數碼通再出招搶 HKT 客:保證平過網上行寬頻月費!

左定坤 (Cho Ting Kwan) 2017-09-27 18:04 | 電腦硬件
網絡商之間競爭就一定有,不過佢哋平時唔聲唔聲做減價戰,你未必感受到當中較勁的氣氛,但好似而家咁明目張膽,開哂名擺明要搶對手客,相信你或多或少,應該都開始 feel 到有一點兒的緊張感。近期鬥得最為火熱的,應該是數碼通以及 HKT,先是利用真無限 4.5G 數據 Plan,互搶對方手機客,到今日數碼通再出招,下定決心要連網上行的家居寬頻客都搶走。用甚麼方法可以吸引到網上行客過檔呢? 數碼通作出了一個保證: 一定會平過你用緊嘅網上行寬頻月費!想知詳情,睇下文啦!

SmarTone (Facebook).jpg

記得手機真無限 4.5G 數據 Plan,搶客戰是由 HKT 旗下 csl. / 1010 發起,雖然最後數碼通都有出招,反將 HKT 一軍,但無端端受到對手挑釁,唔還擊點對得住自己?於是乎今次就輪到數碼通主動出擊,推出家居寬頻的搶客計劃,寫到明「飛起網上行!轉用 SmarTone 光纖寬頻,即享你現有網上行賬單月費至少 7 折」,講到明保證平過你而家用緊嘅網上行家居寬頻;而全新或現有 SmarTone 月費客戶,更可以享有現有網上行計劃至少 5 折的月費優惠。

不過,係咪任何網上行轉過黎嘅,都可以享有優惠呢? 在宣傳海報下方的條款中,可以見到寫住:

「只適用於網上行家居寬頻服務之指定網上行家居寬頻服務,而有關月費不低於 $110 (100M) / $120 (500M) / $130 (1000M)。實際月費將根據客戶提供之有效賬單而定。客戶需於服務安裝前 3 個工作天提交於 2017 年 8 月 1 日至 9 月 26 日期間發出的網上行家居寬頻賬單。」

用緊網上行家居寬頻的網友,見到呢個優惠,你會打算拿拿聲過檔去數碼通,抑或等網上行反擊再決定呢? 留言討論下啦!

SmarTone光纖寬頻-推出網上行客戶轉台優惠.jpg

最新新聞