最後攻略 保證最齊料:截止前 iBond 點樣抽

2020-11-02 21:38
最後攻略 保證最齊料:截止前 iBond 點樣抽

唔好再問到底 iBond 是否值得抽,相信大家都睇左好多媒體或者講股佬的所謂分析。如果你決定好申請 iBond 但又準備係 Last Minutes 先入飛申請的話,咁你可以繼續睇下面的內容喔。

什麼是 iBond?
首先,循例都要簡單講下到底什麼是 iBond,全名 Inflation-linked Retail Bond 「通脹掛鈎零售政府債券」,相當於你借錢比政府,政府一共借你三年錢,佢每半年歸還利息比你一次。 而利息的息率係同通脹掛鉤,保證最少有 2% p.a. 的水平,如果還息前六個月香港通脹率係高於 2%p.a. 就會用較高的百分比做基礎。 假設到時候通脹率係 5%, 咁就用 5% p.a. 還息比你。

有什麼申請門檻?
咩人可以申請? 政府話年滿 18 歲已持有香港成年身份證市民就可以申請,但其實你需要經過配售的銀行或者證券行先買到,呢個係另一個隱藏門檻黎。 你無投資戶口,又或者宜家想開翻個? 就要睇你所選擇的銀行 / 證券行開戶速度如何了。一般需要 1 - 3 個工作天,實際上視乎申請處理效率。另一個申請門檻係申請資金,你最少要有一萬蚊係多出黎可以提交申請,因爲 iBond 係一萬蚊一份。如果你無一萬蚊以上金額多出黎,咁就只能問人借錢申請,而「借定唔借,還得好先好借」。

仲有一個申請門檻係,iBond 雖然話係 11 月 5 日下午 5 點先截止,但留意翻銀行 / 證券行自己都會有自己的死線,一定係提早好多個小時截止,所以你申請的話唔好真係 Last Minutes 先轉錢過去入飛喇!

邊個銀行 / 證券行申請有著數?
坊間好多銀行或證券行都有各種費用減免黎吸引大家申請 iBond,但都係果句,各種收費多寡除了睇減免項目外,你仲要留意有無其他巧立名目的收費係無 LIST 出黎(我就咁睇過去都仲有不少)。一般而言,認購費、代收利息費、託管費(或稱存倉費)、贖回費都係豁免,但其實仲有佣金、二手買賣交易費、轉倉費等等收費,所以要睇清楚喔。

有無申請攻略?
好多朋友都會問,申請 iBond 是否需要好多 IPO 招股咁申請貸款(孖展)黎谷大自己個資本,等中獎機率就越大? 好多人以爲申請 iBond 同抽新股玩 IPO 一樣,其實呢個思維唔正確。 iBond 介紹書裏面列明並非好似平時 IPO 咁申請投入的錢越多,可以增加中獎機率。債券身份的 iBond 反而係注重一人一手:最少 100 萬份,最高 150 萬份。

意思係,如果有 50 萬個香港人申請,就會每人最多申請到 3 份,而每份的係一萬,意思係呢 50 萬個香港人會每人揸住 3 萬蚊 iBond 喇;如果有 150 萬個香港人申請,咁每個人最後只能獲派發 1 份債券,不論你當初投入 10 萬還是 100 萬的籌碼申請;所以,如果你係大額貸款申請 iBond 就要留意利息是否值得賭博;如果超過 150 萬人申請就變成抽獎了,每人最多一份,或者 0 份。

申請的攻略係,首先你自己估計係到底會有幾多個香港人打算參加 iBond 抽獎,假設有 50 萬人申請,你只需要投入 3 萬港幣;假設你估計有 75 萬人申請,你只需要投入 2 萬港幣。投入再多的金額都是白費心機,錢多出黎不如訂閱睇 ePriceHK 的 Patreon 頻道好過

申請完有乜玩法?
你好彩抽中左,咁得兩條路:
第一,等足 3 年,每半年收取利息一次,每次利息可高可低,總之最少有 2%p.a. 喇;
第二,你中途隨時放售債券走人;

放售有乜注意事項?
同一般買賣股票不同,債券 iBond 的買賣只有兩個市場,第一、港交所掛盤交易;第二,銀行自己的場外交易市場(OTC);而有趣的是,銀行預設幫你存放 iBond 的位置是 OTC 買賣的倉,如果你想在港交所掛盤交易的話,就需要轉倉到指定可供交易的倉位,而呢個轉動動作需要時間,係以(天)做計算單位;也就是如果你第一日想轉倉賣 iBond 就要留意自己選擇的銀行有無轉倉要幾日的問題,如果無豁免的話,轉倉係有費用的喔。

咁當然,銀行 OTC 價錢一般會比港交所差,但你自己計算下轉倉時間,以及轉倉費用,你抽中一份 iBond 債券的話,可能留係 OTC 交易比人壓價仲划算蝕少左。

如何計算實賺幾多?
11 月 12 日就抽獎知道結果,11月17日就可以買賣; 到時候自己留意各銀行 OTC 回收價格或者港交所的公開交易價格,假設一份 iBond 原價 10000 元,回收價格係 10500 元。 意思係你賣出的話,賬面上可以袋 500 元。但如果你肯自己擺足 3 年比政府的話,最少可以獲得 600 元的利息收入。 咁你自己要衡量是否賣,又或者揸足 3 年,呢兩個情況邊個適合你自己呢?

好多人賣左當日就立刻出去食飯慶祝,但其實好多時候會有隱藏收費架,可能你會係一個月後,或者半年後發現自己戶口無啦啦比人扣左一百幾十蚊,到時候打去銀行 / 證券行問先會知道「喔,原來係 iBond」相關的費用。所以賬面價差賺幾多,同你實際上賺左幾多落袋係肯肯定有差別。
 
您可能也喜歡▼