呢張 mastercard 無號碼,型到爆!我搶先有張 WeLab Bank 卡

2020-06-17 17:15
見 WeLab Bank 喺 (17/6) 正式公佈試業,睇嚟呢篇文都可以寫得出街,其實我早過 YK 半個月已攞到 WeLab Bank 嘅帳號 (佢嘅介紹,可以 Click 呢度) 。當時因為一個朋友嘅幫忙,令到我成為最早期嘅用戶之一,而我已經手執一張 WeLab Bank 發行嘅 mastercard。呢張卡,其實係一張 debit card,最大特色係唔會有號碼係上面,張卡設計好簡約。而我嗰張多咗隻「Founding member」嘅字。作為一個虛擬銀行用家,就等我分享一下,WeLab Bank 好唔好用,呢張 mastercard 跟大家用開嘅嘅 mastercard 有乜嘢唔同。

呢張 mastercard 無號碼,型到爆!我搶先有張 WeLab Bank 卡


無號碼 mastercard 試用

WeLab Bank 呢張 mastercard ,拎上手,雖然用銀色令到你覺得好似係金屬卡,但佢事實只係一張膠卡,不過膠定金屬都好,功能先係最緊要。雖然,佢係一張 mastercard,但跟 HKT 嗰張 TapnGo mastercard 一樣,都係一張 debit card,即係要戶口裡面有錢先可以「碌」。而跟 Tap nGo 嗰張 mastercard 唔同,WeLab Bank 嘅 mastercard,仲有提款功能,係香港用銀通提款機,係海外用貼咗 mastercard 嘅 ATM 就得。功能咁好,我就用充滿期待嘅心情試用呢張卡。
   ▲ 首先收到嘅係 WeLab Bank 標誌顏色嘅 folder 包住張 mastercard 卡,呢張係無號碼 mastercard  嚟嘅,正面見到一個醒目嘅 WeLab logo,而右下就係 mastercard network 嘅 logo,真係一隻字都無。呢張卡係 debit card,但係全球收 mastercard 地方同埋有 mastercard logo 嘅 ATM 提款機,都可以用到呢張卡。此外,大家仲見到佢係有晶片嘅,仲有 contactless 嘅 logo,意味著呢張卡唔一定要「碌」,拍卡畀錢都可以嘅。

背面就見到 Jetco network 嘅 logo,香港嘅銀通 network ATM 都可以免費提款,有別外國嘅 virtual bank 限制,暫時見到無任何提款嘅上限,即係你嗰 Welab Bank 戶口有幾多錢 (當然唔係定期),你就可以撳幾多出嚟。

呢張 mastercard 無號碼,型到爆!我搶先有張 WeLab Bank 卡
▲ 要 active 張卡好簡單,只要開隻 App screen 入面個 QR code 就可以了,快過你去整杯麵。
 

碌卡之前先入錢

拎完張卡,當然要入錢落去啦。所有虛擬銀行都係無實體分行畀你入錢,全部都要用 online 去做,即係用 FPS 轉數快或經其他銀行 online banking 入錢落去。我曾經讀過一篇來自經濟日報某人嘅專欄,話呢類虛擬銀行 Virtual Bank (VB) 只可以用轉數快 FPS 入錢。錯晒啦!我建議佢快快趣,睇返 YK 篇分享文,去申請返個戶口,反正開戶口無收費,又無存款下限。


呢張 mastercard 無號碼,型到爆!我搶先有張 WeLab Bank 卡
▲ 收到張卡後就可以入去呢到睇到自己卡 number,只要 click 左上角合埋嘅眼,入返 password 就可以睇返。係我寫緊呢篇文嗰陣,有兩樣嘢未做到,首先係無凍結卡功能,即係唔可以突然暫停張卡。而銀通機嘅無卡提款都未用到住 (但可以插實體卡嘅) ,相信稍後都會開通有關服務。

呢張 mastercard 無號碼,型到爆!我搶先有張 WeLab Bank 卡
▲ 先落街買嘢飲,咁呢張 Debit card 係有 contactless 功能,拍一拍卡就搞掂,錢已付。

   
 ▲ 喺消費後,無好似 AE 卡咁,喺 app 彈嗰通知俾你,但都會用手機短訊 SMS 同埋 Email 傳送俾你做記錄。不過,如果你用呢張卡做網上消費,例如我掛呢張卡去我嘅 Uber 戶口,我反而喺 Welab Bank 嘅 app 收到通知,同時都收到個 email 話我喺 Uber 交易,但可惜嘅係,我都唔可以喺 app 入面見到我交易嘅 detail,例如我喺邊到做過乜嘢交易等等,雖然我會收到 email 去通知,但喺 app 做唔到同步顯示,唔夠 user friendly。

可能因為 offline transaction,商戶當日未做結算,所以做唔到即時顯示。個人認為可以照 show 出嚟。無嘅話,有 email 通知都好。事實上,全部 transaction 喺 dashboard 見到,都係最好嘅。未確實結算嘅交易,我建議可以好似 AE 卡咁,寫返「Pending」已經足夠俾人知道到底有咩商戶 hold 咗條數。
 

總結

WeLab Bank 嘅 matercard,造型相當唔錯。實際用上來,其實跟大銀行嘅 mastercard 信用卡無大分別,至少可以係 7 仔、超市照用、你坐龍運 A 車去機場,用嚟畀車費都仲得。

WeLab Bank 喺 App 功能上,我覺得對比目前嘅傳統銀行,已有不少進步,例如嗰 App 入面,已有 tool 做統計,等用戶知道自己洗嘅錢主要去咗邊。

此外,以下是我對 Welab Bank 嘅 mastercard 跟專用 App 嘅幾個建議

001:香港嘅信用卡/debit card,一直都係以簽名作簽帳,但作為以科技行先嘅 Virutal Bank,我建議可以引入歐洲慣常用法,改用 PIN 作身份認證。相信大家用 Contactless 信用卡,都知道過咗 $500就要你簽名,不過,就算呢張無號碼嘅 mastercard,若果你跌咗張卡,又趕唔切喺 App 停用咗佢,你都一樣可能被人盜用。簽個名,好容易!若果,可以自行設定 contactless payment 上限,再加上改用 PIN 作身份認證,係保安上會更加好。

002: 正如前文有講,專用 app 喺交易上可以改為即時顯示。即使商戶唔係即時結算,用戶都希望得知自己係咪做緊交易。再者可以唔用 email 改為 app 作交易通知,我都會覺得比較可取。因為如果太多 email,只會令到用家完全 miss 曬所有通知。

003:加入繳費功能吧!如果一個 app 可以處理晒每個月交唔同帳單嘅問題,我相信唔少人會肯轉過來用。另外,跟商戶傾「direct debit」都係一個出路,配合埋 mastercard network 下,可以做嘅會更多。

香港虛擬銀行比起其他國家都要遲起,但有其他國家做參考,同埋香港科技發展同埋銀行相對開放,香港環境有條件做到更好甚至超越領頭嘅國家。當傳統銀行仲係輕視一眾虛擬銀行嘅時候,不如就由虛擬銀行來一個重擊先,改變到整個銀行對用戶嘅體驗吧。

 
您可能也喜歡▼