甚麼是 MeWe?
MeWe 其實唔係一個新平台,早喺 2012 年已經推出,係由一間美國公司 Sgrouples 成立,成個平台擺到明係打 Facebook,主要賣點係:i. 無廣告 (主要收入來自用家嘅贊助支持)
ii. 無間諜軟件在未經許可情況下收集個人資料
iii. 無演算法,可以睇到哂所有 post,唔會被篩選。
MeWe 有乜必知功能 / 事項?
呢啲只係表面嘅優點,實際用落有啲咩功能,你係可能唔知,或者有咩功能值得一提?版主使用多日,就逐一同大家講下,到底 MeWe 有乜咁正,同埋有乜地方需要注意。001: Feed 唔會好似 Facebook 咁,乜都撈亂哂一齊,WeMe 可以選擇到底睇「All」,睇「Contact」,睇「Page」定睇「Group」,呢樣係正嘅,以前 Facebook 都仲有得淨係睇 page 嘅內容,整整下都無埋,最後我只能開個空賬 ac,淨係用嚟睇 page 用。
002: 用得 MeWe,當然都要識得保護自己私隱,記得按入去右上角你個頭像,進入 Settings,「Privacy & Sharing」,選擇返淨係得朋友嘅朋友可以 send request 畀你,同埋 friend lists 都 set 做任何人都睇唔到,咁就安全啲。
003: 話說就有朋友開咗個 Group,咁我就加入啦,發現到一個比 Facebook 正嘅功能,就係入 Group 可以換過第二張 Profile Picture,唔會咁易畀人認得出你係邊個。當然,若果可以入 Group 自己 set 埋自己暱稱,咁就更加 Perfect。
004: 主頁按 Browse Group / Browse Page 可以 search 到所有 page / group,亦可以按分類去搜尋你可能有興趣嘅 page / group。
005: 入咗 Group,發現有時係咁響好嘈?Setting 入面都可以揀 Mute 咗佢。
006: 見到鍾意嘅 Post,可以用任意嘅 Emoji 去 Like Post,唔會好似 Facebook 咁限死得果幾個。
007: 一般而言 Feed Post 會以時間順序排列,由最新到最舊。
008: 手機版開 Post 從此唔使再碌返最頂,先可以出到 Post,因為右下角會有個固定的「發起貼文」按鍵,可以隨時出 Post 無難度。
009: 呢一點,可能真係要係 Page 專頁管理者,先會有共鳴。Facebook Page 以前其實做得好好,出 Post 嘅時候可以直接 Schedule 排定時間,但搞搞下連呢個功能都閹割咗,逼你一定要另外去「創作者工作坊」先可以排到時間,成件事搞到複雜又麻煩。而家 WeMe Page 可以出 Post 嘅時候直接 Schedule 埋,方便得多。
010: 數完 9 點,突然醒起一個點,補充一下,就係 MeWe 唔會有實名制,開 ac 唔使一定用真名,一個手提電話號碼就搞掂。諗返起 Facebook 而家,我想開過個新 ac,都搞到好麻煩,之前諗住開個新 ac 去管理自己嘅網店,點知成日開完 ac 用咗兩用,就突然停用咗我 ac,一係要我自拍張相畀佢,一係仲要我 send 埋身份證畀佢。最低能嘅係,影完身份證畀佢,驗證完身份咪算囉,佢仲強制將我個 Facebook 名改成我身份證全名,而且唔畀我改,真心激死人。