版主轉台分享:官網沒告訴你的新優惠!HKBN 限時送 100M 上網

左定坤 (Cho Ting Kwan) 2021-01-26 17:18 | 科技新知
今次版主寫呢篇文,都係同著數有關嘅,不過就係分享自己嘅第一身經歷。話說版主自己本身屋企就用緊和記寬頻,唔可以話唔好,但最慘就係我住果度大部分網絡商都係提供到 100M 寬頻,左睇右睇似乎都係得 HKBN 香港寬頻,先至可以提供到高達 2Gbps 光纖上網,所以都諗住轉會。而之前 HKBN 就畀版主體驗吓 2Gbps 光纖寬頻半年,今日 HKBN 員工上嚟收返部 Router,然後就順便都 Join 埋 Plan,跟住就發現原來佢哋做緊一個官網無寫嘅新優惠!所以就開心 share 下!

FB.jpg

是咁的,我即將會由和記寬頻嘅 100M 轉台去香港寬頻嘅 1000M,本身和記寬頻就每月畀緊 $12X (唔記得實際係幾錢,因為申請人係家父,已經用咗有 8 年之多),100M 寬頻送埋 myTV SUPER 解碼器 (我唔睇,但屋企人要 無奈);而之後諗住轉香港寬頻 $198 Plan,簽 3 年約送 1 年,扣取優惠每個月約 $132,有 1000M 寬頻 + myTV SUPER 解碼器,每月畀多幾蚊就有更快嘅速度享受,我覺得我轉台係相當合理。

螢幕截圖 2021-01-26 下午5.02.00.png

以上講乜嘢簽 3 年約送 1 年,其實都係 old news 嚟,唔係新鮮嘢,不過正當版主簽好哂上台資料嘅時候,HKBN 職員就表示,佢哋最近原來仲有個專為 Work from Home 而設嘅新優惠,就係除咗本身嘅 1000M 寬頻之外,仲會額外送多 24 個月嘅 100M 寬頻 (注意!合約期 3 年,但只係送 2 年 100M 寬頻,2 年後唔用要 CUT),呢個優惠據聞去到 2021 年 2 月 28 日。有得送,幾大都要咗先啦,不過佢就表示,唔會而家同我裝,係要等之後師傅上嚟真係安裝寬頻,再問佢你哋係咪有個新優惠送 100M 寬頻,咁師傅就會幫我裝埋。

最後問到,係咪淨係得 1000M 寬頻先有得送,職員就表示要你居住嘅大廈同時支持 100M 以及 光纖寬頻,咁先可以申請,即係如果你住村屋,無光纖嘅話,咁就唔會送多條線。

對我嚟講,送多條 100M 寬頻,其實係一件好事,對於對速度有要求嘅我嚟講,可以將 1000M 寬頻直接駁電腦,而屋企人無乜速度追求,就用 100M 駁 Router 全家用。Work from Home 大家又唔會影響到大家,我覺得呢個 offer 幾唔錯。網友又點睇呢?
 

最新新聞