史上最「長」真無線!Cambridge Audio Melomania 1

2019-10-30 01:55
文章分享
話說 9 月中時,由於好耐冇掂過的 Bragi The Dash Pro 身中 common issue 陣亡(可惜,其實真係好機嚟),個人急需一對新耳機;經諮詢後最終入手了現用的 Cambridge Audio Melomania 1(特別鳴謝 耳機狂人MakCato 推薦),而使用一個月後,亦係時候久違地講啲嘢。

史上最「長」真無線!Cambridge Audio Melomania 1

唔好意思嘅係,由於屋企搞足年幾都未 settle 所以拍唔到嘢,唯有用住文字先,特此致歉。

史上最「長」真無線!Cambridge Audio Melomania 1
先講保護盒,簡單講就係 AirPods 款,哩個本身亦係我揀選的原因:貪佢夠細方便入袋(男人唔鍾意孭袋嘛)。但入手使用之後,先發覺 AirPods 真係有料:皆因 Melomania 1 的外盒其實只係 marginally 比 AirPods 大極少,而得益於磨沙面跣到不得了的特性,佢竟然剛好放得入我牛仔褲的陀錶袋(好啦而家叫 coin pocket 鳥)!亦即是說,AirPods 的設計某程度上都可能有此考慮 - 事實是,透過將「牙刷柄」縮短,新的 AirPods Pro 亦將其高度大約維持與舊款的寬度相近(雖然都大了 0.9mm),亦即是說 Airpods Pro 極可能同樣可以放入陀錶袋 - 淨係呢點,基本上已完勝 Sony WF-1000XM3 - 離題了,總之入到陀錶袋好得我歡心就是。

史上最「長」真無線!Cambridge Audio Melomania 1
接住講耳機本體,每邊只有 4.6g 的超輕量對於佩戴來講可以說是全無負擔,而且最正的是,除正常 SML 耳膠外,跟機居然附送耳綿一對!點解咁開心?因為其實跟機的耳膠,由於形狀較尖,所以以個人常用的 M size 為例,其實戴上去係頗唔穩陣的,而耳綿除令聲音更實淨之外,亦直接令佩戴感充實安全得多。不過有好當然有唔好,換上耳綿之後其實會戴得冇咁入,所以有時耳機會稍為頂到耳殼,有點不適。

史上最「長」真無線!Cambridge Audio Melomania 1
功能上,Melomania 1 係非常之基本,無 app 無聽歌降噪無 EQ(聲稱有通話降噪,容後再敘),只有最基本的聽歌講電話。左右耳機各有一實體按鍵,非常好 - The Dash Pro 的觸控有時真係用到發癲 - 兩邊都可以控制 Play / Pause,而左右雙按則是飛歌。可惜由於按鍵簡單,所以音量需要透過長按控制,造成操控準繩度極低,唯有嬲嬲地直接撳電話算。講到通話,由於 danny姐而家行「二機流」,而聽歌用的 Sony Xperia 1 並未用來通話,再加上 Melomania 1 似乎未支援同時連接兩部裝置(或者係我蠢?),所以至現時為止,我係未能測試通話質素的。(30/11 測試後感:都係唔好期待太多,朋友表示室內表現等同一般電話室外通話,兼夾潛水聲…我都係當佢純聽歌耳機好了)

史上最「長」真無線!Cambridge Audio Melomania 1
講真無線當然要講連線表現。老實講,以藍牙 5.0 來計,個人並不能給予 Melomania 1 好評。其實又未至於用到發茅,不過用到三四日點都會遇到一次莫名的斷線,甚至試過攞部電話出來隊埋個頭度(雖然連住左耳我隊咗埋右耳…)都無改善…不過其他時候都叫做穩穩定定,只係由於個人會兩部電話疊住袋所以會有干擾窒機而已。呀,睇片聲音延遲方面完全可以接受,當然想用來打機就稍顯勉強喇。

史上最「長」真無線!Cambridge Audio Melomania 1
其實個人認為自己係半木耳,不過講耳機唔講聲實在太怪,所以都係講些少吧。同大部份藍牙耳機一樣,Melomania 1 似乎特別加強過低音,which is 我唔係好鍾意的:年少輕狂時當然越激越好,不過隨住人越大,都開始越來越重視平衡。可幸 Melomania 1 高音都算 ok,叫做通透,結他聲聽落都有彈性,但人聲相對比較後,差咗少少。er,雖然我平時都係聽 KKBOX,其實冇乜參考價值就是。

史上最「長」真無線!Cambridge Audio Melomania 1
最後特別要講的是電力,which is Melomania 1 其中一個最大的賣點。單機續航 9 小時,連充電盒總續航更高達 36 小時,就算唔係最強都一定名列前茅。至於實際使用如何?一個月來,粗略計算大約返工 24 日,當中約一半日子會返工放工聽歌,每日大約 1.5 小時;外加假期 1-2 日有用來搭車聽歌,總共大約使用 22-24 小時。然後?我由 4/10 第一次叉電,到 29/10 落手寫文為止,叉電盒都仲有兩粒燈着緊!計鬆少少當尚餘 30% 電,即總使用時數約會落在 31-34 小時之間,頗為接近官方數字。重點係,如此強橫的續航力,對於經常唔記得叉電的 danny姐來講簡直係最適合不過!

史上最「長」真無線!Cambridge Audio Melomania 1
唔,想講的應該都講晒,唔經唔覺本身只係想講兩句點知又變咗長文,我果然係長氣依舊。最後利申一下,Melomania 1 售價 $1,280,本人 3/10 真金白銀於 APM 豐澤 TechLife 購買,同廠商完全無關,非借機非廣告(都離開咗兩年仲點會借到…手機另計)。
 
後記。其實我周不時都會有嘢想噏下,不過由於一貫的懶散,所以都係唔勉強自己 keep 住寫文出片;亦因如此,下次幾時有嘢睇就隨緣吧,呵呵。Any 肥,thanks for watching,下次見。
文章分享
您可能也喜歡▼