咗第四代三文治液冷散熱系統,BTW 都係名一個,佢用乜技術用乜原理唔多講,反正大家都無乜興趣,總之我試過,結論係玩完唔熱,咁即係佢個散熱係 Work,完。

不過,遊戲體驗雖然唔錯,但初次使用設置肩鍵位置,有少少麻煩。首先你要打開「遊戲空間」,你可以喺 App Drawer 都開佢出嚟,亦可以同時撳住左右肩鍵打開;之後進入遊戲,打開遊戲助手嘅方法係:屏幕左右兩角向內斜拉,簡單嚟講就係好似 V 字咁,從兩角向住手機中央部分拉,但我發覺超難拉佢出嚟,好難用;呢方面 ASUS ROG Phone 5 就做得好好,好簡單左邊邊緣滑一滑,就可以拉個遊戲工具列出嚟,輕鬆易用。

實體肩鍵爽過 ASUS ROG 5? 黑鯊 4 上手評測 + 玩後體驗分享-14
 

黑鯊 4 三鏡頭相機實拍

最後,雖然黑鯊 4 係一部用嚟打機嘅手機,而唔係 Sell 相機,不過當你真係買咗部手機返嚟,你就唔會淨係用嚟打機咁簡單,唔通打機又要一部手機,影相又要一部手機咩?所以,呢度我都係咁易畀幾張用黑鯊 4 影嘅相畀大家睇下。

睇相之前,先了解黑鯊 4 相機嘅規格,佢係用咗三鏡頭,分別為:

- 48MP 四合一高解像度鏡頭 (F1.79 光圈)
- 8MP 120 度超廣角鏡頭 (F2.2 光圈)
- 5MP 2cm 微距鏡頭 (F2.4 光圈)


好,試相來了,無特登周圍跑,簡單啲喺發佈會現場間餐廳度,影一啲相畀成像你睇:
   
小結
初試黑鯊 4 呢部遊戲手機,我覺得打機果陣肩鍵手感相比 ASUS ROG Phone 5 更好,但有些設計上嘅,則未必及 ROG Phone 5 聰明,例如 3.5mm 耳機孔嘅擺位、無側面充電嘅功能等等。無嘅,只好打機果陣唔好有線耳機,唔好一邊叉電一邊玩,咁就問題不大嘅。最緊要係,佢價錢唔算貴,最平 $3798 已經有交易,網友又會唔會考慮吓佢呢?留言討論下啦!

黑鯊 4 (8+128) 在文章發表時,建議零售價為 $3798,按這裡有詳細規格及最新賣價
您可能也喜歡▼