【含劇透】買票前必看! 睇完令你驚訝的《屍殺半島》係乜玩法?

2020-08-31 10:24
本 YK 就好少會咁主動寫影評,成日覺得每個人入場睇電影,或多或少都會有自己的體驗,如果睇之前就已經睇晒人地觀後感的話,入場後總可能會少左一分驚喜。 但今次套《屍殺半島》真係值得我開翻篇文黎分享,而且雖然內文含有劇透,但依然強烈建議你睇文!

【含劇透】買票前必看! 睇完令你驚訝的《屍殺半島》係乜玩法?

趁戲院重開首日,我就光速選擇了一個晚上的尾場,拖住女人入去觀看這套載譽歸來的韓國大作。先講結論: 本 YK 強烈不建議你用第一部作品的標準黎審視呢套聲稱的續集,而成套電影睇完嚇一條,係失望到喊出泥。好喇,下面入正題。

本地媒體和廣告商號稱係「屍殺系列」第二部電影,其實係唔正確。電影只有短短幾個場景交代話因爲上次喪屍太多喇,攻陷韓國變成鎖國地獄,而鬼佬知道裏面有大量無主美金鈔票,所以請主角入去執翻錢出黎。從人物到劇情,一律同前作毫無關聯,你完全可以睇佢係一部獨立作品。回看《屍殺列車》的成功,除了列車這個場地有新意,肥大叔、怕死佬、自私男主一號等等的角色非常鮮明,難得地每一個角色都有傳神的演技配搭,才擁有了《屍殺列車》當年高度的好評。

但來到《屍殺半島》,劇情同過往歐美一堆喪屍片的故事、設定、流程高度相似:先係主角爲了錢而同一堆人回到充滿喪屍的韓國,後來才發現原來韓國還有非喪屍的人類居住;軍警變成恐怖分子統治遺民區域,一直留在韓國的女主角同兩個女兒,仲有個癡呆老爺爺遠離極權的生活狀態。電影歷時接近兩個小時,但我的腦海裏不斷浮現以前看過的各種喪屍片,劇本重複又重複地強化陳舊的故事線。而男主角姜棟元的演技亦相當平淡無味,李貞賢飾演作爲媽媽的女主角亦無法爲電影增添味道,略爲救分的位置反而是她的兩個女兒浚兒和有珍(分別由李蕊和李藝媛飾演),前者很好地演繹出大女兒不該有的超成熟特質,後者作爲小女兒揉合可愛和小靈精的個性亦令我留下了深刻印象。但最令我 O 晒嘴的地方反而係有關香港的場景和人物,先不談電影裏面的「香港人」配音,充滿韓國鄉音的廣東話,再配合韓國人面孔風格的演員。我偷用離場時聽到一位同場港女的評價:「成件事好唔香港囉唔該!」

有本地影評提到在前作光環下「期望越大、失望越大」,但撇開這種前後作的對比落差,《屍殺半島》作爲喪屍片的水平與國際上其他作品相比亦相當令人失望:要血腥唔夠血腥;要身材正靚女但得靚女無身材;想睇武器槍械展? 但就得幾把普通貨色;要劇情有意外驚喜? Sorry 無意外發生; 所以稱得上係四大皆空的作品,缺乏一貫喪屍片應有的官能刺激程度。當然,電影係有嘗試透過人性的對比營造出男主角經歷時間洗禮後的變化,從一開始自私地拒絕爲其他人提供援助,到結尾帶住主角光環殺回頭營救本來打算捨生自殺的女主角。而狗血淋頭的劇情自然又係是「成功救出」配「從此以後幸福快樂地生活」喇。

其實令人印象深刻的韓式喪屍片除了《屍殺列車》外,Netflix 上古裝設定的《屍戰朝鮮》亦相當不錯。 這次《屍殺半島》我不知道最終票房有多少金額,但可以肯定係下一次本 YK 絕對不會率先狗衝入場,等各位匯報再算。
 
發表於 2020-09-01 08:54
2 樓

THX!
可以慳番唔駛睇!
您可能也喜歡▼